ພິທີມອບ-ຮັບໜ້າທີ່ ຫົວໜ້າຫ້ອງຕໍາຫຼວດ ປກສ ແຂວງຫົວພັນ ລະຫວ່າງ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນອາທິດຜ່ານມາ, ໂດຍມີ ພັອຄໍາເຫຼັກ ຈັນສຸລິ ຮອງຫົວໜ້າ ກອງບັນຊາການ ປກສ ແຂວງຫົວພັນ, ຄະນະຫ້ອງ, ຫົວໜ້າ-ຮອງພະແນກຕະຫຼອດຮອດນາຍຕໍາຫຼວດເຂົ້າຮ່ວມ.
ພັທ ຄໍາແພງ ແກ້ວມູນທອງ ຫົວໜ້າຫ້ອງຕໍາຫຼວດ ກອງບັນຊາການ ປກສ ແຂວງຫົວພັນ(ຜູ້ເກົ່າ) ໄດ້ຜ່ານບົດສະຫຼຸບໂດຍຫຍໍ້ໃນການຊີ້ນໍາ-ບັນຊາ ວຽກງານວິຊາສະເພາະຂອງຫ້ອງຕໍາຫຼວດ ນັບແຕ່ປີ 2018 ເຖິງ 2024 ວ່າ: ໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດເປັນກົກ, ເອົາການຕໍານິສົ່ງຂ່າວ ຕິດພັນກັບ ການນໍາພາຂອງພັກ ດ້ວຍຮູບການນໍາເອົາແນວທາງຂອງພັກ-ລະບຽບກົດໝາຍຂອງລັດ ໃຫ້ນາຍ ແລະ ພົນຕໍາຫຼວດ ພາຍໃນຫ້ອງ ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ.
ເຊິ່ງໃນໄລຍະຜ່ານມາ, ສາມາດແກ້ໄຂຄະດີໄດ້ທັງໝົດ 1,216 ເລື່ອງ, ມີຜູ້ຖືກຫາ 1,497 ຄົນ, ຍິງ 167 ຄົນ, ໂດຍແບ່ງເປັນແຕ່ລະຄະດີຄື: ຄະດີຢາເສບຕິດ ເກີດຂຶ້ນທັງໝົດ 785 ເລື່ອງ, ຜູ້ຖືກຫາ 964 ຄົນ, ຍິງ 133 ຄົນ, ຄະດີເສດຖະກິດ ເກີດຂຶ້ນທັງໝົດ 59 ເລື່ອງ, ຜູ້ຖືກຫາ 72 ຄົນ, ຍິງ 12 ຄົນ.
ຄະດີຄ້າມະນຸດ ຈໍານວນ 51 ເລື່ອງ, ຜູ້ຖືກຫາ 92 ຄົນ ຍິງ 5 ຄົນ, ຄະດີອຸບັດຕິເຫດ ຈໍານວນ 393 ເລື່ອງ, ມີຜູ້ໄດ້ຮັບບາດເຈັບທັງໝົດ 588 ຄົນ, ເສຍຊີວິດ 98 ຄົນ, ຄະດີສະກັດກັ້ນ ແລະ ຕ້ານອັກຄີໄພ ມີເຫດອັກຄີໄພເກີດຂຶ້ນທັງໝົດ 24 ຄັ້ງ, ຄະດີສິ່ງແວດລ້ອມ ເກີດຂຶ້ນທັງໝົດ 19 ເລື່ອງ, ຜູ້ຖືກຫາ 19 ຄົນ. ໃນພິທີຍັງໄດ້ເຊັນບົດບັນທຶກມອບ-ຮັບ ລະຫວ່າງ ພັທ ຄໍາແພງ ແກ້ວມູນທອງ ຫົວໜ້າຫ້ອງຕໍາຫຼວດ (ຜູ້ເກົ່າ) ແລະ ພັທ ທອນມີ ແກ້ວຈິນດາ ຫົວໜ້າຫ້ອງຕໍາຫຼວດ (ຜູ້ໃໝ່) ຢ່າງເປັນທາງການ.
ຂ່າວ: ຄວາມສະຫງົບ