ເປີດສາກແລ້ວຂຶ້ນແລ້ວ ການແຂ່ງຂັນກິລາບານສົ່ງໃນຮົ່ມ ຊາຍ-ຍິງ 2024 ຫຼື ງານແຂ່ງຂັນກິລາບານສົ່ງລາວລີກ ລາຍການ “BEER Laos Volleyball League 2024” ໃນຕອນແລງວັນທີ 28 ກັນຍາ 2024 ທີ່ເດີ່ນບານສົ່ງໃນຮົ່ມກອງທັບ (ຫຼັກ 5) ບ້ານຈອມມະນີ ເມືອງໄຊນານີ ນະຄອນຫຼວງວຽງຈັນ ໂດຍມີ ທ່ານ ຮສ.ປອ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ຫຼື ສສກ ປະທານຄະນະກຳມະການໂອແລມປິກແຫ່ງຊາດລາວ, ທ່ານ ແສງພອນ ພົມອາມາດ ຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ, ທ່ານ ພອນ ບາດແມນ (Paul BARTMAN) ຜູ້ອຳນວຍການຝ່າຍຂາຍ ແລະ ຊ່ອງທາງການຈັດຈຳໜ່າຍ ບໍລິສັດ ເບຍລາວ ຈຳກັດ ແລະ ທ່ານ ຈັນສະໝອນ ຜ່ອງຈັນທາ ປະທານສະຫະພັນບານສົ່ງແຫ່ງຊາດລາວ ຫຼື ສບສ ພ້ອມດ້ວຍຄະນະບໍລິຫານງານ ສບສ, ຄະນະນຳ, ຄູຝຶກ ແລະ ນັກກິລາເຂົ້າຮ່ວມ.
ລາຍການນີ້ ຈັດຂຶ້ນເພື່ອສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນຊາດທີ 2 ທັນວາ ຄົບຮອບ 49 ປີ ພ້ອມທັງສືບຕໍ່ພັດທະນາກິລາບານສົ່ງຂອງສປປ ລາວ ໃຫ້ມີຂະບວນການຝຶກຊ້ອມ ແລະ ແຂ່ງຂັນຢ່າງກວ້າງຂວາງ ແລະ ຕໍ່ເນື່ອງ ທັງນີ້ ກໍເພື່ອຍົກລະດັບ ແລະ ພັດທະນາຄວາມສາມາດຂອງນັກກິລາ, ຄະນະກຳມະການເຕັກນິກຈັດການແຂ່ງຂັນ ແລະ ກຳມະການຕັດສິນກິລາບານສົ່ງຂອງລາວເຮົາໃຫ້ມີຄຸນນະພາບສູງຂຶ້ນກ້າວສູ່ສາກົນ.
ອີກດ້ານໜຶ່ງ ກໍເພື່ອເປັນການຄັດເລືອກນັກກິລາບານສົ່ງຊາຍ-ຍິງ ຜູ້ທີ່ມີພອນສະຫວັນ ເພື່ອເຂົ້າຝຶກຊ້ອມ ບັນຈຸເຂົ້າເປັນນັກກິລາທີມຊາດລາວ ກຽມເຂົ້າຮ່ວມການແຂ່ງຂັນ ຊີເກມ ຄັ້ງທີ 33 ທີ່ປະເທດໄທ ຈະເປັນເຈົ້າພາບ ໃນປີ 2025 ແລະ ລາຍການຕ່າງໆລະດັບພາກພື້ນ ແລະ ສາກົນ ຊຶ່ງປີນີ້ ມີທີມນັກກິລາເຂົ້າຮ່ວມແຂ່ງຂັນທັງໝົດ 15 ທີມ, ໃນນັ້ນ ເພດຍິງມີທັງໝົດ 5 ທີມ ແລະ ທີມຊາຍ 10 ທີມ.
ສໍາລັບທີມຊາຍມີຄື: ນະຄອນຫຼວງວຽງຈັນ by INTHASONE, ສະໂມສອນ ກະຊວງປ້ອງກັນປະເທດ ຫຼື ກອງທັບ, ສະໂມສອນ ວຽງຈັນ, ສະໂມສອນ ລາວສະກາຍເວ (Lao Skyway), ສະໂມສອນ ໂກຣ-ອັບ (GROW-UP), ສະໂມສອນ ອິນເທັນເຊິນ (INTENTION), ສະໂມສອນ ເອັມພີຊີ (MPC BLUE HAWAII), ສະໂມສອນ ເອັດອີຊີ (SEC), ສະໂມສອນ ແບຼັກ ບັດເຕີຟາຍ (BLACK BUTTERFLY) ແລະ ສະໂມສອນ ສັນນິວາດ (SUNNIVAD). ສ່ວນທີມຍິງມີ 5 ທີມ ຄື: ສະໂມສອນກົມໃຫຍ່ການເມືອງ ກອງທັບ, ສະໂມສອນ ກະຊວງປ້ອງກັນປະເທດ, ສະໂມສອນ ວຽງຈັນ, ສະໂມສອນ ເອັດອີຊີ (S.E.C) ແລະ ສະໂມສອນ ເອັດເອັນເຄ ໄຊເຊດຖາ (SNK Saysettha).
ສຳລັບຮູບແບບການແຂ່ງຂັນທັງສອງລາຍການແມ່ນນຳໃຊ້ລະບົບແບບລີກ ແຂ່ງຂັນພົບຄົບໝົດ ໃນຮອບຂາໄປ ແຂ່ງຂັນສະເພາະແຕ່ວັນເສົາ ແລະ ວັນອາທິດ, ໂດຍການແຂ່ງຂັນ ຈະດຳເນີນຈົນໄປຮອດວັນທີ 10 ພະຈິກ 2024 ສໍາເລັດແຂ່ງຂັນ.