ໃນທ້າຍອາທິດຜ່ານມາ, ກອງພັນປ້ອງກັນເຄື່ອນທີ່ ປກສ ແຂວງຫຼວງນ້ຳທາ ໄດ້ນຳເອົາຜູ້ກະທຳຜິດຊື້-ຂາຍໃບກະທ່ອມ 2 ຄົນ ແລະ ຕຳນິວິຈານ, ໃສ່ຮ້າຍການປະຕິບັດໜ້າທີ່ຂອງເຈົ້າໜ້າທີ່ຕຳຫຼວດ 1 ຄົນ, ມາສຶກສາອົບຮົມຢູ່ກອງພັນປ້ອງກັນເຄື່ອນທີ່ ປກສ ແຂວງ; ໂດຍການເຂົ້າຮ່ວມຂອງ ພັທ ສິງຄຳ ອຸດົມພອນ ຫົວໜ້າກອງພັນປ້ອງກັນເຄື່ອນທີ່ ປກສ ແຂວງຫຼວງນ້ຳທາ, ມີຫົວໜ້າ-ຮອງໝວດ, ພະນັກງານວິຊາສະເພາະ ແລະ ພໍ່ແມ່ຜູ້ປົກຄອງພວກຖືກສຶກສາອົບຮົມ ເຂົ້າຮ່ວມ.
ພັທ ສິງຄຳ ອຸດົມພອນ ລາຍງານໃຫ້ຮູ້ວ່າ: ໃນວັນທີ 9 ສິງຫາ 2024 ໄດ້ຮັບແຫຼ່ງຂ່າວຈາກພົນລະເມືອງດີວ່າ: ມີກຸ່ມໄວລຸ້ນ ຊື້-ຂາຍ, ມົ້ວສຸມນ້ຳກະທ່ອມ ຢູ່ຫ້ອງແຖວເຂດບ້ານທົ່ງໄຈ້ໃຕ້, ເມືອງ ແລະ ແຂວງຫຼວງນ້ຳທາ; ຈາກນັ້ນ, ຈຶ່ງໄດ້ແຕ່ງຕັ້ງພະນັກງານວິຊາສະເພາະລົງພື້ນທີ່ຕົວຈິ່ງ ພົບເຫັນໄວລຸ້ນ 2 ຄົນ ທີ່ເຊົ່າຫ້ອງແຖວນັ້ນ.
ຈຶ່ງໄດ້ຂໍອະນຸຍາດກວດກາ ແລ້ວພົບເຫັນຂອງກາງໃບກະທ່ອມ, ພ້ອມກັບນໍ້າຢາ ຈຳນວນ 22 ຊຸດ. ເຈົ້າໜ້າທີ່ຈຶ່ງໄດ້ນຳພວກກ່ຽວທັງ 2 ຄົນມາສອບສວນ ແລະ ພວກກ່ຽວໄດ້ໃຫ້ການວ່າ: ໃບກະທ່ອມດັ່ງກ່າວ ແມ່ນຂອງພວກກ່ຽວແທ້, ໄດ້ສັ່ງຊື້ທາງອອນລາຍ ແລະ ໄດ້ຝາກມາທາງບໍລິສັດຂົນສົ່ງແຫ່ງໜຶ່ງ ເພື່ອນຳມາຂາຍໃຫ້ກຸ່ມໄວລຸ້ນ (ຂາຍໄປແລ້ວ 3 ຊຸດ).
ພັທ ສິງຄຳ ອຸດົມພອນ ໃຫ້ຮູ້ຕື່ມອີກວ່າ: ຕໍ່ກັບເຫດການດັ່ງກ່າວ, ແມ່ນການເຄື່ອນໄຫວທີ່ລະເມີດຕໍ່ຄຳສັ່ງ ຂອງອົງການໄອຍະການປະຊາຊົນສູງສຸດ ສະບັບເລກທີ 006 ວ່າດ້ວຍການດຳເນີນຄະດີ ຕໍ່ການຜະລິດປຸງແຕ່ງ, ຄ້າ-ຂາຍ, ຈໍາໜ່າຍ, ມີໄວ້ຄອບຄອງ ແລະ ເສບ, ພືດມີສານເສບຕິດ ເຊັ່ນ: ໃບກະທ່ອມ, ນ້ຳກະທ່ອມ ຫຼື ສານລະເຫີຍ ທີ່ມີສານເສບຕິດ.ສະນັ້ນ, ຈຶ່ງໄດ້ສຶກສາອົບຮົມກ່າວເຕື່ອນ ໄວລຸ້ນ ແລະ ຜູ້ທີ່ມົ້ວສຸມດື່ມນໍ້າໃບກະທ່ອມ, ໃຫ້ຢຸດເຊົາພຶດຕິກຳດັ່ງກ່າວ ເຊິ່ງເປັນການສ້າງຄວາມບໍ່ສະຫງົບຢູ່ໃນສັງຄົມ, ຜິດລະບຽບກົດໜາຍ ແລະ ລະເມີດຕໍ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.
ສຳລັບຜູ້ທີ່ວິຈານ, ໃສ່ຮ້າຍການປະຕິບັດໜ້າທີ່ວຽກງານຂອງເຈົ້າໜ້າທີ່ຕຳຫຼວດ ແມ່ນໃຫ້ຢຸດເຊົົາການສ້າງຄວາມປັ່ນປວນໃຫ້ແກ່ສັງຄົມ ຮັບຮູ້ໃນທາງທີ່ຜິດ; ໃນນີ້, ກໍໄດ້ແນະນຳທາງຄອບຄົວ, ພໍ່-ແມ່ ຜູ້ປົກຄອງ ໃຫ້ເປັນເຈົ້າການຕິດຕາມກວດກາສຶກສາອົບຮົມລູກ, ຫຼານ ບໍ່ໃຫ້ເຂົາເຈົ້າໄປພົວພັນກັບສິ່ງເສບຕິດທຸກປະເພດ ແລະ ການໂຄສະນາບິດເບືອນຄວາມຈິງ, ຂັດຕໍ່ແນວທາງພັກ-ລັດ ຜ່ານສື່ອອນລາຍ.
ຂ່າວ: ປກສ ແຂວງຫຼວງນ້ຳທາ, ວາລະສານປ້ອງກັນຄວາມສະຫງົບ