ພັທ ບົວທອງ ບໍລິບານ ຫົວໜ້າກອງບັນຊາການ ປກສ ເມືອງວັງວຽງ ແຂວງວຽງຈັນ ໄດ້ໃຫ້ສໍາພາດຕໍ່ສື່ມວນຊົນປ້ອງກັນຄວາມສະຫງົບ ໃນວັນທີ 25 ພະຈິກ 2024 ວ່າ: ການສືບສວນ-ສອບສວນ ກ່ຽວກັບເຫດການນັກທ່ອງທ່ຽວຕ່າງປະເທດ ເສຍຊີວິດຢູ່ເຮືອນພັກແຫ່ງໜຶ່ງຢູ່ເມືອງວັງວຽງ, ແຂວງວຽງຈັນ ໃນວັນທີ 12 ພະຈິກ 2024, ເຊິ່ງປັດຈຸບັນ ອົງການປົກຄອງ ເມືອງວັງວຽງ ແຂວງວຽງຈັນ ໄດ້ສົມທົບກັບກະຊວງ, ກົມ, ອົງການ ແລະ ພາກສ່ວນທີ່ກ່ຽວຂ້ອງ ລົງຊຸກຍູ້, ຕິດຕາມ, ກວດກາ ແລະ ເກັບກໍາຂໍ້ມູນ ກ່ຽວກັບເຫດການ, ສາເຫດໃນເບື້ອງຕົ້ນຂອງການເສຍຊີວິດນັກທ່ອງທ່ຽວຈໍານວນດັ່ງກ່າວຄາດວ່າ: ຍ້ອນການດື່ມສິ່ງມຶນເມົາຕ່າງໆ ເຮັດໃຫ້ມີຜູ້ເສຍຊີວິດ 3 ຄົນ.
ຜູ້ທີ 1 ເພດຊາຍ ເຊື້ອຊາດ-ສັນຊາດ ອາເມລິກາ, ອາຍຸ 57 ປີ ແລະ ອີກ 2 ຄົນ ແມ່ນເພດຍິງ ຄົນສັນຊາດ-ເຊື້ອຊາດ ເດັນມາກ, ອາຍຸ 20 ປີ ແລະ 21 ປີ ມີອາການສາຫັດ ໄດ້ສົ່ງໄປປິ່ນປົວຢູ່ໂຮງໝໍສູນກາງ ຢູ່ນະຄອນຫຼວງວຽງຈັນ ແລະ ໄດ້ເສຍຊີວິດໃນເວລາຕໍ່ມາ, ສ່ວນການສືບສວນ-ສອບສວນຫາສາເຫດທີ່ແທ້ຈິງນັ້ນແມ່ນຍັງຢູ່ໃນຂັ້ນຕອນຂອງການປະສານສົມທົບກັບກະຊວງ, ກົມ, ອົງການ ແລະ ພາກສ່ວນທີ່ກ່ຽວຂ້ອງເກັບກໍາຂໍ້ມູນ ແລະ ເກັບຕົວຢ່າງຕ່າງໆ, ເພື່ອຊອກຄົ້ນຫາຂໍ້ມູນຕ່າງໆ ທີ່ຍັງບໍ່ທັນຈະແຈ້ງກ່ຽວກັບເຫດການການເສຍຊີວິດ ຂອງນັກທ່ອງທ່ຽວຕ່າງປະເທດໃນຄັ້ງນີ້ໃຫ້ມີຄວາມຊັດເຈນໂດຍໄວ ບົນພື້ນຖານຂອງການກວດກາ, ຢັ້ງຢືນຜົນຂອງການວິໄຈທາງດ້ານວິທະຍາສາດ.
ສ່ວນເຮືອນພັກທີ່ເກີດເຫດດັ່ງກ່າວແມ່ນໄດ້ປິດການໃຫ້ບໍລິການ ແລະ ໄດ້ນໍາຕົວເປົ້າໝາຍຄື: ຜູ້ບໍລິຫານພາຍໃນໂຮງແຮມ ແລະ ກຳມະກອນຈໍານວນ 8 ຄົນ ມາກັກຕົວເພື່ອດໍາເນີນການສືບສວນ-ສອບສວນຕາມຂັ້ນຕອນກົດໝາຍຄື: ທ້າວ ເຢືອງວັນຮ່ວນ ອາຍຸ 34 ປີ, ອາຊີບນັກທຸລະກິດ; ທ້າວ ຫງຽງແມນຮຸ່ງ ອາຍຸ 38 ປີ ອາຊີບກຳມະກອນ; ທ້າວ ບູຍວັນດັດ ອາຍຸ 35 ປີ ອາຊີບ ກຳມະກອນ; ທ້າວ ຟາມດຶງຈິງ ອາຍຸ 42 ປີ ອາຊີບ ກຳມະກອນ;ທ້າວ ຈິກກັວກຕ່ວນ ອາຍຸ 23 ປີ ອາຊີບ ກໍາມະກອນ; ທ້າວ ເຢືອງດຶກຕ່ວນ ອາຍຸ 47 ປີ ອາຊີບ ກໍາມະກອນ; ທ້າວ ຫງຽງຊຸຍແອ້ງ ອາຍຸ 28 ປີ ອາຊີບກໍາມະກອນ ແລະ ທ້າວ ກວາງຊຸງ ອາຍຸ 44 ປີ ອາຊີບກໍາມະກອນ ທັງໝົດແມ່ນ ພັກເຊົາຢູ່ບ້ານວຽງແກ້ວ ເມືອງວັງວຽງ ແຂວງວຽງຈັນ.
ຂ່າວ: ວາລະສານປ້ອງກັນຄວາມສະຫງົບ