ແຫຼ່ງຂ່າວຈາກແຂວງອັດຕະປື ໃຫ້ຮູ້ວ່າ: ໃນວັນທີ 26 ສິງຫາທີ່ຜ່ານມາ, ທີ່ກອງບັນຊາການ ປ້ອງກັນຄວາມສະຫງົບ (ປກສ) ເມືອງໄຊເສດຖາ, ແຂວງອັດຕະປື ໄດ້ມີການສຶກສາອົບຮົມກຸ່ມໄວໜຸ່ມທີ່ມົ້ວສຸມສິ່ງເສບຕິດ, ໂດຍການເປັນປະທານຂອງທ່ານ ພັນໂທ ບຸນດົ້ງ ພິຈິດ ຮອງກອງບັນຊາການ ປ້ອງກັນຄວາມສະຫງົບເມືອງ ພ້ອມດ້ວຍອຳນາດການປົກຄອງບ້ານ, ພໍ່ແມ່ຜູ້ປົກຄອງ ແລະ ເປົ້າໝາຍກຸ່ມມົ້ວສຸມສິ່ງເສບຕິດເຂົ້າຮ່ວມ.
ທ່ານ ພັນຕີ ທອງພູນ ພຸດທະພັນ ຫົວໜ້າພະແນກຕຳຫລວດ ກອງບັນຊາການປ້ອງກັນຄວາມສະຫງົບ ເມືອງ ໄດ້ໃຫ້ຮູ້ວ່າ: ໃນວັນທີ 23 ສິງຫາ 2024 ຜ່ານມາ, ເຈົ້າໜ້າທີ່ປ້ອງກັນຄວາມສະຫງົບ ເມືອງໄຊເສດຖາ ໄດ້ຮັບແຫລ່ງຂ່າວຈາກພົນລະເມືອງດີວ່າ: ມີໄວໜຸ່ມຈໍານວນໜຶ່ງມົ້ວສຸມສິ່ງເສບຕິດ. ດັ່ງນັ້ນ, ທາງເຈົ້າໜ້າທີ່ ຈຶ່ງໄດ້ປະສານກັບ ປກສ ກຸ່ມບ້ານໂພໄຊ ແລະ ອົງການຈັດຕັ້ງບ້ານຊ້າຍ ພ້ອມກັນລົງກວດກາຕົວຈິງຢູ່ທີ່ເຮືອນຂອງນາງ ຈັນສະໄໝ ອາຍຸ 58 ປີ, ອາຊີບປະຊາຊົນ, ບ້ານຊ້າຍ ເຫັນວ່າມີມູນຄວາມຈິງແທ້ ຈິ່ງໄດ້ເຂົ້າກັກຕົວກຸ່ມໄວໜຸ່ມ 21 ຄົນ ຍິງ 17 ຄົນ ແລະ ຢຶດຂອງກາງປະກອບ ມີ: ຢາສູບໄຟຟ້າ 8 ອັນ, ຄໍລາເຈນ 26 ຊອງ, ນ້ຳກະທ່ອມຕົ້ມຈຳນວນ 1 ໝໍ້.
ຜ່ານການສືບສວນ-ສອບສວນ ຢ່າງລະອຽດ, ພາວະວິໄສ ແລະ ຖືກຕ້ອງຕາມກົດໝາຍ ພວກກ່ຽວໄດ້ຮັບສາລະພາບວ່າ: ໄດ້ມີການຊຸມແຊວດື່ມເບຍ ແລະ ດື່ມນ້ຳກະທ່ອມແທ້. ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ນໍາຕົວກຸ່ມມົ້ວສຸມສິ່ງເສບຕິດດັ່ງກ່າວ ມາທໍາການສຶກສາອົບຮົມກ່າວເຕືອນ ແລະ ເຮັດບົດບັນທຶກ ເພື່ອບໍ່ໃຫ້ມີການກັບຄືນໄປເຮັດໃນສິ່ງທີ່ບໍ່ດີນັ້ນອີກ.
ໂອກາດດັ່ງກ່າວ, ທ່ານ ພັນໂທ ບຸນດົ້ງ ພິຈິດ ໄດ້ໂອ້ລົມ ເພື່ອເປັນການສຶກສາອົບຮົມ ແລະ ກ່າວເຕືອນ ຕໍ່ກຸ່ມເປົ້າໝາຍ ໃຫ້ຮູ້ເຖິງຄວາມຜິດຂອງຕົນເອງ ເພື່ອບໍ່ໃຫ້ກະທຳຊ້ຳອີກ ພ້ອມທັງຮຽກຮ້ອງໃຫ້ພໍ່ແມ່ຜູ້ປົກຄອງ ຕ້ອງໄດ້ເອົາໃຈໃສ່ຕິດຕາມການເຄື່ອນໄຫວຂອງລູກຫລານຢ່າງໃກ້ຊິດ, ຮຽກຮ້ອງໃຫ້ລູກຫລານຜູ້ທີ່ຍັງໜຸ່ມນ້ອຍ, ທີ່ເປັນກໍາລັງແຮງອັນສໍາຄັນຂອງປະເທດຊາດ ຈົ່ງຢ່າໄດ້ໄປມົ້ວສຸມກັບສິ່ງເສບຕິດອີກ ເພາະວ່າຖ້າຕິດສິ່ງເສບຕິດຂຶ້ນມາ ກໍຈະພາໃຫ້ເສຍເງິນ, ເສຍສຸຂະພາບ ແລະ ເສຍອະນາຄົດ.
ຂ່າວ: ປະເທດລາວ