ໃນຕອນເຊົ້າຂອງວັນທີ 30 ກັນຍາ 2024, ທ່ານ ໄຊຊະນະ ໂຄດພູທອນ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບ ທ່ານ ນາງ ຢາມິລາ ເປນາ ໂອເຈດາ (Mrs. Yamila Pena Ojeda) ກໍາມະການສູນກາງພັກກອມ ມູນິດ ຫົວໜ້າອົງການໄອຍະການສູງສຸດ ແຫ່ງ ສາທາລະນະລັດ ກູບາ ໂດຍມີຄະນະຜູ້ແທນຂັ້ນສູງທັງສອງຝ່າຍເຂົ້າຮ່ວມໃນຄັ້ງນີ້.
ທ່ານ ໄຊຊະນະ ໂຄດພູທອນ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຂອບໃຈເປັນຢ່າງສູງຕໍ່ການມາຢ້ຽມຢາມ ແລະ ເຮັດວຽກຢ່າງເປັນທາງການ ຂອງທ່ານຫົວໜ້າອົງການໄອຍະການສູງສຸດ ແຫ່ງ ສ.ກູບາ ພ້ອມດ້ວຍຄະນະໃນຄັ້ງນີ້, ພ້ອມຕີລາຄາສູງຕໍ່ຜົນສໍາເລັດຂອງການຮ່ວມມືລະຫວ່າງອົງການໄອຍະການຂອງສອງປະເທດ ໃນການຈັດຕັ້ງປະຕິບັດບົດບັນທຶກຮ່ວມ ທີ່ໄດ້ລົງນາມກັນໃນປີ 2018 ທີ່ນະຄອນຫຼວງຮາວານາ ປະເທດກູບາ, ການພົບປະຂອງຄະນະຜູ້ແທນຂັ້ນສູງຂອງສອງອົງການໃນຄັ້ງນີ້ ແມ່ນເພື່ອຍົກລະດັບການຮ່ວມມືຂອງສອງອົງການໄອຍະການ ໃຫ້ນັບມື້ນັບເຂົ້າສູ່ລວງເລິກ ແລະ ເກີດດອກອອກຜົນໃນອະນາຄົດ.
ຈາກນັ້ນ, ທ່ານ ນາງ ຢາມິລາ ເປນາ ໂອເຈດາ ໄດ້ສະແດງຄວາມຂອບໃຈ ທີ່ໄດ້ຮັບການເຊື້ອເຊີນ ແລະ ຮັບຕ້ອນຢ່າງອົບອຸ່ນຖານມິດສະຫາຍທີ່ເປັນກັນເອງ ໃນການມາເຄື່ອນໄຫວວຽກງານທາງການ ຢູ່ ສປປ ລາວ, ພ້ອມທັງຕົກລົງເຫັນດີເປັນເອກະພາບລົງນາມບົດບັນທຶກຊ່ວຍຈໍາ ກ່ຽວກັບແຜນກິດຈະກຳຮ່ວມມື ສົກປີ 2025-2026.
ການຢ້ຽມຢາມ ແລະ ພົບປະຂອງຄະນະຜູ້ແທນໃນຄັ້ງນີ້ ເປັນພື້ນຖານສໍາຄັນທີ່ເຮັດໃຫ້ວຽກງານໄອຍະການຂອງສອງປະເທດ ໄດ້ຮັບການພັດທະນາ, ຍົກສູງບົດບາດຄວາມສັກສິດຂອງກົດໝາຍ ໃນການຄຸ້ມຄອງລັດຄຸ້ມຄອງສັງຄົມຂອງສອງປະເທດ ຕ້ານອາດຊະຍາກຳຂ້າມຊາດ, ພ້ອມທັງເປັນການເສີມຂະຫຍາຍສາຍພົວພັນການຮ່ວມມື ລະຫວ່າງ ສອງປະເທດ ລາວ-ກູບາ.
ຫຼັງຈາກນັ້ນ, ຄະນະນໍາສອງຝ່າຍໄດ້ພ້ອມກັນລົງນາມບົດບັນທຶກຊ່ວຍຈໍາ ກ່ຽວກັບແຜນກິດຈະກຳຮ່ວມມື ສົກປີ 2025-2026, ຊຶ່ງມີບາງເນື້ອໃນຕົ້ນຕໍຄື: 1. ການແລກປ່ຽນໄປມາຢ້ຽມຢາມຄະນະຜູ້ແທນສອງອົງການໄອຍະການເຊິ່ງກັນ ແລະກັນ, 2. ເຂົ້າຮ່ວມກອງປະຊຸມນານາຊາດວ່າດ້ວຍ ອາຊະຍາກຳ ຄັ້ງທີ 16 ປະຈຳປີ 2025 ແລະ ກອງປະຊຸມກ່ຽວກັບນິຕິກຳ, ກົດໝາຍ ແລະ ສັງຄົມ ຄັ້ງທີ 4 ທີ່ ສ.ກູບາ, 3. ຈັດກອງປະຊຸມທາງໄກເພື່ອແລກປ່ຽນບົດຮຽນ ແລະ ຂໍ້ມູນຂ່າວສານກ່ຽວກັບຂໍ້ຕ່າງໆເຊັ່ນ: ການຕ້ານອາຊະຍາກຳທີ່ເກີດຂຶ້ນຈາກການນໍາໃຊ້ເຕັກໂນໂລຊີ ແລະ ການສື່ສານ, ການຕ້ານການຄ້າມະນຸດ ແລະ ການເຄື່ອນຍ້າຍແຮງງານ ແລະ ບັນຫາອື່ນທີ່ສອງຝ່າຍມີຄວາມສົນໃຈ.
ຂ່າວ: ວສລ