ໃນວັນທີ 12 ສິງຫາ ທີ່ຜ່ານມາ, ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມຄະນະ ເຂົ້າຮ່ວມພິທີເປີດງານວາງສະແດງອຸປະກອນເຕັກນິກການທະຫານສາກົນ 2024, ຄັ້ງທີ 10 ຢູ່ສູນປະຊຸມ ແລະ ວາງສະແດງສາກົນປາຕຣີອົດ, ກູບິນກາ, ນະຄອນຫຼວງມົດສະກູ, ສະຫະພັນຣັດເຊຍ, ໂດຍມີບັນດາຄະນະນຳຈາກກະຊວງປ້ອງກັນປະເທດ ແລະ ຕົວແທນອຸດສາຫະກຳຈາກປະເທດຕ່າງໆ, ບັນດາບໍລິສັດຂອງສະຫະພັນຣັດເຊຍ ແລະ ຈາກຕ່າງປະເທດ ເຂົ້າຮ່ວມ.
ງານວາງສະແດງ ອຸປະກອນເຕັກນິກການທະຫານສາກົນ 2024 ຈັດຂຶ້ນໃນລະຫວ່າງວັນທີ 12-14 ສິງຫາ 2024, ໂດຍສະແດງໃຫ້ເຫັນ ບັນດາເຕັກໂນໂລຊີຕ່າງໆຫຼາຍຮູບແບບ, ມີທັງອາວຸດຍຸດໂທປະກອນ, ເຕັກນິກການທະຫານ ທີ່ມີຄວາມທັນສະໄໝທີ່ສຸດ, ມີເອກະລັກສະເພາະຕົວ ຈາກປະເທດລັດເຊຍ, ເຊິ່ງມີບໍລິສັດຊັ້ນນຳ ທີ່ໄດ້ຮັບການຍ້ອງຍໍໃນລະດັບສາກົນ.
ນອກນັ້ນ, ສປ ຈີນ, ເບຣາລຸດ, ອີຣານ, ອິນເດຍ ເຂົ້າຮ່ວມ ແລະ ມີຕົວແທນບໍລິສັດຈາກຕ່າງປະເທດ ທີ່ລົງທະບຽນເຂົ້າຮ່ວມຫຼາຍກວ່າ 120 ແຫ່ງ, ມີຜະລິດຕະພັນປະມານ 1,500 ລາຍການ ແລະ ໄດ້ຮັບຄວາມສົນໃຈຫຼາຍ ຈາກຕົວແທນຜູ້ຊ່ຽວຊານ ແລະ ສື່ຈາກຕ່າງປະເທດ.
ພ້ອມກັນນີ້, ຍັງເປັນບ່ອນພົບປະ, ປຶກສາຫາລື, ແລກປ່ຽນປະສົບການ, ເພີ່ມທະວີການຮ່ວມມືດ້ານການຜະລິດ, ສະໜອງອຸປະກອນເຕັກນິກການທະຫານ ໃຫ້ບັນດາບໍລິສັດຕ່າງໆຂອງຣັດເຊຍ ແລະ ບໍລິສັດອື່ນໆຈາກຕ່າງປະເທດ, ເພື່ອສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ຊຸກຍູ້ປົກປັກຮັກສາສັນຕິພາບ ແລະ ສະຖຽນລະພາບຢູ່ພາກພື້ນ ແລະ ສາກົນ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ, ພ້ອມຄະນະ ກໍໄດ້ຢ້ຽມຊົມຫ້ອງວາງສະແດງ ບໍລິສັດອາວມາສ-ອັນເຕວ ບໍລິສັດຜະລິດລະບົບປ້ອງກັນອາກາດ ແລະ ເຣດາ, ຢ້ຽມຊົມຫ້ອງວາງສະແດງ ບໍລິສັດຍົນທີ່ຂຶ້ນຊື່ຂອງຣັດເຊຍ, ບໍລິສັດໂຣສອາບາໂຣນເອັກສະປອດ ແລະ ພົບປະກັບບໍລິສັດຈຳນວນໜຶ່ງຕື່ມອີກ.
ຂ່າວ-ພາບ: ຮ້ອຍເອກ ທອງມາ ໄຊຍະເພັງສາ, ປະເທດລາວ