ພາຍຸດີເປຣຊັນ ກາລັງເຄື່ອນທີຢູ່ເຂດທະເລຈີນໃຕ້ ຕອນກາງ ດ້ວຍຄວາມໄວ 25 ກິໂລແມັດຕໍ່ ຊົ່ວໂມງ ຊຶ່ງໃນເວລາ 8 ໂມງ 25 ນາທີ ມີຈຸດສູນ ກາງ ຢູ່ເສັ້ນຂະຫນານທີ 16.5 ອົງສາເຫນືອ, ເສັ້ນ ແວງທີ 113.7 ອົງສາຕາເວັນອອກ. ຄາດວ່າ ພາຍຸ ຫົວນີ້ຈະເພີ່ມກໍາລັງແຮງຂື້ນ ກາຍເປັນພາຍຸຫມູນ ເຂດຮ້ອນ ແລະ ຈະເຄື່ອນທີ່ຂຶ້ນຝັ່ງ ເມືອງ ດານັງ ຂອງ ສສ ຫວຽດນາມ ໃນຕອນຄໍ່າຂອງ ວັນທີ 19 ກັນຍາ 2024.

ຈາກນັ້ນ, ຈະອ່ອນກໍາລັງລົງເປັນພາຍຸດີເປຼຊັນ ເຄື່ອນທີ່ຜ່ານລະຫວ່າງ ແຂວງຄໍາມ່ວນ ແລະ ແຂວງບໍລິຄໍາໄຊ ໃນໄລຍະວັນ ທີ 20- 21 ກັນຍາ 2024 ນີ້. ຈາກທ່າອ່ຽງການເຄື່ອນທີ່ຂອງພາຍຸດັ່ງກ່າວ ຈະເຮັດໃຫ້ມີຝົນຕົກໃນລະດັບຄ່ອຍຫາປານກາງ ເປັນບໍລິເວນກວ້າງໃນແຕ່ລະພາກ ແລະ ຕົກຫນັກ ຫາ ຫນັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນ ແຕ່ ເຂດພາກເຫນືອດ້ານ ຕາເວັນອອກ, ນະຄອນຫຼວງວຽງຈັນ, ພາກກາງ ແລະ ພາກໃຕ້ ໃນໄລຍະວັນທີ 18–22 ກັນຍາ 2024 ນີ້. ພ້ອມດຽວກັນນີ້ ລະດັບນໍ້າ ສະຖານີ ແກ້ງກອກ ເມືອງເຊຈໍາພອນ ແຂວງສະຫວັນນະເຂດ ຊຶ່ງ ໄດ້ຂື້ນຮອດເຂດລະດັບເຕືອນໄພແລ້ວ(ລະດັບ ເຕືອນໄພ 7.50 ແມັດ ແລະ ລະດັບຖ້ວມ 8.00 ແມັດ).

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນ ໃນບັນດາແຂວງດັ່ງກ່າວ ຈົ່ງມີສະຕິລະມັດລະວັງ ແລະ ກຽມພ້ອມຮັບມື ຕໍ່ສະພາບຝົນຕົກຫນັກ ແລະ ລົມພັດແຮງ ທີ່ຈະເຮັດໃຫ້ມີດິນເຈື່ອນ, ນໍ້າຖ້ວມຊູ, ນໍ້າຖ້ວມຫນື່ງ ແລະ ນໍ້າຖ້ວມອັ່ງ ໃນຕົວເມືອງ. ສະເພາະຜູ້ທີ່ອາໃສລຽບຕາມແຄມຝັ່ງແມ່ນໍ້າ ເຊຈຳພອນໃຫ້ກະກຽມຍົກຍ້າຍ ວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.