ໃນໂອກາດຂຶ້ນລາຍງານຕໍ່ກອງປະຊຸມ ສະໄໝສາມັນເທື່ອທີ 8 ຂອງສະພາປະຊາຊົນ ແຂວງອຸດົມໄຊ ຊຸດທີ II ໃນຕອນເຊົ້າວັນທີ 14 ມັງກອນ 2025 ທີ່ສະໂມສອນແຂວງ, ທ່ານ ບຸນຄົງ ຫຼ້າຈຽມພອນ, ເຈົ້າແຂວງອຸດົມໄຊ ໄດ້ຍົກໃຫ້ເຫັນເຖີງຜົນສໍາເລັດໃນການພັດທະນາຂົງເຂດການພັດທະນາຊົນນະບົດຢູ່ແຂວງອຸດົມໄຊ ວ່າ: ປີ 2024 ຜ່ານມາ ແຂວງໄດ້ສຸມໃສ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ. ອັນພົ້ນເດັ່ນແມ່ນສາມາດປະກາດ ບ້ານຫຼັກ 32, ເມືອງໄຊ ແລະ ບ້ານສີບຸນເຮືອງ, ເມືອງຮຸນ ເປັນຕົວເມືອງນ້ອຍ ຢ່າງເປັນທາງການ (ທຽບໃສ່ມະຕິສະພາ ປະຕິບັດໄດ້ 100% ຂອງແຜນການ); ສາມາດສ້າງຄອບຄົວພົ້ນທຸກ ໄດ້ 3,405 ຄອບຄົວ, ເທົ່າກັບ 92% ຂອງແຜນການ; ບ້ານພົ້ນທຸກ ໄດ້ 33 ບ້ານ, ເທົ່າກັບ 80.5% ຂອງແຜນການ; ສ້າງເມືອງພົ້ນທຸກ ໄດ້ 1 ເມືອງ (ເມືອງໄຊ), ສ້າງຄອບຄົວພັດທະນາ ໄດ້ 3,998 ຄອບຄົວ, ເທົ່າກັບ 94% ຂອງແຜນການ ແລະ ສ້າງບ້ານພັດທະນາ ໄດ້ 30 ບ້ານ, ເທົ່າກັບ 100% ຂອງແຜນການ.
ນອກຈາກນີ້, ແມ່ນຈັດສັນພູມລຳເນົາ ແລະ ທີ່ຢູ່ອາໄສໃຫ້ປະຊາຊົນຢູ່ເຂດຊົນນະບົດຕິດພັນກັບການກໍ່ສ້າງພື້ນຖານໂຄງລ່າງທີ່ຈໍາເປັນເພື່ອຮັບໃຊ້ການຜະລິດ ແລະ ປຸກລະດົມທົ່ວສັງຄົມໃຫ້ມີສ່ວນຮ່ວມຫຼາຍຂຶ້ນ ໂດຍໄດ້ຈັດຕັ້ງປະຕິບັດຢູ່ 3 ເມືອງ ຄື: ເມືອງງາ (ຈຸດສຸມຫ້ວຍໄລ), ເມືອງແບງ (ຈຸດສຸມນາໂຮມ) ແລະ ເມືອງຮຸນ (ຈຸດສຸມບ້ານນາຊຽງດີ ແລະ ສີບຸນເຮືອງ), ມີທັງໝົດ 9 ບ້ານ, 361 ຄອບຄົວ, ໃນນີ້ ໄດ້ຍົກຍ້າຍມາຢູ່ຈຸດທີ່ຈັດສັນໃຫ້ແລ້ວ 154 ຄອບຄົວ, ຍັງບໍ່ທັນຍົກຍ້າຍ 207 ຄອບຄົວ ແລະ ໄດ້ຈັດສັນທີ່ຢູ່ອາໄສໄດ້ 208 ຄອບຄົວ, ຈັດສັນອາຊີບປູກຝັງ ແລະ ລ້ຽງສັດໄດ້ 150 ຄົນ.
ສໍາລັບປີ 2025 ນີ້, ແຂວງອຸດົມໄຊ ວາງຄາດໝາຍສ້າງຄອບຄົວພົ້ນທຸກໃໝ່ ໃຫ້ໄດ້ 3,699 ຄອບຄົວ ແລະ ບ້ານພົ້ນທຸກໃໝ່ ໃຫ້ໄດ້ 52 ບ້ານ (ເມືອງແບງ 16 ບ້ານ, ນາໝໍ້ 10 ບ້ານ, ເມືອງໄຊ 7 ບ້ານ, ເມືອງຫຼາ 6 ບ້ານ, ເມືອງຮຸນ 5 ບ້ານ, ປາກແບງ 5 ບ້ານ ແລະ ເມືອງງາ 3 ບ້ານ). ຮອດທ້າຍປີ 2025 ຄອບຄົວພົ້ນທຸກໃນທົ່ວແຂວງໃຫ້ມີ 44,479 ຄອບຄົວ, ກວມ 72.12% ຂອງຄອບຄົວທັງໝົດ ແລະ ບ້ານພົ້ນທຸກໃຫ້ມີ 336 ບ້ານ, ກວມ 72.10% ຂອງຈໍານວນບ້ານທັງໝົດ.
ແຫຼ່ງຂ່າວ: ວສລ