ໃນວັນທີ 11 ຕຸລາ 2024, ທ່ານ ຈັສຕິນ ທຣູໂດ, ນາຍົກລັດຖະມົນຕີການາດາ ໄດ້ເດີນທາງຢ້ຽມຢາມສໍານັກງານໃຫຍ່ຂອງຄະນະກໍາມາທິການແມ່ນໍ້າຂອງສາກົນ ຢ່າງເປັນທາງການ, ທີ່ນະຄອນຫຼວງວຽງຈັນ, ເຊິ່ງຖືວ່າເປັນຫົວຫນ້າລັດຖະບານຜູ້ທໍາອິດຈາກຄູ່ຮ່ວມພັດທະນາ ຂອງ ຄະນະກໍາມາທິການແມ່ນໍ້າຂອງສາກົນ ທີ່ໄດ້ມາຢ້ຽມຢາມສຳນັກງານໃນຄັ້ງນີ້.
ໃນລະຫວ່າງການຢ້ຽມຢາມ ທ່ານນາຍົກລັດຖະມົນຕີ ຈັສຕິນ ທຣູໂດ ພ້ອມກັບທ່ານນາງ ແມຣີ ອິງ, ລັດຖະມົນຕີວ່າການກະຊວງສົ່ງເສີມການສົ່ງອອກ, ການຄ້າສາກົນ ແລະ ການພັດທະນາເສດຖະກິດ ແລະ ທ່ານ ປອ. ອານຸລັກ ກິດຕິຄຸນ, ຫົວຫນ້າກອງເລຂາ ຄະນະກໍາມາທິການແມ່ນໍ້າຂອງສາກົນ ໄດ້ພົບປະ, ສົນທະນາ ແລະ ແລກປ່ຽນກັບຊາວປະມົງ ແລະ ຊາວກະສິກອນ ກ່ຽວກັບສິ່ງທ້າທາຍທີ່ເຂົາເຈົ້າປະເຊີນ ຍ້ອນການປ່ຽນແປງຂອງດິນຟ້າອາກາດ ແລະ ສິ່ງແວດລ້ອມ ລວມທັງບັນຫາການຄຸ້ມຄອງນໍ້າຂ້າມຊາຍແດນ.
ໃນໄລຍະຜ່ານມາ ການາດາ ສ້າງການເປັນຄູ່ຮ່ວມມືພັດທະນາຢ່າງເປັນທາງການ ກັບຄະນະກຳມາທິການແມ່ນ້ຳຂອງສາກົນ, ໂດຍການປະກອບສ່ວນເງິນຈຳນວນ 2 ລ້ານໂດລາການາດາ (ປະມານ 1,5 ລ້ານໂດລາສະຫະລັດ) , ເງິນສະໜັບສະໜູນດັ່ງກ່າວ ມີເປົ້າໝາຍນໍາໃຊ້ກັບການຄຸ້ມຄອງນ້ຳຂ້າມຜ່ານຊາຍແດນ, ການຕິດຕາມ ແລະ ການພະຍາກອນແມ່ນໍ້າ.
ທ່ານ ປອ. ອານຸລັກ ກິດຕິຄຸນ, ຫົວຫນ້າກອງເລຂາ ຄະນະກໍາມາທິການແມ່ນໍ້າຂອງສາກົນ ໄດ້ກ່າວວ່າ “ພວກເຮົາຮູ້ສຶກເປັນກຽດທີ່ໄດ້ຕ້ອນຮັບການຢ້ຽມຢາມຂອງ ທ່ານນາຍົກລັດຖະມົນຕີ ຈັສຕິນ ທຣູໂດ, ເຊິ່ງເປັນການສ້າງປະຫວັດສາດໜ້າໃໝ່ໃນການຮ່ວມມືຂອງພວກເຮົາ ກັບ ການາດາ, ການຊ່ວຍເຫຼືອຂອງການາດາ ເກີດຂຶ້ນໃນໄລຍະທີ່ພວກເຮົາເພີ່ມທະວີຄວາມພະຍາຍາມໃນການຄຸ້ມຄອງຊັບພະຍາກອນນ້ຳ ຂອງແມ່ນໍ້າຂອງ ເພື່ອຜົນປະໂຫຍດສູງສຸດຂອງປະຊາຊົນໃນພາກພື້ນ”
ຂ່າວ: Mekong River Commission