ເມື່ອບໍ່ດົນມານີ້, ຫ້ອງການສາທາລະນະສຸກ ເມືອງວາປີ, ແຂວງສາລະວັນ ຈັດພິທີທຳລາຍສິນຄ້າເສື່ອມຄຸນ ແລະ ໝົດອາຍຸການນຳໃຊ້ ໂດຍການເຂົ້າຮ່ວມຂອງທ່ານ ຄໍາເບົ້າ ແກ້ວວິຈິດ ຮອງຫົວໜ້າຫ້ອງການ ສາທາລະນະສຸກ ເມືອງວາປີ, ພ້ອມດ້ວຍຄະນະກຳມະການກວດກາອາຫານ-ເຄື່ອງດື່ມຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຄໍາເບົ້າ ແກ້ວວິຈິດ ໄດ້ໃຫ້ຮູ້ວ່າ: ການທໍາລາຍ ສິນຄ້າເສື່ອມຄຸນ ແລະ ໝົດອາຍຸການນຳໃຊ້ ຢູ່ເມືອງວາປີ ໃນຄັ້ງນີ້ ເພື່ອເປັນການປະຕິບັດ ຕາມກົດໝາຍ ວ່າດ້ວຍ ອາຫານ ສະບັບເລກທີ 33/ສພຊ ລົງວັນທີ 24 ກໍລະກົດ 2013 ແລະ ແຜນການເຄື່ອນໄຫວ ຂອງຄະນະກຳມະການຄວບຄຸມຄຸນນະພາບອາຫານ-ເຄື່ອງດື່ມຂັ້ນເມືອງ ແລະ ເພື່ອເປັນການຄຸ້ມຄອງ ການບໍລິໂພກເຄື່ອງດື່ມ ເຄື່ອງໃຊ້ໃນເມືອງວາປີ ໃຫ້ຖືກຕ້ອງຕາມຫລັກການ, ລະບຽບການ ແລະ ກົດໝາຍ ວ່າດ້ວຍ ອາຫານ ແລະ ຢາ ທີ່ກຳນົດໄວ້.
ເຊິ່ງສິນຄ້າເສື່ອມຄຸນ ແລະ ໝົດອາຍຸການນຳໃຊ້ ແມ່ນໄດ້ຈາກຄະນະກຳມະການຄວບຄຸມຄຸນນະພາບອາຫານ ແລະ ເຄື່ອງດື່ມ ທີ່ເຄື່ອນໄຫວກັກ ແລະ ຢຶດໄດ້ນຳບັນດາຫົວໜ່ວຍທຸລະກິດຫ້າງຮ້ານ, ຮ້ານຂາຍເຄື່ອງອຸປະໂພກ-ບໍລິໂພກຕ່າງໆ ໃນແຕ່ລະແຫ່ງພາຍໃນເມືອງທັງໝົດ 30 ຮ້ານ, ມີ 158 ລາຍການ, ມີເຄື່ອງດື່ມທີ່ໝົດອາຍຸ ແລະ ເສື່ອມຄຸນ ເປັນປະເພດນໍ້າດື່ມ, ນໍ້າອັດລົມ, ນໍ້າໝາກໄມ້, ນົມ, ຂະໝົມ ແລະ ປະເພດເຄື່ອງສຳອາງ ລວມມູນຄ່າ 1 ລ້ານກວ່າກີບ.
ຂ່າວ: ປະເທດລາວ