ທ່ານ ວຽງສາລີ ອິນທະພົມ ຫົວໜ້າພະແນກການເງິນ ນະຄອນຫຼວງວຽງຈັນ ( ນວ ) ໄດ້ຂຶ້ນລາຍງານ ໃນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ນະຄອນຫຼວງ ວຽງຈັນ ຊຸດທີ II ໃນຕອນເຊົ້າຂອງວັນທີ 17 ທັນວາ 2024 ວ່າ: ໃນປີ 2024 ສໍາລັບການປະຕິບັດມາດຕະການແກ້ໄຂ ຄວາມ ຫຍຸ້ງຍາກທາງດ້ານເສດຖະ ກິດໃຫ້ພະນັກງານລັດ, ທະຫານ, ຕໍາຫຼວດ ຢູ່ນະຄອນຫຼວງວຽງຈັນ ໂດຍອີງໃສ່ ມະຕິ ຂອງຄະນະປະຈໍາສະພານະຄອນຫຼວງວຽງຈັນ ຊຸດທີ II ວ່າດ້ວຍການຮັບຮອງແຜນ ການຈັດສັນແບ່ງປັນເງິນເກີນແຜນ ປີ 2023 ຂອງນະ ຄອນຫຼວງວຽງຈັນ ສະບັບເລກທີ 103/ຄປຈ.ສປນວ, ລົງວັນທີ 27 ສິງຫາ 2024 ໃນມາດຕາ I ຂໍ້ທີ່ 2 ກໍານົດຈັດສັນ ຈໍານວນ 50 ຕື້ກີບ ເພື່ອຊ່ວຍແກ້ໄຂຄວາມຫຍຸ້ງຍາກທາງດ້ານຊີວິການເປັນຢູ່ຂອງທະຫານ, ຕໍາຫຼວດ, ຄູ ແລະ ພະນັກງານ-ລັດຖະກອນ ທົ່ວນະຄອນຫຼວງວຽງຈັນ ໂດຍກໍານົດ : ຕໍາແໜ່ງບໍລິຫານລະດັບກາງ ( ປະເພດ 7 ) ຄົ້ນຄ້ວາຊ່ວຍໜູນ 400.000 ກີບ/ຄົນ/ເດືອນ, ຕໍາແໜ່ງບໍລິຫານລະດັບກາງ ( ປະເພດ 8 ) ຄົ້ນຄວ້າຊ່ວຍໜູນ 450.000 ກີບ/ຄົນ/ເດືອນ ແລະ ວິຊາການ ຄົ້ນຄວ້າຊ່ວຍໜູນ 500.000 ກີບ/ຄົນ/ເດືອນ.
ພະແນກການເງິນ ນະຄອນຫຼວງວຽງຈັນ ກໍ່ໄດ້ສົມທົບກັບບັນດາພະແນກການອ້ອມຂ້າງ, ກອງປັນຊາການຫະຫານ ນະຄອນ ຫຼວງວຽງຈັນ,ກອງປັນຊາການປ້ອງກັນຄວາມສະຫງົບ ນະຄອນ ຫຼວງວຽງຈັນ ເກັບກໍາສະຖີຕິຈໍານວນພົນພະນັດງານ-ລັດຖະ ກອນ ເຊິ່ງສາມາດ ສັງລວມທັງໝົດ 7.078 ທ່ານ, 53 ກົມກອງ ແລະ 4 ຂະແໜງຕຸລາການ ແລະ ອົງການກວດສອບ ດັ່ງນີ້:
– ພະແນກອ້ອມຂ້າງ ນະຄອນຫຼວງວຽງຈັນ 31 ພະແນກການ ຈໍານວນ 6.641 ທ່ານ ຄົ້ນຄວ້າງົບປະມານ ປະເພດ 7 ຈໍານວນ 5.304.000.000 ກີບ, ປະເພດ 8 ຈໍານວນ 4.887.000.000 ກີບ, ວິຊາການ 28.937.000.000 ກີບ ລວມ 39.128.000.000 ກີບ.
– ຄູອາສາສະໝັກ, ຄູນິຈະພັດ ( ສະເພາະສຶກສາ ) ຈໍານວນ 437 ທ່ານ ຄົ້ນຄວ້າງົບປະມານ ວິຊາການ 2.622.000.000 ກີບ
– ກອງບັນຊາການທະຫານ ນະຄອນຫຼວງວຽງຈັນ ຈໍານວນ 34 ກົມກອງ ຄົ້ນຄວ້າງົບປະມານ 4.250.000.000 ກີບ
– ກອງບັນຊາການປ້ອງກັນຄວາມສະຫງົບ ຈໍານວນ 19 ກົມກອງ ຄົ້ນຄວ້າງົບປະມານ 3.300.000.000 ກີບ
– ຂະແໜງຕຸລາການ ແລະ ອົງການກວດສອບ ຈໍານວນ 4 ຂະແໜງ ຄົ້ນຄວ້າງົບປະມານ 700.000.000 ກີບ
ຜ່ານການຈັດຕັ້ງປະຕິບັດຕົວຈິງ ສາມາດອະນຸມັດເບີກຈ່າຍແລ້ວ ຈໍານວນ 48.693.900.000 ກີບ ມີລາຍລະອຽດດັ່ງລຸ່ມນີ້ :
– ພະແນກອ້ອມຂ້າງ ນະຄອນຫຼວງວຽງຈັນ 31 ພະແນກການ 37.821.900.000 ກີບ
– ຄູອາສາສະໝັກ, ຄູນິຈະພັດ ( ສະເພາະສືກສາ ) 2.622.000.000 ກີບ
– ກອງບັນຊາການທະຫານ ນະຄອນຫຼວງວຽງຈັນ ຈໍານວນ 34 ກົມກອງ 4.250.000.000 ກີບ
– ກອງບັນຊາການປ້ອງກັນຄວາມສະຫງົບ ຈໍານວນ 19 ກົມກອງ 3.300.000.000 ກີບ
– ຂະແໜງຕຸລາການ ແລະ ອົງການກວດສອບ ຈໍານວນ 4 ຂະແໜງ 700.000.000 ກີບ
ຍັງເຫຼືອ ຈໍານວນ 1.306.100.000 ກີບ ແຮ່ໄວ້ແກ້ໄຂພະນັກງານຕົກເຮ່ຍ, ພະນັກ ງານ-ລັດຖະກອນ ຍົກຍ້າຍຊັບຊ້ອນໃຫມ່ ແລະ ຄອບຄົວພະນັກງານ-ລັດຖະກອນຂອງຄູ ແລະ ພະນັກ ງານ-ລັດຖະກອນ, ທະຫານ, ຕໍາຫຼວດ ທີ່ມີຄວາມຫຍຸ້ງຍາກຂາດ ເຂີນ.
ສຳລັບທິດທາງໃນປີ 2025 ເພື່ອເປັນການສືບຕໍ່ຊ່ວຍໜູນແກ້ໄຂບັນຫາຄວາມຫຍຸ້ງຍາກທາງດ້ານຊີວິດການເປັນຢູ່ ຂອງຄູ ແລະ ພະນັກງານ-ລັດຖະກອນ, ທະ ຫານ, ຕໍາຫຼວດ ແລະ ໄອຍະການ-ສານ ໃນປີ 2025 ພະແນກການເງິນ ນະຄອນຫຼວງວຽງຈັນ ກໍ່ໄດ້ຄົ້ນຄວ້າເບື້ອງຕົ້ນໃນການຈັດສັນງົບປະມານ ໄວ້ຈໍານວນ 50 ຕື້ກີບ ສ່ວນຫຼັກການໃນການຄົ້ນຄວ້າ: ສະເໜີພິຈາລະນາຄົ້ນຄວ້າໃຫ້ທຸກຕໍາແໜ່ງ ຂອງພະ ນັກງານ-ລັດຖະກອນ ຢູ່ນະຄອນຫຼວງວຽງຈັນ. ການຄົ້ນຄວ້ານະໂຍບາຍຊ່ວຍໜູນ ສະເໜີພິຈາລະນາ ຕາມເພດານເງິນເດຶອນທີ່ໄດ້ຮັບສຸດທິ ຂອງພະນັກງານ-ລັດຖະກອນ ລາຍລະອຽດດັ່ງນີ້.
1. ເງິນເດືອນ ຕໍ່າກວ່າ 1.700.000ກີບ/ເດືອນ ຄົ້ນຄວ້າຊ່ວຍໜູນ 500.000 ກີບ/ຄົນ/ເດືອນ
2. ເງິນເດືອນ 1.700.001–2.000.000 ກີບ/ເດືອນ ຄົ້ນຄວ້າຊ່ວຍໜູນ 400.000 ກີບ/ຄົນ/ ເດືອນ
3. ເງິນເດືອນ 2.000.001–2.500.000 ກີບ/ເດືອນ ຄົ້ນຄວ້າຊ່ວຍໜູນ 350.000 ກີບ/ຄົນ/ ເດືອນ
4. ເງິນເດືອນ 2.500.001–3.000.000 ກີບ/ເດືອນ ຄົ້ນຄວ້າຊ່ວຍໜູນ 300.000 ກີບ/ຄົນ/ ເດືອນ
5. ເງິນເດືອນຫຼາຍກວ່າ 3.500.000 ກີບ/ເດືອນ ຄົ້ນຄວ້າຊ່ວຍໜູນ 250.000 ກີບ/ຄົນ/ເດືອນ
ນີ້ແມ່ນການຄົ້ນຄວ້າເບື້ອງຕົ້ນ ໃນການຊ່ວຍໜູນ ພະນັກງານ-ລັດຖະກອນ ນະຄອນຫຼວງວຽງຈັນ ເພື່ອເຮັດໃຫ້ວຽກງານດັ່ງກ່າວ ສາມາດຈັດຕັ້ງ ແລະ ປະຕິບັດໄດ້ ຮຽນສະເໜີ ຄະນະປະຈໍາສະພານະຄອນຫຼວງ ວຽງຈັນ- ອົງການປົກຄອງນະຄອນ ຫຼວງວຽງຈັນ ຊ່ວຍພິຈາລະນາ ແລະ ໃຫ້ການຊີ້ນໍາໃນການຈັດຕັ້ງປະຕິບັດດ້ວຍ.
ຂ່າວ: ເສດຖະກິດ-ການຄ້າ