ການປັບປຸງ ແລະ ສ້ອມແປງເສັ້ນທາງ 13 ເໜືອ ແຕ່ເສັ້ນທາງເຂດບ້ານສີໄຄ, ເມືອງສີໂຄດຕະບອງ ຫາ ເຂດບ້ານສີເກີດ, ເມືອງນາຊາຍທອງ, ນະຄອນຫຼວງວຽງຈັນ. ມາຮອດປັດຈຸບັນມີຄວາມຄືບໜ້າແລ້ວ 66%, ຄາດວ່າຈະສ້າງໃຫ້ສຳເລັດຕາມແຜນການໃນເດືອນມີນາ 2025. ຂະນະທີ່ການປະຕິບັດບາງໜ້າວຽກຍັງພົບຄວາມຫຍຸ້ງຍາກ ເຮັດໃຫ້ດຳເນີນໂຄງການຫຼ້າຊ້າ ເປັນຕົ້ນມີລົດບັນທຸກໜັກ ແລະ ລົດປະເພດຕ່າງໆແລ່ນສວນທາງຜ່ານໄປມາຈຳນວນຫຼາຍ ເຮັດໃຫ້ກີດຂວາງດຳເນີນການກໍ່ສ້າງ ພ້ອມການຍົກຍ້າຍລະບົບສາທາລະນຸປະໂພກຕ່າງໆ ແລະ ອື່ນໆ.
ທ່ານ ລັດສະໝີ ອາລິຍະວົງສິງ ຫົວໜ້າໂຄງການປັບປຸງສ້ອມ ແປງເສັ້ນທາງສີໄຄ-ສີເກີດ ໃຫ້ສຳພາດໃນໂອກາດທີ່ ທ່ານ ລິດຕາ ຂັດທິຍະ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ແລະ ທ່ານ ບຸນຍະວັດ ນິລະໄຊ ຫົວຫນ້າພະແນກ ຍທຂ ນວ ພ້ອມຄະນະ ແລະ ພາກສ່ວນກ່ຽວຂ້ອງ ລົງຕິດຕາມກວດກາຄວາມຄືບໜ້າການກໍ່ສ້າງໂຄງການດັ່ງກ່າວ ໃນວັນທີ 23 ຕຸລາ 2024 ວ່າ:
ຮູບແບບການກໍ່ສ້າງປັບປຸງ ແລະ ສ້ອມແປງເສັ້ນທາງເລກ 13 ເໜືອ ໄລຍະທາງແຕ່ສີໄຄ-ສີເກີດ ແມ່ນໄດ້ຈັດຕັ້ງປະຕິບັດການຂະຫຍາຍໜ້າທາງເກົ່າອອກສອງຂ້າງທາງຈາກ 2 ເລນ ເປັນ 4 ເລນ ມີໜ້າທາງກວ້າງ 23 ແມັດ ລວມທັງທາງຍ່າງດອນກາງທາງ ແລະ ຮ່ອງນໍ້າໂຕ U ມີຝາປິດ ທັງສອງເບື້ອງຂອງໜ້າທາງ ຍົກເວັ້ນບາງຈຸດທີ່ມີພື້ນທີ່ຈໍາກັດ ເຊັ່ນ: ຕະຫຼາດສີໄຄ, ແຍກວັດນາແຮ່, ແຍກໜອງແຕ່ງ, ເຂດຕະຫຼາດອົກຊີ, ເຊິ່ງມີຄວາມຍາວທັງໝົດ 6 ກວ່າກິໂລແມັດ.
ຜ່ານການຈັດຕັ້ງປະຕິບັດໂຄງການ ໄລຍະຜ່ານມາໃນແຕ່ລະໜ້າວຽກ ມາຮອດປັດຈຸບັນໂຄງການມີຄວາມຄືບໜ້າແລ້ວ 66% ແລະ ໂຄງການກຳລັງເລັ່ງກໍ່ສ້າງຄອງນໍ້າແຄມທາງ ຍັງເຫຼືອປະມານ 900 ແມັດ ຄາດວ່າຈະໃຫ້ສໍາເລັດພາຍໃນທ້າຍເດືອນຕຸລາ 2024 ສ່ວນການເທເບຕົງໜ້າທາງ ແມ່ນປະຕິບັດໄດ້ປະມານ 35% ພ້ອມໜ້າວຽກອື່ນໆຄາດວ່າຈະສໍາເລັດພາຍໃນເດືອນມັງກອນ 2025 ພ້ອມນີ້ໂຄງການຍັງໄດ້ເລັ່ງຈັດຕັ້ງປະຕິບັດໜ້າວຽກຕ່າງໆເພື່ອໃຫ້ໂຄງການນີ້ສໍາເລັດຕາມແຜນການ.
ທ່ານໃຫ້ຮູ້ຕື່ມວ່າ: ຜ່ານການປະຕິບັດຕົວຈິງ ບາງໜ້າວຽກຍັງພົບຄວາມຫຍຸ້ງຍາກເຮັດໃຫ້ໂຄງການມີຄວາມຊັກຊ້າ ເປັນຕົ້ນເສັ້ນທາງນີ້ເປັນທາງສາຍຫຼັກ ເປັນເຂດຊຸມຊົນໜາແໜ້ນເຊັ່ນ: ຕະຫຼາດ, ໂຮງຮຽນ, ໂຮງໝໍ, ຮ້ານຄ້າຂາຍ ແລະ ເຮັດທຸລະກິດລຽບຕາມຂ້າງທາງ ມີລົດບັນທຸກໜັກແລ່ນສວນທຽວທາງຜ່ານໄປມາ, ເຮັດໃຫ້ກີດຂວາງການກໍ່ສ້າງ ລະດູຝົນແກ່ຍາວ ການຍົກຍ້າຍລະບົບສາທາລະນຸປະໂພກລ່າຊ້າ ແລະ ບໍ່ໄດ້ຕາມແຜນເບື້ອງຕົ້ນ, ມາຮອດປັດຈຸບັນ ສະເລ່ຍລວມໄດ້ປະມານ 90% (ສໍາລັບເສົາໄຟຟ້າ ຍ້າຍສໍາເລັດ), ພ້ອມນີ້ຍັງໄດ້ແກ້ໄຂລວງຄອງລະບາຍນໍ້າເກົ່າ ປ້ອງກັນນໍ້າຖ້ວມ ລວມທັງລວງຄອງຊົນລະປະທານ ແກ້ໄຂສ້ອມ ແປງເສັ້ນທາງ ຮັບໃຊ້ການສັນຈອນ ມີການສະເໜີຫຼາຍຈາກປະຊາຊົນ ແລະ ຜູ້ນຳໃຊ້ທາງ ຕໍ່ກັບ ຂີ້ຝຸ່ນໄຫງ່ ທາງເຂົ້າເຮືອນມີຂີ້ຕົມ, ນໍ້າປະປາ, ຕັດຂາດ ທາງຊອຍເຂົ້າບ້ານ ແລະ ອື່ນໆ.
ຂ່າວ: ວສລ