ທ່ານ ພັຕ ອານຸພອນ ຫລວງພະຈັນ ຫົວໜ້າພະແນກປ້ອງກັນເສດຖະກິດ ປກສ ແຂວງຫລວງນ້ຳທາ ໄດ້ລາຍງານສະພາບກ່ຽວກັບການແກ້ໄຂ ຄະດີພັນທະບັດປອມ(ເງິນປອມ)ວ່າ: ໃນວັນທີ 17 ມິຖຸນາ 2024 ຜ່ານມາ, ກອງບັນຊາການ ປກສ ເມືອງນາແລ, ແຂວງຫຼວງນ້ຳທາ ໄດ້ຮັບແຈ້ງຈາກພົນລະເມືອງດີວ່າ: ມີຄົນເອົາສະກຸນເງິນກີບ ມາໃຊ້ຈ່າຍຢູ່ແຖວຕະຫຼາດຂອງ ເມືອງນາແລ. ຈາກນັ້ນ, ຈຶ່ງໄດ້ແຕ່ງຕັ້ງພະນັກງານວິຊາສະເພາະ ລົງເກັບກຳຂໍ້ມູນຈຶ່ງຮູ້ວ່າແມ່ນ ນາງ ສືບ ຢູ່ເມືອງນາແລ, ເປັນຜູ້ເອົາເງິນປອມປະເພດໃບ 50,000 ມາໃຊ້ຈ່າຍຢູ່ແຖວຕະຫຼາດ ແລະ ໄດ້ນຳເອົາຜູ້ກ່ຽວ, ພ້ອມຂອງກາງເງິນກີບ 5,100,000 ກີບ (ປະເພດໃບ 50,000) ມາດໍາເນີນການສອບສວນ.
ນາງ ສືບ ໄດ້ໃຫ້ການວ່າ: ວັນທີ 16 ມິຖຸນາ 2024 ຕົນໄດ້ນຳເອົາເງິນ 1,500 ຢວນ ແລກປ່ຽນເງິນກີບນຳ ທ້າວ ວັນໄຊ, ຄົນແຂວງບໍ່ແກ້ວ(ໂຊເຟີລົດ)ໄດ້ເງິນຈຳນວນ 5,550,000 ກີບ ໄດ້ໃຊ້ຈ່າຍ ແລະ ເປັນຄ່າໂດຍສານໄປ ເມືອງນາແລ, ມາໃນວັນທີ 17 ມິຖຸນາ 2024 ນາງສືບ ໄດ້ເອົາເອົາເງິນກີບທີ່ຕົນໄດ້ປ່ຽນນໍາ ທ້າວ ວັນໄຊ ໄປຊື້ເຄື່ອງຢູ່ຕະຫລາດເມືອງນາແລ (ໃນເບື້ອງຕົ້ນຜູ້ກ່ຽວກໍບໍ່ຮູ້ເງິນທີ່ໄປແລກນັ້ນແມ່ນເງິນປອມ). ຈາກນັ້ນ, ກອງບັນຊາການ ປກສ ເມືອງນາແລ ໄດ້ສົມທົບກັບ ກອງບັນຊາການ ປກສ ແຂວງຫຼວງນ້ຳທາ ພ້ອມທັງແຕ່ງຕັ້ງພະແນກຕໍາຫລວດເສດຖະກິດ ເພື່ອນໍາຕົວຜູ້ຖືກຫາ ແລະ ຂອງກາງມາດໍາເນີນຄະດີ.
ຜ່ານການສອບສວນຂະຫຍາຍຜົນ ໃນວັນທີ 22 ມິຖຸນາ 2024 ພະແນກຕໍາຫຼວດເສດຖະກິດ ປກສ ແຂວງຫລວງນ້ຳທາ ໄດ້ສົມທົບກັບ ກອງບັນຊາການ ປກສ ແຂວງບໍ່ແກ້ວ ຕິດຕາມເປົ້າໝາຍທີ່ ນາງສືບ ໄດ້ຊັກທອດຫາຜູ້ທີ່ເອົາເງິນມາແລກປ່ຽນນໍາ, ຈົນຮອດມາວັນທີ 25 ມິຖຸນາ 2024 ສາມາດກັກຕົວ ທ້າວ ວັນໄຊ ໄດ້ຢູ່ເມືອງຫ້ວຍຊາຍ, ແຂວງບໍ່ແກ້ວ ແລະ ຜູ້ກ່ຽວກໍໄດ້ຊັກທອດຫາ ທ້າວ ພອນສະຫວັນ (ສັນຊາດໄທ) ຢູ່ແຂວງຊຽງລາຍ, ປະເທດໄທ ແລະ ມາຮອດວັນວັນທີ 27 ມິຖຸນາ 2024 ສາມາດກັກຕົວ ທ້າວ ພອນສະຫວັນ ພ້ອມຂອງກາງເງິນກີບປອມ ຈໍານວນ 1 ລ້ານກີບ ມາດຳເນີນການສອບສວນ.
ພວກກ່ຽວທັງ 2 ທັງຮັບສາລະພາບວ່າ: ເງິນກີບປອມແມ່ນເອົາມາແຕ່ປະເທດໄທ ຈໍານວນ 24 ລ້ານກີບ, ໄດ້ມາໃຊ້ຈ່າຍຢູ່ ແຂວງບໍ່ແກ້ວ ແລະ ແລກປ່ຽນເປັນເງິນຢວນ, ຈໍານວນໜຶ່ງໃຊ້ຈ່າຍຍັງເຫຼືອ 6,550,000 ກີບ, ໄດ້ແລກປ່ຽນເອົາເງິນຢວນນໍາ ນາງ ສືບ 1,500 ຢວນ ເປັນເງິນກີບ 5,550,000 ກີບ ແລະ ໄດ້ຮັກສາໄວ້ 1 ລ້ານກີບ. ປັດຈຸບັນ, ຄະດີດັ່ງກ່າວ, ກໍາລັງເກັບກໍາຂໍ້ມູນ ແລະ ຂະຫຍາຍຜົນຫາກຸ່ມແກ້ງ ເພື່ອນໍາມາດໍາເນີນຄະດີຕາມຂະບວນຍຸຕິທໍາ.
ຂ່າວ: ປະເທດລາວ