ໃນວັນທີ 16 ມັງກອນ 2025 ພະແນກກວດກາຄວບຄຸມຢາເສບຕິດ ກອງບັນຊາການປ້ອບງກັນຄວາມສະຫງົບແຂວງຊຽງຂວາງ ຮ່ວມກັບກຳລັງປ້ອງກັນຊາດປ້ອງກັນຄວາມສະຫງົບ ເມືອງພູກູດ ພ້ອມພາກສ່ວນກ່ຽວຂ້ອງ ໄດ້ລົງທຳລາຍສວນຢາຝິ່ນທີ່ປະຊາຊົນລັກລອບປູກ ຢູ່ບ້ານພູແຊວ, ເມືອງພູກູດ, ແຂວງຊຽງຂວາງ ເນື້ອທີ່14.100 ກວ່າຕາແມັດ.
ເຊິ່ງການທຳລາຍຄັ້ງນີ້ໄດ້ໃຊ້ພ້າຖາງ, ໄມ້ຟາດ, ພ້ອມຫຼົກຕົ້ນອອກ ເພື່ອບໍ່ໃຫ້ສາມາດເກັບກ່ຽວໄດ້, ພາຍຫຼັງທຳລາຍແລ້ວໄດ້ນຳຕົວຜູ້ລັກລອບປູກຝິ່ນ ມາເຮັດບົດບັນທຶກສຶກສາອົບຮົມກ່າວເຕືອນ ແລະ ຊີ້ແຈງຜົນຮ້າຍຂອງຢາຝິ່ນໃຫ້ເຂົ້າໃຈຢ່າງເລິກເຊິ່ງ.
ພາຍຫຼັງກວດພົບການລັກລອບປູກຝິ່ນດັ່ງກ່າວ, ເຈົ້າໜ້າທີ່ພະແນກກວດກາຄວບຄຸມຢາເສບຕິດ ກອງບັນຊາການປ້ອງກັນຄວາມສະຫງົບແຂວງຊຽງຂວາງ ຮ່ວມກັບກຳລັງປ້ອງກັນຊາດປ້ອງກັນຄວາມສະຫງົບ ເມືອງພູກູດແຂວງຊຽງຂວາງ ໄດ້ລົງທຳລາຍສວນປູກຝິ່ນດັ່ງກ່າວ ແລະ ໄດ້ເຮັດບົດບັນທຶກສຶກສາອົບຮົມກ່າວເຕືອນ ແລະ ຊີ້ແຈງເຖິງຜົນຮ້າຍຂອງຢາຝິ່ນໃຫ້ປະຊາຊົນທີ່ລັກລອບປູກໃຫ້ຮັບຮູ້ ແລະ ເຂົ້າໃຈເຖິງຜົນຮ້າຍຂອງຢາຝິ່ນ.
ຂ່າວ: ປກສ ແຂວງຊຽງຂວາງ