ໂຄງການມອບທຶນການສຶກສາ SCG Sharing the Dream ເລີ້ມຈັດຕັ້ງປະຕິບັດໂຄງການຄັ້ງທຳອິດຢູ່ປະເທດໄທ
ແລະ ຂະຫຍາຍອອກໄປປະເທດອື່ນໆໃນອາຊຽນ ໄດ້ແກ່ ສສ ຫວຽດນາມ ຟີລິປິນ ອິນໂດເນເຊຍ ມຽນມາ ແລະ
ສປປ ລາວ ປັດຈຸບັນ ໂຄງການໄດ້ມອບທຶນການສຶກສາໃຫ້ນັກຮຽນປີລະກວ່າ 5.000 ຄົນ ໃນພູມມີພາກອາຊຽນ.
ສະເພາະຢູ່ລາວ ໄດ້ດຳເນີນໂຄງການມາແຕ່ສົກຮຽນ 2012-2013 ເປັນຕົ້ນມາ ສະເພາະສົກຮຽນນີ້ ແມ່ນເປັນຄັ້ງ
ທີ 3 ຮູບແບບໃນການມອບທຶນແມ່ນມອບ ໃຫ້ນັກຮຽນລະດັບມັດທະຍົມສຶກສາຕອນປາຍ ຈັດກິດຈະກຳຄວບຄູ່
ກັບການມອບທຶນການສຶກສາ ເພື່ອປູກຈິດສຳນຶກໃຫ້ແກ່ເດັກນັກຮຽນເປັນຄົນດີຂອງສັງຄົມ ດຳເນີນໂຄງການ
ຮ່ວມກັບອົງກອນພັດທະນາສັກກາຍະພາບເຍົາວະຊົນ ຄືສະມາຄົມຮ່ວມນ້ຳໃຈກັບເດັກນ້ອຍລາວ Action with
Lao Children (ALC).
ຂັ້ນຕອນໃນການຄັດເລືອກເອສຊີຈີ ໄດ້ປະກາດຮັບສະໝັກຜ່ານສື່ມວນຊົນ ແລະ ໜ່ວຍງານທີ່ກ່ຽວຂ້ອງ ເພື່ອ
ໄດ້ຮ່ວມກັນຄັດເລືອກຈາກໃບສະໝັກຂອງນັກຮຽນ 52 ໂຮງຮຽນຈາກ 9 ເມືອງ ໃນຈຳນວນ 180 ຄົນ ແລ້ວຈຶ່ງ
ດຳເນີນການສຳພາດ ແລະ ຢ້ຽມຢາມນັກຮຽນທັງໝົດແລ້ວ ຈຶ່ງນຳເອົາຜົນມາປຶກສາຫາລືຮ່ວມກັນ ກ່ອນປະ
ກາດຜົນໃຫ້ນັກຮຽນທີ່ຜ່ານການຄັດເລືອກ ຈຳນວນ 150 ຄົນ ເພື່ອດຳເນີນການມອບທຶນການສຶກສາໃຫ້ໃນວັນ
ທີ 15 ທັນວາ 2014 ທີ່ມະຫາວິທະຍາໄລແຫ່ງຊາດ ພິເສດໃນປີນີ້ ໂຄງການໄດ້ມອບທຶນຊຸກຍູ້ໃຫ້ນັກຮຽນຜູ້ທີ່ເຄີຍ
ໄດ້ຮັບທຶນ ແລະ ມີຜົນງານດີເດັ່ນທາງດ້ານກີລາ ສີລະປະ ແລະ ວັນນະກຳຈຳນວນ 13 ຄົນນຳອີກ.
ເປັນກຽດເຂົ້າຮ່ວມງານຄັ້ງນີ້ ມີທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີຊ່ວຍວ່າການ ກະຊວງສຶກສາ
ທິການ ແລະ ກີລາ ທ່ານເອກອັກຄະລາຊະທູດໄທ ປະຈຳລາວ ທ່ານຮອງປະທານບໍລິສັດ ເອສຊີຈີ ພ້ອມດ້ວຍຄະ
ນະຜູ້ບໍລິຫານເອສຊີຈີ ພະນັກງານຄູ-ອາຈານ ແລະ ພາກສ່ວນກ່ຽວຂ້ອງເຂົ້າຮ່ວມ.
ແຫລ່ງຂ່າວ: ວຽງຈັນໃໝ່