ພະແນກຕຳຫຼວດມອດໄຟ ປກສ ແຂວງຫຼວງນ້ຳທາ ລາຍງານເຫດການໄຟໄໝ້ ໂຮງງານຢາງຕີນລົດໃຫຍ່ເກົ່າ ຂອງບໍລິສັດແຫ່ງໜຶ່ງ ທີ່ຕັ້ງຢູ່ ບ້ານດອນມູນ, ເມືອງຫຼວງນ້ຳທາ, ແຂວງຫຼວງນ້ຳທາ ໃນວັນທີຄືນ ວັນທີ 2 ມັງກອນ 2025 ຜ່ານມາ, ເຮັດໃຫ້ໄດ້ຮັບຄວາມເສຍຫາຍລວມມູນຄ່າ 13 ຕື້ກວ່າກີບ.

ພາຍຫຼັງເກີດໄຟໄໝ້ ພະແນກຕໍາຫຼວດມອດໄຟ ປກສ ແຂວງຫຼວງນໍ້າທາ ກໍໄດ້ແຕ່ງຕັ້ງພະນັກງານວິຊະສະເພາະ ຈຳນວນ 13 ສະຫາຍ ພ້ອມລົດມອບໄຟ 4 ຄັນ ເຂົ້າດັບມອດໄຟ ເຊິ່ງໄດ້ໃຊ້ເວລາໃນການມອດ 16 ຊົ່ວໂມງ ຈຶ່ງສາມາດສະກັດກັ້ນມອດໄຟໄດ້.

ຕາມການລາຍງານຂອງຜູ້ເປັນຮຸ້ນສ່ວນ ເຊິ່ງໄດ້ນອນເຝົ້າໂຮງງານທີ່ເກີດເຫດໃນຄັ້ງນີ້ ໄດ້ໃຫ້ຮູ້ວ່າ: ໃນຄໍ່າຄືນທີ່ເກີດເຫດ ຜູ້ກ່ຽວນອນເຝົ້າ ແລະ ໄດ້ເຫັນໄຟໄໝ້ຢາງຕີນລົດໃຫຍ່ເກົ່າ ເຊິ່ງໄຟໄດ້ໄໝ້ຂະຫຍາຍເປັນວົງກວ້າງ ຈຶ່ງໄດ້ແຈ້ງຕໍ່ເຈົ້າໜ້າທີ່ ທີ່ກ່ຽວຂ້ອງມາຊ່ວຍດັບມອບໄຟ; ສຳລັບຜົນເສຍຫາຍໃນເບື້ອງຕົ້ນຄາດວ່າປະມານ 13 ຕື້ ກວ່າກີບ, ສ່ວນໂຮງງານ ແລະ ພະຫະນະ ແມ່ນທາງເຈົ້າໜ້າທີ່ ສາມາດສະກັດກັ້ນໄວ້ໄດ້ກ່ອນ, ປັດຈຸບັນ ທາງເຈົ້າໜ້າທີ່ ພວມເລັ່ງເກັບກຳຂໍ້ມູນຫຼັກຖານ ເພື່ອຊອກຫາສາເຫດທີ່ພາໃຫ້ເກີດອັກຄີໄພໃນຄັ້ງນີ້.