ໃນກາງເດືອນສິງຫາ-ທ້າຍເດືອນກັນຍາ 2024, ໄດ້ມີຝົນຕົກໜັກຕິດຕໍ່ກັນຫຼາຍວັນ, ເຊິ່ງໄດ້ເຮັດໃຫ້ບັນດາເສັ້ນທາງຄົມມະນາຄົມພາຍໃນແຂວງຫົວພັນ ຖືກຜົນກະທົບຈາກໄພພິບັດທໍາມະຊາດ, ໂດຍສະເພາະແມ່ນ 9 ເມືອງຂອງແຂວງຄື: ເມືອງຊໍາເໜືອ, ເມືອງຮ້ຽມ, ເມືອງຊ່ອນ, ເມືອງຫົວເມືອງ, ເມືອງຊໍາໃຕ້, ເມືອງກວັນ, ເມືອງສົບເບົາ, ເມືອງແອດ ແລະ ເມືອງວຽງໄຊ.
ເຊິ່ງໄດ້ເຮັດໃຫ້ບາງເສັ້ນທາງເປ່ເພ ແລະ ຖືກຕັດຂາດ ເປັນຕົ້ນແມ່ນດິນຫຍຸບ, ດິນເຊາະເຈື່ອນ, ຕົ້ນໄມ້ຫັກທັບຖົມເສັ້ນທາງ, ເສັ້ນທາງທີ່ຖືກຜົນກະທົບທັງໝົດ 34 ເສັ້ນ, ມີ 1900 ກວ່າກິໂລແມັດ, ໃນນີ້ເສັ້ນທາງຫຼວງແຫ່ງຊາດ 9 ເສັ້ນ ເສຍຫາຍ 516 ກິໂລແມັດ, ເສັ້ນທາງຫຼວງຂອງແຂວງ 9 ເສັ້ນ ເສຍຫາຍ 576 ກິໂລແມັດ, ທາງຫຼວງເມືອງ 10 ເສັ້ນ 538 ກິໂລແມັດ, ເສັ້ນທາງຊົນນະບົດ 5 ເສັ້ນ 227 ກິໂລແມັດ, ເສັ້ນທາງຕົວເມືອງ 1 ເສັ້ນ 60 ກວ່າກິໂລແມັດ.
ນອກຈາກນີ້, ຍັງມີຂົວອູ່ 3 ຈຸດ ແລະ ລະບົບນໍ້າປະປາເມືອງຊ່ອນ ເປ່ເພ ເຊິ່ງມີຜົນເສຍຫາຍທັງໝົດ 53 ຕື້ 9 ຮ້ອຍລ້ານກວ່າກີບ, ມາຮອດປັດຈຸບັນນີ້ພາກສ່ວນທີ່ກ່ຽວຂ້ອງຂັ້ນແຂວງ ສົມທົບກັບພາກສ່ວນທີ່ກ່ຽວຂ້ອງຂັ້ນເມືອງ ໄດ້ເອົາໃຈໃສ່ເລັ່ງແກ້ໄຂສຸກເສີນແຕ່ລະເສັ້ນທາງສໍາເລັດແລ້ວຈໍນວນໜຶ່ງ ເພື່ອເຮັດໃຫ້ການສັນຈອນໄປມາແຕ່ລະເສັ້ນທາງໃຫ້ມີຄວາມສະດວກ.
ຂ່າວ: ວສລ