ໃນວັນທີ 6 ສິງຫາທີ່ຜ່ານມາ, ເຈົ້າໜ້າທີ່ ປກສ ເມືອງທ່າແຂກ, ແຂວງຄຳມວ່ນ ໄດ້ກັກຕົວທ້າວ ຕ່ຳເທືອງ ແດງມະນີ ຫຼື (ຕ່ຳ) ອາຍຸ 25 ປີ, ປະຊາຊົນບ້ານປອມຄູນ, ເມືອງຍົມມະລາດ, ແຂວງຄຳມວ່ນ ພ້ອມຂອງກາງຢາເສບຕິດ ປະເພດຢາບ້າຈຳນວນ 3,477 ເມັດ ມາດຳເນີນຄະດີ.

ຜ່ານການສືບສວນ-ສອບສວນ ຜູ້ກ່ຽວຮັບສາລະພາບວ່າ: ໃນໄລຍະເດືອນກຸມພາ 2024 ຕົນເອງແມ່ນໄດ້ເລີ່ມພົວພັນຄ້າຂາຍຢາເສບຕິດປະເພດຢາບ້າ ທີ່ຊື້ນຳ ຜູ້ຮ່ວມຂະບວນການມາຂາຍຕໍ່ໃຫ້ໄວລຸ້ນທົ່ວໄປຈົນໝົດ. ຕົກມາຮອດວັນທີ 28 ກໍລະກົດ 2024 ຜູ້ກ່ຽວກໍ່ໄດ້ໄປຊື້ຢາບ້ານຳຜູ້ຮ່ວມຂະບວນການ (ຜູ້ເກົ່າອີກ) ຈຳນວນ 2 ມັດ ໃນລາຄາ 24,000,000 ກີບ; ພາຍຫຼັງໄດ້ຢາບ້າມາແລ້ວຜູ້ກ່ຽວກໍ່ໄດ້ເອົາໄປຂາຍໃຫ້ໄວລຸ້ນທົ່ວໄປ ໃນລາຄາເມັດລະ 20.000 ກີບ, ຂາຍໄດ້ທັງ ໝົດ 523 ເມັດ ແລະ ຍັງເຫຼືອຢາບ້າ ຈຳນວນ 1 ມັດ ກັບ 1,477 ເມັດ ຈື່ງໄດ້ເກັບຮັກສາໄວ້ຂາຍຕໍ່ໃນມື້ໃໝ່.

ຈົນຕົກມາຮອດເວລາ 14 ໂມງ 15 ນາທີ ຂອງວັນທີ 6 ສິງຫາ 2024 ເຈົ້າໜ້າທີ່ຈິ່ງໄດ້ຈັບ ທ້າວ ຕ່ຳເທືອງ ພ້ອມຂອງກາງຢາບ້າ ຈຳນວນ 1 ມັດ ກັບ 1,477 ເມັດ ຫຼື ເທົ່າກັບ 3.477 ເມັດ ຢູ່ທີ່ຫ້ອງແຖວແຫ່ງໜື່ງ ທີ່ບ້ານນາມະລາດ, ເມືອງທ່າແຂກ, ແຂວງຄຳມ່ວນ ມາດຳເນີນຄະດີຕາມລະບຽບກົດໝາຍ.

ຂ່າວ: ປກສ ແຂວງຄຳມ່ວນ, ວາລະສານປ້ອງກັນຄວາມສະຫງົບ