ໃນວັນທີ 12 ສິງຫາ ທີ່ຜ່ານມາ, ກອງບັນຊາການ ປກສ ເຂດເສດຖະກິດພິເສດສາມຫຼຽມຄໍາ ນໍາພາໂດຍທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼຽມຄຳ ພ້ອມຄະນະ ສົມທົບກັບຄະນະປະສານງານປ້ອງກັນຊາດປະຈຳເຂດ, ໜ່ວຍງານຮັກສາຄວາມປອດໄພຝ່າຍລາວ ແລະ ໜ່ວຍງານຮັກສາຄວາມປອດໄພຝ່າຍຈີນ ລວມກຳລັງທັງໝົດ 205 ຄົນ ລົງມ້າງກຸ່ມແກ້ງເຄືອຄ່າຍສໍ້ໂກງຊັບທາງໂທລະຄົມ (ຄໍເຊັນເຕີ) ຢູ່ພາຍໃນເຂດເສດຖະກິດພິເສດສາມຫຼຽມຄຳ ພ້ອມກັນ 3 ຈຸດ.
ສາມາດກັກຕົວຜູ້ຖືກຫາ ໄດ້ທັງໝົດ 771 ຄົນ ຍິງ 282 ຄົນ ລວມມີ 15 ສັນຊາດຄື: ສັນຊາດລາວ 275 ຄົນ, ຍິງ 143 ຄົນ, ມຽນມາ 231 ຄົນ, ຍິງ 93 ຄົນ, ຈີນ 106 ຄົນ, ຍິງ 5 ຄົນ, ຟີລິບປີນ 73 ຄົນ, ຍິງ 23 ຄົນ, ອິນເດຍ 29 ຄົນ, ຍິງ 2 ຄົນ, ອິນໂດເນເຊຍ 20 ຄົນ, ຍິງ 6 ຄົນ, ໂມຊໍາບີ 6 ຄົນ, ເອທິໂອເປຍ 11 ຄົນ, ຍິງ 02 ຄົນ, ອູການດາ 6 ຄົນ, ຍິງ 5 ຄົນ, ຫວຽດນາມ 5 ຄົນ, ຍິງ 1 ຄົນ, ຕູນິເຊຍ 4 ຄົນ, ອາວານດາ 2 ຄົນ, ໂຄລໍາເບຍ ເພດຍິງ 1 ຄົນ, ຈໍເຈຍ ເພດຍິງ 1 ຄົນ ແລະ ບູຣັນດີ 1 ຄົນ.ສາມາດຍຶດເຄື່ອງຂອງກາງ ຄອມພີວເຕີຕັ້ງໂຕະ 709 ຊຸດ, ຄອມພີວເຕີໂນດບຸກ 28 ໜ່ວຍ, ໂທລະສັບມືຖື 1,896 ໜ່ວຍ, ໄອແພັກ 02 ໜ່ວຍ ແລະ USB 10 ອັນ.
ສໍາລັບຜູ້ຖືກຫາ ສັນຊາດລາວແມ່ນໄດ້ເຮັດບົດບັນທຶກ ສຶກສາອົບຮົມກ່າວເຕືອນແລ້ວມອບໃຫ້ຍາດພີ່ນ້ອງມາເຊັນຮັບປະກັນ ພ້ອມນຳພາກັບຄືນທ້ອງຖິ່ນ, ຜູ້ຖືກຫາສັນຊາດຈີນ ຈຳນວນ 106 ຄົນ ຍິງ 05 ຄົນ ເຈົ້າໜ້າທີ່ກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ ໄດ້ນຳສົ່ງໃຫ້ເຈົ້າໜ້າທີ່ຈີນ ໃນວັນທີ 15 ສິງຫາ 2024 ຢູ່ດ່ານສາກົນບໍ່ເຕັນ-ບໍ່ຫານ ແຂວງ ຫຼວງນໍ້າທາ ຕາງໜ້າຝ່າຍລາວ ມອບໂດຍ ທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ ຕາງໜ້າຝ່າຍຈີນ ຮັບໂດຍ ພັອ ເຊີນ ຈີໂຈ ຫົວໜ້າກອງບັນຊາການ ປກສ ເມືອງ ຫຼ້າ, ສໍາລັບຜູ້ຖືກຫາສັນຊາດອື່ນແມ່ນມອບໃຫ້ສະຖານທູດແຕ່ລະປະເທດນຳໄປດຳເນີນຕາມລະບຽບການ.
ຂ່າວ-ພາບ: ທະວີສັກ, ຄວາມສະຫງົບ