ສຳນັັກຂ່າວຕ່າງປະເທດລາຍງານໃນວັນທີ 26 ສິງຫາ 2024 ນີ້ວ່າ, ແມ່ຕູ້ຊາວອັງກິດທີ່ຊື່ວ່າ ແມນເນັດ ເບວລີ ໄດ້ສະຫຼອງຄົບຮອບວັນເກີດອາຍຸ 102 ປີ ດ້ວຍການໂດດຈ້ອງພ້ອມມີຄູຝຶກລົງມາຈາກເຮືອບິນ ສ້າງສະຖິຕິເປັນຊາວອັງກິດທີ່ມີອາຍຸຫຼາຍທີ່ສຸດໃນການໂດດຈ້ອງໃນລັກສະນະແບບນີ້.
ແມນເນັດ ເບວລີ ໄດ້ເລົ່າຄວາມຮູ້ສຶກຫຼັງໄດ້ໂດດຈ້ອງວ່າ: ມີຄວາມຮູ້ສຶກດີໃຈຫຼາຍ ເພາະມັນເປັນຄວາມຝັນທີ່ຕັ້ງໃຈລໍຖ້າ ຊຶ່ງໃນວິນາທີທີ່ປະຕູເຮືອບິນເປີດອອກ ຕ້ອງໄດ້ຕັດສິນໃຈຕ້ອງໂດດລົງໄປເທົ່ານັ້ນ ແລະ ຂ້ອຍກໍເຮັດມັນໄດ້ ຫຼັງຈາກແມ່ຕູ້ໄດ້ລົງສູ່ພຶ້ນຢ່າງປອດໄພ ກໍໄດ້ຮັບຊໍ່ດອກໄມ້ ແລະ ໃບຢ້ງຢືນພ້ອມທັງສຽງຕົບມືຈາກກອງເຊີຍທີ່ມາໃຫ້ກຳລັງໃຈຢ່າງຫຼວງຫຼາຍ.
ນອກຈາກຈະສ້າງສະຖິຕິແລ້ວ ຍັງສາມາດລະດົມເງິນບໍລິຈາກໄດ້ເຖິງ 9000 ປອນ ຫຼື ປະມານ ເກືອບ 300 ລ້ານກີບ ເພື່ອມອບໃຫ້ໜ່ວຍງານການກຸສົນເຊັ່ນ: ໜ່ວຍງານສຸກເສີນທາງອາກາດ ລວມທັງສະມາຄົນໂຣກທາງປະສາດ ແລະ ໜ່ວຍງານການກຸສົນອື່ນໆອີກດ້ວຍ.
ຢ່າງໃດກໍຕາມແມ່ຕູ້ ເບວລີ ເຄີຍສະຫຼອງວັນເກີດຄົບຮອບ 100 ປີມາແລ້ວໂດຍການຂັບລົດແຂ່ງເຟີຣາຣີ້ດ້ວຍຄວາມໄວ 209 ກິໂລແມັດຕໍ່ຊົ່ວໂມງ ທີ່ສະໜາມຊິວເວີສະໂຕນອີກດ້ວຍ.
ແຫຼ່ງຂ່າວ:skynews