ຕອນບ່າຍວັນທີ 11 ກັນຍາ 2024 ນີ້, ສະຫາຍ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີ ກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ພ້ອມຄະນະ ໄດ້ນໍາເອົາເງິນສົດ ມູນຄ່າ 100 ລ້ານກີບ ມາມອບໃຫ້ແຂວງຫລວງນໍ້າທາ ເພື່ອປະກອບເຂົ້າການຊ່ວຍເຫລືອ ຜູ້ທີ່ຖືກຜົນກະທົບຈາກໄພນໍ້າຖ້ວມ, ເປັນກຽດຮັບໂດຍ ທ່ານ ວຽງສະຫວັດ ສີພັນດອນເຈົ້າແຂວງຫລວງນໍ້າທາ, ພ້ອມດ້ວຍຄະນະນໍາຂອງແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ເນື່ອງຈາກວ່າ ຫລາຍບ້ານຢູ່ແຂວງຫລວງນໍ້າທາ ໄດ້ຖືກຜົນກະທົບຈາກເຫດການນໍ້າຖ້ວມກະທັນຫັນຢ່າງຮ້າຍແຮງ ເປັນເວລາ 3 ວັນແລ້ວ (ແຕ່ວັນທີ 09-11 ກັນຍາ) ເຊິ່ງເຫັນວ່າປະລິມານນໍ້າໄດ້ມີການຫຼຸດລົງເປັນຈໍານວນຫຼາຍແລ້ວ.
ໃນໂອກາດລົງມອບເງິນຊ່ວຍເຫຼືອໃນຄັ້ງນີ້, ສະຫາຍ ຮອງລັດຖະມົນຕີກະຊວງປ້ອງກັນປະເທດ ພ້ອມຄະນະ ຍັງໄດ້ລົງເຄື່ອນໄຫວ ແລະ ນໍາເອົາອາຫານແຫ້ງລົງແຈກຢາຍໃຫ້ ປະຊາຊົນທີ່ຖືກຜົນກະທົບ ຈໍານວນ 4 ບ້ານ ຄື: ບ້ານຫຼວງ, ບ້ານຂອນ, ບ້ານປ່າສັກ ແລະ ບ້ານໃໝ່ ຕື່ມອີກ.
ຂ່າວ-ພາບ: ແສງທອງ, ປະເທດລາວ