ວັນທີ 16 ມັງກອນ 2025 ໃນໂອກາດທີ່ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ພ້ອມດ້ວຍຄະນະ ໄປຢ້ຽມຢາມ ບໍລິສັດ ຊີໂນ-ອາກຣີ ໂປຕາສ ຈໍາກັດ ຢູ່ແຂວງຄຳມ່ວນ ໄດ້ຮັບຟັງການລາຍງານ ຈາກຄະນະອໍານວຍການ ກ່ຽວກັບສະພາບການພັດທະນາໂຄງການຂຸດຄົ້ນ ແລະ ຈໍາໜ່າຍຜະລິດຕະພັນຂອງບໍລິສັດ, ຕະຫລອດເຖິງການປະກອບສ່ວນທາງສັງຄົມ ແລະ ມອບພັນທະເຂົ້າງົບປະມານໃຫ້ລັດຖະບານ ກໍ່ຄືແຂວງຄໍາມ່ວນ, ການສ້າງວຽກເຮັດງານທຳໃຫ້ແກ່ປະຊາຊົນ, ການຊ່ວຍເຫລືອພັດທະນາ ແລະ ປັບປຸງແກ້ໄຂຄວາມທຸກຍາກຂອງປະຊາຊົນ.
ເຊິ່ງບໍລິສັດຊີໂນ-ອາກຣີ ໂປຕາສ ຈໍາກັດ ເປັນບໍລິສັດລະດັບສາກົນທີ່ດໍາເນີນການຂຸດຄົ້ນ, ຜະລິດ ແລະ ຈໍາໜ່າຍ ເກືອໂປຕາສ. ເຊິ່ງມີເປົ້າໝາຍການຜະລິດໃຫ້ບັນລຸເຖິງ 7-10 ລ້ານໂຕນຕໍ່ປີໃນອະນາຄົດ, ເພື່ອຕອບສະໜອງການບໍລິການຜະລິດຕະພັນທີ່ມີຄຸນນະພາບສູງໃຫ້ແກ່ອາຊີ ແລະ ທົ່ວໂລກ, ບໍລິສັດຍັງໄດ້ຈັດຕັ້ງດຳເນີນຫຼາກຫຼາຍກິດຈະກຳ ວິສາຫະກິດ ເພື່ອເສີມສ້າງທີມງານທີ່ສາມັກຄີກົມກຽວ ເພື່ອພ້ອມກັນພະຍາຍາມສູ້ຊົນໃຫ້ບັນລຸຄາດໝາຍໂຄງການປອດໄພ, ສີຂຽວ, ເປັນມິດກັບສິ່ງແວດລ້ອມ ແລະ ພັດທະນາຍືນຍົງ.
ນອກນີ້ໃນເຂດດັ່ງກ່າວຍັງຈະໄດ້ສ້າງເປັນນິຄົມອຸດສາຫະກຳໝູນວຽນອັດສະລິຍະ ອາຊີໂປຕາສ ສາກົນ ໂດຍຈະແບ່ງອອກເປັນ 3 ພາກສ່ວນໃຫຍ່ຄື: ສວນອຸດສາຫະກຳໂປຕາສ, ສວນອຸດສາຫະກຳອະໂປຕາສ ແລະ ເມືອງອັດສະລິຍະ, ມີເນື້ອທີ່ລວມປະມານ 2.000 ເຮັກຕາ, ຄາດຄະເນການລົງທຶນທັງໝົດ 4,31 ຕື້ໂດລາສະຫະລັດ. ມາຮອດປະຈຸບັນໄດ້ບັນລຸມູນຄ່າຜົນຜະລິດດ້ານອຸດສາຫະກຳປະມານ 1.34 ຕື້ໂດລາ ແລະ ສ້າງວຽກເຮັດງານທໍາເກືອບ 20,000 ຄົນ. ໃນນັ້ນ ມີພະນັກງານລາວ 5,000 ຄົນເຮັດວຽກຢູ່ຖານການຜະລິດ; 6,000 ຄົນ ທີ່ໃຫ້ການບໍລິການດ້ານການກໍ່ສ້າງ ແລະການຜະລິດ; ນອກຈາກນັ້ນ ບັນດາຮ້ານຄ້າທີ່ໃຫ້ບໍລິການມີຫຼາຍເຖິງ 300 ຮ້ານ ແລະ ພະນັກງານທີ່ໃຫ້ການບໍລິການໃນມີ 3,600 ຄົນ, ມູນຄ່າການຊື້ຂາຍປະຈຳເດືອນບັນລຸ 26.2 ຕື້ກີບ.
ແຫຼ່ງຂ່າວ: MediaLAOS