ວັນທີ 24 ກັນຍາ 2024, ພະແນກອຸດສາຫະກໍາ ແລະ ການຄ້າ (ອຄ) ແຂວງບໍ່ແກ້ວ ນໍາໂດຍ ທ່ານ ຄໍາລື ແກ້ວປະເສີດ ຫົວໜ້າຂະແໜງການຄ້າພາຍໃນ, ພ້ອມຄະນະລົງຕິດຕາມ ແລະ ກວດກາສິນຄ້າ ຢູ່ສູນການຄ້າສາກົນ ແລະ ຮ້ານຄ້າຕ່າງໆ ພາຍໃນແຂວງ ໃຫ້ໂຄສະນາ ແລະ ຕິດປ້າຍລາຄາສິນຄ້າ ແລະ ຊື້-ຂາຍເປັນຫົວໜ່ວຍເງິນກີບ.
ການລົງກວດກາຄັ້ງນີ້, ແມ່ນປະຕິບັດຕາມແຈ້ງການຫ້ອງວ່າການແຂວງບໍ່ແກ້ວ ເລກທີ 659/ຫວກ.ຂບກ ແລະ ປະຕິບັດຕາມກົດໝາຍວ່າດ້ວຍການຄຸ້ມຄອງເງິນຕາ, ດຳລັດຂອງນາຍົກລັດຖະມົນຕີ ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ໃນການກຳນົດໂຄງສ້າງລາຄາສິນຄ້າ, ການຕິດສະຫລາກສິນຄ້າເປັນພາສາລາວ, ການປະກາດ ຫລື ການໂຄສະນາ ລາຄາສິນຄ້າ ແລະ ຮັບຊຳລະສິນຄ້າ ລວມທັງການຊື້-ຂາຍຜ່ານຊ່ອງທາງການຄ້າເອເລັກໂຕນິກ, ການຊື້-ຂາຍ ຍານພາຫະນະ, ວັດຖຸມີຄ່າ, ຄ່າບໍລິການຕ່າງໆໃຫ້ເປັນຫົວໜ່ວຍເງິນກີບ.
ຜູ້ຈັດການທຸລະກິດຕະຫຼາດ ຕ້ອງເປັນເຈົ້າການໃນການຈັດສັນຕະຫລາດໃຫ້ມີຄວາມຈົບງາມ, ພ້ອມທັງແນະນໍາແມ່ຄ້າຊາວຂາຍ ຢູ່ໃນຄວາມຮັບຜິດຊອບຂອງຕົນ ໃຫ້ຕິດລາຄາສິນຄ້າ, ຊື້-ຂາຍເປັນເງິນກີບ. ກໍລະນີພົບເຫັນການລະເມີດ ໃຫ້ປະຕິບັດມາດຕະການຕໍ່ຜູ້ລະເມີດ ຕາມທີ່ໄດ້ກຳນົດໄວ້ໃນມາດຕາ 54 ແລະ 55 ຂອງກົດໝາຍວ່າດ້ວຍ ການຄຸ້ມຄອງເງິນຕາຕ່າງປະເທດ, ຖ້າຫາກມີການລະເມີດລັກສະນະເບົາບາງ ແລະ ເປັນຄັ້ງທຳອິດ ຈະຖືກສຶກສາອົບຮົມກ່າວເຕືອນ, ພ້ອມທັງເຮັດບົດທຶກໃຫ້ປັບປຸງກຳນົດ 30 ວັນ. ຖ້າຫາກລະເມີດເປັນຄັ້ງທີ II ແມ່ນຈະໄດ້ປັບໃໝ ຕາມທີ່ໄດ້ກໍານົດໄວ້ໃນຂໍ້ 2 ຂໍ້ 1 ມາດຕາ 55 ແມ່ນຈະປັບໃໝ ແຕ່ 10.000.000 ກີບ ຫາ 20.000.000 ກີບ/ຄັ້ງ. ຖ້າຫາກມີການລະເມີດຊໍ້າເປັນຄັ້ງທີ III ຈະໄດ້ປັບໃໝສອງເທົ່າຂອງມູນຄ່າປັບໃໝຄັ້ງຫຼ້າສຸດ.
ການລົງຕິດຕາມກວດກາໃນຄັ້ງນີ້, ທີມງານແມ່ນໄດ້ສ້າງບົດບັນທຶກ ແລະ ກ່າວເຕືອນໃຫ້ຜູ້ປະກອບການຮ້ານຄ້າຕ່າງໆ ຕິດປ້າຍລາຄາສິນຄ້າ, ການຊື້-ຂາຍເປັນຫົວໜ່ວຍເງິນກີບ ຫາກໃນຕໍ່ໜ້າຍັງພົບເຫັນ ບໍ່ຕິດປ້າຍລາຄາສິນຄ້າ ເປັນຫົວໜ່ວຍເງິນກີບ ແມ່ນຈະຖືກປັບໃໝແຕ່ 10.000.000 ກີບ ຫາ 20.000.000 ກີບ/ຄັ້ງ ຕາມມາດຕາ 54 ແລະ 55 ຂອງກົດໝາຍວ່າດ້ວຍ ການຄຸ້ມຄອງເງິນຕາຕ່າງປະເທດ.
ຂ່າວ: ປະເທດລາວ