ແຈ້ງການຫ້າມການນໍາເຂົ້າພຣະພຸດທະຮູບ ແລະ ວັດຖຸມຸງຄຸນ ຈາກຕ່າງປະເທດເຂົ້າມາບູຊາ ແລະ ຈໍາຫນ່າຍຢູ່ພາຍໃນ ນະຄອນຫຼວງວຽງຈັນ.

ເພື່ອເຮັດໃຫ້ການຄຸ້ມຄອງ, ການຕິດຕາມກວດກາ ການນໍາເຂົ້າ ພຣະພຸດທະຮູບ ແລະ ວັດຖຸມຸງຄຸນ ຈາກ ຕ່າງປະເທດເຂົ້າມາຈໍາຫນ່າຍຢູ່ພາຍໃນນະຄອນຫຼວງວຽງຈັນ ແລະ ເພື່ອເປັນການອະນຸລັກ, ປົກປັກຮັກສາ, ໂຄສະນາ ສົ່ງເສີມຮູບແບບສິລະປະລວດລາຍທີ່ເປັນເອກະລັກຂອງພຣະພຸດທະຮູບ ແລະ ວັດຖຸມຸງຄຸນລາວ ພາຍໃນ ນະຄອນຫຼວງວຽງຈັນ ໃຫ້ເປັນເອກະລັກຂອງນະຄອນຫຼວງວຽງຈັນ, ກໍ່ຄືຂອງຊາດໃຫ້ມີຄວາມຍືນຍົງເຊັ່ນລູກເຊັ່ນ ຫຼານຕະຫຼອດໄປ.

ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ອອກແຈ້ງການ ດັ່ງນີ້:

-ຈຸດປະສົງລະດັບຄາດຫມາຍ.
ເພື່ອເປັນການສົ່ງເສີມຝີມືຂອງນາຍຊ່າງລາວ, ສົ່ງເສີມຮູບແບບສິລະປະລວດລາຍທີ່ເປັນເອກະລັກຂອງພຣະພຸດທະຮູບ ແລະ ວັດຖຸມຸງຄຸນລາວ ຢູ່ພາຍໃນນະຄອນຫຼວງວຽງຈັນ ກໍ່ຄືຂອງຊາດ ໃຫ້ເປັນເອກະລັກ ສະເພາະຂອງສິລະປະລາວ.

-ເງື່ອນໄຂການນໍາເຂົ້າພຣະພຸດທະຮູບຈາກຕ່າງປະເທດ.

1. ບຸກຄົນ, ນິຕິບຸກຄົນ ທີ່ມີຈຸດປະສົງຂໍອະນຸຍາດນໍາເຂົ້າພຣະພຸດທະຮູບ ແລະ ວັດຖຸມຸງຄຸນ ຈາກ ຕ່າງປະເທດ ຕ້ອງໄປຊື້ແບບຟອມຢູ່ ພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ.
2. ການປະກອບເອກະສານສະເຫນີຂໍອະນຸຍາດນໍາເຂົ້າພຣະພຸດທະຮູບ ແລະ ວັດຖຸມຸງຄຸນ ຈາກ ຕ່າງປະເທດ ຊ້າສຸດ 2 ອາທິດກ່ອນກ່ອນມື້ນໍາເຂົ້າຕົວຈິງ, ຖ້າບໍ່ປະຕິບັດຕາມການກໍານົດນີ້ຈະບໍ່ຮັບ ພິຈາລະນາເອກະສານ.
3. ອະນຸຍາດໃຫ້ບຸກຄົນ, ນິຕິບຸກຄົນ ຂໍອະນຸຍາດນໍາເຂົ້າພຣະພຸດທະຮູບ ແລະ ວັດຖຸມຸງຄຸນ ຈາກ ຕ່າງປະເທດ ທີ່ເປັນເອກະລັກຂອງລາວ ຫຼື ເອົາແບບຂອງພຣະພຸດທະຮູບ ແລະ ວັດຖຸມຸງຄຸນລາວໄປຫຼໍ່ ຢູ່ຕ່າງປະເທດ ເທົ່ານັ້ນຈຶ່ງສາມານໍາເຂົ້າມາຢູ່ພາຍໃນນະຄອນຫຼວງວຽງຈັນໄດ້.

-ຂໍ້ຫ້າມ.
1. ຫ້າມນໍາເຂົ້າພຣະພຸດທະຮູບ ແລະ ວັດຖຸມຸງຄຸນຈາກຕ່າງປະເທດ ໂດຍບໍ່ໄດ້ຮັບອະນຸຍາດ ຈາກພະ ແນກ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ຢ່າງເດັດຂາດ.
2. ຫ້າມນໍາເຂົ້າພຣະພຸດທະຮູບ ແລະ ວັດຖຸມຸງຄຸນ ຈາກຕ່າງປະເທດ ທີ່ມີພາສາ ແລະ ສັນຍາລັກທີ່ບໍ່ ຖືກຕ້ອງສອດຄ່ອງກັບລະບຽບກົດຫມາຍ ແລະ ຮີດຄອງປະເພນີ ຂອງ ສປປລາວຢ່າງເດັດຂາດ.
3. ຫ້າມມີພຶດຕິກໍາອື່ນໆທີ່ເປັນການລະເມີດລະບຽບ, ກົດຫມາຍ ຂອງ ສປປ ລາວ.
-ມາດຕະການຕໍ່ຜູ້ລະເມີດ.
1. ສຶກສາອົບຮົມຄັ້ງທີ 1 ແລະ ປັບໄຫມ 3,000,000-5,000,000 ກີບ.
2. ສຶກສາອົບຮົມຄັ້ງທີ 2 ແລະ ປັບໄຫມ 5,000,000-10,000,000 ກີບ.
3. ສຶກສາອົບຮົມຄັ້ງທີ 3 ແລະ ປັບໄຫມ 10,000,000-15,000,000 ກີບ, ພ້ອມກັບນໍາຕົວຜູ້ລະເມີດ ໄປດໍາເນີນຄະດີ ຕາມກົດຫມາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ.
4. ສ່ວນພຣະພຸດທະຮູບທີ່ນໍາເຂົ້າມາແບບໍ່ຖືກຕ້ອງຜູ້ລະເມີດຕ້ອງໄດ້ຮັບຜິດຊອບຄ່າໃຊ້ຈ່າຍທັງຫມົດ
ພ້ອມດ້ວຍການດໍາເນີນເອກະສານໃນການສົ່ງກັບຄືນປະເທດທີ່ໄດ້ນໍາເຂົ້າມາ.

ດັ່ງນັ້ນ, ຈຶ່ງອອກແຈ້ງການມາເພື່ອໃຫ້ຜູ້ປະກອບການຈໍາຫນ່າຍພຣະພຸດທະຮູບ, ວັດຖຸມຸງຄຸນ, ບຸກຄົນ, ນິຕິບຸກຄົນ, ທີ່ຢູ່ພາຍໃນນະຄອນຫຼວງວຽງຈັນ ໃຫ້ພ້ອມກັນປະຕິບັດແຈ້ງການສະບັບນີ້ຢ່າງເຂັ້ມງວດ.