ອີງຕາມສື່ທາງການຂອງປະເທດມຽນມາລາຍງານໃນວັນທີ 17 ກັນຍາ 2024 ນີ້ກ່ຽວກັບເຫດການໄພພິບັດນ້ຳຖ້ວມຮຸນແຮງໃນມຽນມາ ໂດຍມີຄົນຄົນເສຍຊີວິດຢ່າງນ້ອຍ 226 ຄົນ ໃນຊ່ວງໜຶ່ງອາທິດທີ່ຜ່ານມາ ໂດຍສາເຫດຂອງນ້ຳຖ້ວມມາຈາກຝົນທີ່ຕົກໜັກຈາກອິດທິພົນຂອງພາຍຸໝຸນເຂດຮ້ອນ ຢາກິ ທີ່ພັດເຂົ້າຖະຫຼົ່ມໃນພາກກາງຂອງປະເທດມຽນມາ.

ຕາມການລາຍງານຂອງໜັງສືພິມຂອງລັດຖະບານມຽນມາລະບຸວ່າ: ຕອນນີ້ຍັງມີຜູ້ຄົນຫາຍສາບສູນ 77 ຄົນ ເຊິ່ງຂະນະນີ້ທາງການມຽນມາໄດ້ເປີດຄ້າຍບັນເທົາທຸກ 388 ແຫ່ງ ໃນພຶ້ນທີ່ບັນດາ 9 ແຂວງທີ່ໄດ້ຮັບຜົນກະທົບ.

ລາຍງານຍັງໄດ້ລະບຸຕື່ມອີກວ່າ: ສະເພາະເມືອງ ມັນທະເລ ພຽງເມືອງດຽວພຶ້ນທີ່ກະສິກຳປະມານ 100,000 ໄຮ່ຈົມຢູ່ໃນນ້ຳ ບ້ານເຮືອນປະມານ 26,700 ຫຼັງໄດ້ຮັບຄວາມເສຍຫາຍ ແລະ ເສັ້ນທາງຫຼາຍສາຍຖືກຕັດຂາດຈາກຝົນຕົກໜັກ ແລະ ນ້ຳຖ້ວມ.