ວັນທີ 22 ຕຸລາ 2024 ນີ້, ໂຄງການເກັບກູ້ລະເບີດແຂວງຫົວພັນໄດ້ລົງພື້ນທີ່ທຳລາຍບົມໃຫຍ່ 750 ປອນ ຢູ່ບ້ານໂພນທອງ ເມືອງວຽງໄຊ. ໂດຍການຊີ້ນໍາຂອງທ່ານ ພັນຕາ ທອນວົງສາ ກຳມະການພັກແຂວງ, ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ຮອງປະທານຄະນະກຳມະການແຫ່ງຊາດວ່າດ້ວຍການແກ້ໄຂບັນຫາລະເບີດບໍ່ທັນແຕກຢູ່ແຂວງຫົວພັນ, ທ່ານ ມາກ ລັດເຊວ ຊ່ຽວຊານທີ່ປຶກສາປະຈໍາ TT ຜູ້ໃຫ້ທຶນໃນຄັ້ງນີ້, ມີບັນດາທ່ານຄະນະຊ່ຽວຊານມາຈາກໂຄງການເກັບກູ້ລະເບີດແຫ່ງຊາດ, ໂຄງການເກັບກູ້ລະເບີດປະຈໍາແຂວງຫົວພັນ, ພາກສ່ວນທີ່ກ່ຽວຂ້ອງຂັ້ນແຂວງ, ເມືອງວຽງໄຊ ແລະ ອຳນາດການປົກຄອງບ້ານໂພນທອງເຂົ້າຮ່ວມ.
ການທຳລາຍບົມໃຫຍ່ 750 ປອນໃນຄັ້ງນີ້ແມ່ນນໍາໃຊ້ກະສອບຊາຍ 6.000 ກະສອບ, ດິນຊາຍຈໍານວນ 200 ໂຕນ, ວາງອ້ອມຮອບ 360 ອົງສາ, ຂຸດຂຸມເລິກ 5 ແມັດ. ການຈັດຕັ້ງປະຕິບັດແມ່ນໄດ້ຕັດຟີວບົມຢູ່ສະຖານທີ່ຂົ້ວບ້ານໂພນທອງຈຸດທີ່ພົບເຫັນບົມແລ້ວເຄື່ອນຍ້າຍຈາກບ່ອນດັ່ງກ່າວໄປທຳລາຍຢູ່ຈຸດທີ່ໂຄງການເກັບກູ້ລະເບີດແຂວງຫົວພັນໄດ້ກຳນົດໄວ້ ຊຶງຫ່າງຈາກບ້ານໂພນທອງປະມານ 4 ກິໂລແມັດ.
ປະຈຸບັນ, ການທຳລາຍບົມໃຫຍ່ 750 ປອນ ແມ່ນສຳເລັດ ຕາມແຜນທີ່ໄດ້ກຳນົດໄວ້ ແລະ ພໍ່ແມ່ປະຊາຊົນທຸກຄົນພາຍໃນບ້ານມີຄວາມປອດໄພ. ເນື່ອງຈາກການຈັດຕັ້ງປະຕິບັດໄດ້ມີການວາງແຜນ ແຕ່ງຕັ້ງຄະນະຮັບຜິດຊອບຂັ້ນແຂວງ, ຂັ້ນເມືອງ, ອຳນາດການປົກຄອງບ້ານ ແລະ ພໍ່ແມ່ປະຊາຊົນພາຍໃນບ້ານມີສ່ວນຮ່ວມບວກໃສ່ເຕັກນິກຂອງຊ່ຽວຊານທີ່ປະຕິບັດຕາມມາດຖານການແກ້ໄຂລະເບີດບໍ່ທັນແຕກ.
ຂ່າວ: ຂ່າວຫົວພັນ