ໃນວັນທີ 13 ກັນຍາ ທີ່ຜ່ານມານີ້, ເຈົ້າໜ້າທີ່ ປກສ ເມືອງຊຳໃຕ້ ໄດ້ອອກກວດກາການສັນຈອນ ຕາມສາຍທາງ ເສັ້ນທາງຊຳໃຕ້ ຫາ ດ່ານທ່າເຫຼົ້າ ໄດ້ພົບເຫັນທ້າວ ຈັນພອນ ອາຍຸ 72 ປີ, ປະຊາຊົນ, ຢູ່ບ້ານປາວເໜືອ, ເມືອງຊຳໃຕ້, ແຂວງຫົວພັນ ຂັບຂີ່ລົດຈັກຍີ່ຫໍ້ຮອນດາ, ສີດຳ, ປ້າຍທະບຽນ ຫົວພັນ ຈຄ 4849 ມາແຕ່ທາງຕົວເມືອງຊຳໃຕ້, ເຈົ້າໜ້າທີ່ຈຶ່ງໄດ້ລັດລົດຈັກຂອງຜູ້ກ່ຽວເພື່ອຂໍອະນຸຍາດກວດຄົ້ນ.
ຜ່ານກວດກາ ໄດ້ພົບເຫັນຢາເສບຕິດປະເພດຢາບ້າຈຳນວນ 10 ຖົງ ເທົ່າກັບ 1874 ເມັດ, ທີ່ຊຸກເຊື່ອງໄວ້ຢູ່ໂກບໜ້າຂອງລົດຈັກ, ຈາກນັ້ນ ເຈົ້າໜ້າທີ່ຈຶ່ງໄດ້ກັກຕົວຜູ້ກ່ຽວມາທີ່ ກອງບັນຊາການ ປກສ ເມືອງຊຳໃຕ້, ເພື່ອສືບສວນ-ສອບສວນເອົາຂໍ້ມູນ. ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ຈັນພອນ ໄດ້ຮັບສາລະພາບວ່າ: ຢາເສບຕິດປະເພດຢາບ້າຈຳນວນດັ່ງກ່າວ ທີ່ເຈົ້າໜ້າທີ່ກວດກາພົບເຫັນນັ້ນເປັນຂອງຜູ້ກ່ຽວແທ້, ເຊິ່ງຜູ້ກ່ຽວໄດ້ຊື້ນຳບຸກຄົນບໍ່ຮູ້ຊື່ມາໄວ້ເພື່ອເສບ ແລະ ຄ້າຂາຍ.
ຕົກມາຮອດວັນທີ 24 ກັນຍາ 2024 ເຈົ້າໜ້າທີ່ ປກສ ເມືອງຊໍາໃຕ້ ຈຶ່ງໄດ້ນຳສົ່ງຕົວຜູ້ກ່ຽວ, ພ້ອມເຄື່ອງຂອງກາງຢາເສບຕິດຈໍານວນ 10 ຖົງ, ລົດຈັກ 1 ຄັນ, ພ້ອມດ້ວຍ ໂທລະສັບມືຖື 1 ໜ່ວຍ ໃຫ້ພະແນກຕ້ານ ແລະ ສະກັດກັ້ນຢາເສບຕິດ ປກສ ແຂວງຫົວພັນ ສືບຕໍ່ດຳເນີນຄະດີຕາມຂັ້ນຕອນຂອງກົດໝາຍ.
ຂ່າວ: ປກສ ແຂວງຫົວພັນ