ໃນວັນທີ 26 ກັນຍາ 2024, ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ – ພິທີເປີດກອງປະຊຸມລັດຖະມົນຕີພະລັງງານອາຊຽນ ຄັ້ງທີ 42 ແລະ AEBF ຄັ້ງທີ 24 ໂດຍການເປັນປະທານຂອງ ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ປະທານກອງປະຊຸມ ລັດຖະມົນຕີພະລັງງານອາຊຽນຄັ້ງທີ 42, ມີບັນດາ ລັດຖະມົນຕີພະລັງງານອາຊຽນ, ຮອງເລຂາທິການອາຊຽນດ້ານປະຊາຄົມ ເສດຖະກິດ, ປະເທດຄູ່ຮ່ວມພັດທະນາ ແລະ ແຂກຖືກເຊີນເຂົ້າຮ່ວມ.
ໃນພິທີດັ່ງກ່າວ ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ປະທານກອງປະຊຸມ ລັດຖະມົນຕີພະລັງງານອາຊຽນຄັ້ງທີ 42ໄດ້ກ່າວວ່າ: ຂ້າພະເຈົ້າ ຕາງໜ້າ ລັດຖະບານ ແຫ່ງ ສປປ ລາວ ໃນນາມລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ປະທານກອງປະຊຸມ ລັດຖະມົນຕີພະລັງງານ ອາຊຽນ ຄັ້ງທີ 42 ຖືເປັນກຽດຢ່າງສູງໃນຕ້ອນຮັບທ່ານ ເຂົ້າສູ່ພິທີເປີດກອງປະຊຸມລັດຖະມົນຕີພະລັງງານ ອາຊຽນ ຄັ້ງທີ 42 ແລະ ງານ ASEAN Energy Business Forum ຄັ້ງທີ 24 (AEBF-24) ທີ່ຈັດຄູ່ຂະໜານກັນ, ສປປ ລາວ ໃນຖານະປະທານອາຊຽນປີ 2024 ໄດ້ກໍານົດຫົວຂໍ້ ປີນີ້ຄື “ອາຊຽນ: ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ“. ທີ່ຍິ່ງເນັ້ນໃຫ້ເຫັນບົດບາດ ອັນສໍາຄັນ ຂອງການເຊື່ອມໂຍງພະລັງງານອາຊຽນ ແນ່ໃສ່ເພື່ອວາງຮາກຖານສໍາຄັນຂອງການພັດທະນາ ເສດຖະກິດ ແລະ ສັງຄົມຂອງພາກພື້ນ.
ໃນຂະນະດຽວກັນ, ການກຽມຄວາມພ້ອມເພື່ອຮັບມືຕໍ່ການປ່ຽນແປງດິນຟ້າອາກາດ ແລະ ການປ່ຽນຜ່ານສູ່ພະລັງງານທີ່ສະອາດກວ່າ. ພ້ອມນີ້ ເຮົາກໍາລັງຢູ່ໃນ ໄລຍະສຸດທ້າຍຂອງການຈັດຕັ້ງປະຕິບັດແຜນວຽກ ອາປາເອັກ (APAEC) ໄລຍະທີ 2 ໃນປີ 2025, ສິ່ງສໍາຄັນແມ່ນເຮົາຕ້ອງທົບທວນຜົນສໍາເລັດທີ່ເຮົາໄດ້ຈັດຕັ້ງປະຕິບັດ ແລະ ທິດທາງທີ່ພວກເຮົາ ອາຊຽນຈະກ້າວເດີນຕໍ່ໄປຂ້າງໜ້າ ເພື່ອບັນລຸເປົ້າໝາຍລວມອາຊຽນ.
ການດໍາເນີນກອງປະຊຸມສໍາມະນາ ASEAN Energy Business Forum ຄັ້ງທີ 24 ທີ່ຈັດຂຶ້ນໂດຍສູນພະລັງງານອາຊຽນ, ເຊິ່ງມີຄວາມຄາດຫວັງວ່າໃຫ້ເປັນອີກເວທີໜຶ່ງທີ່ສໍາຄັນ ເພື່ອເຊື່ອມໂຍງລະຫວ່າງຜູ້ກໍານົດນະໂຍບາຍລະດັບສູງ ແລະ ຜູ້ມີສ່ວນຮ່ວມພາກ ທຸລະກິດ ເພື່ອແລກປ່ຽນຂໍ້ມູນ ແລະ ກາລະໂອກາດຂອງການຮ່ວມມື.ກອງປະຊຸມ ທີ່ຈະດໍາເນີນໄປໃນສອງມື້ຕໍ່ໜ້ານີ້, ທັງກອງປະຊຸມອາເມັມ (AMEM) ແລະ ກອງປະຊຸມສໍາມະນາ AEBF ມີຄວາມເຊື່ອໜັ້ນວ່າ: ນອກຈາກໝາກຜົນທີ່ດີ ທີ່ຈະໄດ້ຮັບຈາກກອງປະຊຸມດັ່ງກ່າວແລ້ວ ຍັງຈະໄດ້ເພີ່ມທະວີການຮ່ວມມືໃນພາກພື້ນ ເພື່ອສ້າງຄວາມຮັບປະກັນດ້ານພະລັງງານທີ່ໝັ້ນຄົງ ແລະ ອານາຄົດທີ່ຍືນຍົງສໍາລັບປະຊາຊົນທຸກຄົນໃນປະຊາຄົມ.
ໃນຖານະປະທານກອງປະຊຸມລັດຖະມົນຕີພະລັງງານອາຊຽນ ຄັ້ງທີ 42, ຂ້າພະ ເຈົ້າ ຂໍຍິນດີຕ້ອນຮັບທຸກທ່ານເຂົ້າສູ່ກອງປະຊຸມລັດຖະມົນຕີພະລັງງານອາຊຽນ ຄັ້ງທີ 42 ແລະ ກອງປະຊຸມສໍາມະນາທຸລະກິດພະລັງງານ ຄັ້ງທີ 24 ທີ່ນະຄອນຫຼວງຂອງ ສປປ ລາວ ຢ່າງເປັນທາງການ.