ຕາມການລາຍງານຂອງແຫຼ່ງຂ່າວຢູ່ເມືອງກວັນໃຫ້ຮູ້ວ່າ: ເນື່ອງຈາກຝົນຕົກຕິດຕໍ່ກັນຫຼາຍວັນ ເຮັດໃຫ້ເກີດມີນ້ຳຖ້ວມ ແລະ ດິນເຈື່ອນຢູ່ຫຼາຍຈຸດ ໃນຂອບເຂດເມືອງກວັນ ແຂວງຫົວພັນ. ໃນນັ້ນ, ມີເຫດການດີນເຊາະເຈື່ອນທັບຖົມປະຊາຊົນຢູ່ບ້ານຫ້ວຍອັງ ໃນເວລາປະມານ 2 ໂມງເຊົ້າຂອງວັນທີ 22 ກັນຍາ 2024 ສົ່ງຜົນໃຫ້ປະຊາຊົນທີ່ນອນຢູ່ສະນຳ ໄດ້ຮັບບາດເຈັບໜັກ 1 ຄົນ, ເສຍຊິວິດ 1 ຄົນ ແລະສູນຫາຍ 2 ຄົນ. ນອກນັ້ນ, ດິນຍັງໄດ້ທັບຖົມຕູບສະນຳ 5 ຫຼັງ ແລະ ສັດລ້ຽງປະເພດງົວ ຈຳນວນ 5 ໂຕ.
ປັດຈຸບັນ, ເຈົ້າໜ້າທີ່ ອຳນາດການປົກຄອງທ້ອງຖິ່ນ ແລະ ຍາດພີ່ນ້ອງ ພວມລະດົມກຳລັງຄົ້ນຫາຜູ້ສູນຫາຍທີ່ຄາດວ່າຈົມຢູ່ໃຕ້ກອງດິນທີ່ເຊາະເຈື່ອນ. ລາຍລະອຽດຈະແຈ້ງຕື່ມພາຍຫຼັງ.
ຂ່າວ: ຂ່າວແຂວງຫົວພັນ