ກະຊວງການຕ່າງປະເທດອອກແຈ້ງການປັບອັດຕາກິນຢູ່-ພັກເຊົາ ສໍາລັບພະນັກງານທີ່ເຂົ້າຮ່ວມກອງປະຊຸມ ຂອງບັນດາໂຄງການ ທີ່ ອົງການຈັດຕັ້ງສາກົນທີ່ບໍ່ສັງກັດລັດຖະບານ (ອສບລ) ໃຫ້ການຊ່ວຍເຫຼືອ ຢູ່ ສປປ ລາວ.

ກະຊວງການຕ່າງປະເທດ ຂໍຖືເປັນກຽດແຈ້ງມາຍັງທ່ານຊາບວ່າ: ອີງໃສ່ສະພາບເສດຖະກິດ ແລະ ອັດຕາເງິນເຟີ້ ໃນປັດຈຸບັນໄດ້ສົ່ງຜົນກະທົບໃຫ້ເງິນກີບອ່ອນຄ່າ, ເຊິ່ງເຮັດໃຫ້ລາຄາສິນຄ້າ ແລະ ການບໍລິການ ເປັນຕົ້ນແມ່ນນໍ້າມັນ ແລະ ລາຄາທີ່ພັກເຊົາມີລາຄາສູງຂຶ້ນອັນໄດ້ສົ່ງຜົນສະທ້ອນຕໍ່ການຈັດຕັ້ງປະຕິບັດວຽກງານການຄຸ້ມຄອງໂຄງການ, ກະຊວງການຕ່າງປະເທດ, ໃນນາມປະທານຄະນະກໍາມະການຄຸ້ມຄອງ ອົງການຈັດຕັ້ງສາກົນທີ່ບໍ່ສັງກັດລັດຖະບານ ໂດຍ ໄດ້ຮັບການເຫັນດີເປັນເອກະພາບຂອງອົງການ, ຜູ້ໃຫ້ທຶນ ແລະ ບັນດາກະຊວງຂະແຫນງການ, ຈຶ່ງໄດ້ດັດປັບອັດຕາກິນ ຢູ່-ພັກເຊົາ ສໍາລັບພະນັກງານທີ່ເຂົ້າຮ່ວມກອງປະຊຸມຂອງບັນດາໂຄງການ ທີ່ ອົງການຈັດຕັ້ງສາກົນທີ່ບໍ່ສັງກັດ ລັດຖະບານ (ອສບລ) ໃຫ້ການຊ່ວຍເຫຼືອ ຢູ່ ສປປ ລາວ ໂດຍຈະຄິດໄລ່ເປັນຈໍານວນ 560,000 ກີບ/ຄົນ/ວັນ ສໍາລັບ ໂຄງການໃຫມ່ເລີ່ມແຕ່ວັນທີ 01 ຕຸລາ 2024 ເປັນຕົ້ນໄປ.

ສໍາລັບໂຄງການ ທີ່ຖືກອະນຸມັດກ່ອນແຈ້ງການສະບັບນີ້ອອກ ແມ່ນສາມາດປະຕິບັດຕາມບົດບັນທຶກຄວາມເຂົ້າໃຈທີ່ໄດ້ເຊັນກັນກ່ອນຫນ້ານີ້ ເພື່ອບໍ່ໃຫ້ກະທົບຕໍ່ແຜນງົບປະມານທີ່ໄດ້ອະນຸມັດແລ້ວ.