ຂ່າວ ປກສ ແຂວງຫົວພັນ ລາຍງານວ່າ: ໃນທ້າຍເດືອນກໍລະກົດ ທີ່ຜ່ານມາ, ເຈົ້າໜ້າທີ່ ປກສ ເມືອງແອດ, ແຂວງຫົວພັນ ພ້ອມດ້ວຍພາກສ່ວນກ່ຽວຂ້ອງ ໄດ້ນຳຕົວ ທ້າວ ກໍ້ ແລະ ທ້າວ ຜິວ ປະຊາຊົນ ບ້ານເບ້ຍ, ເມືອງແອດ, ແຂວງຫົວພັນ ມາສ້າງແຜນຈຳລອງເຫດການຄືນປະກອບຄຳຮັບສາລະພາບໃນຄະດີລັກຊັບເພື່ອປະກອບສຳນວນຄະດີ ຕາມຂັ້ນຕອນຂອງກົດໝາຍ.
ເຫດການລັກຊັບ ເກີດຂຶ້ນເມື່ອວັນທີ 8 ມິຖຸນາ ທີ່ຜ່ານມາ ທ້າວ ກໍ້ ແລະ ທ້າວ ຜິວ ໄດ້ໄປລັກຊັບສິນ ຢູ່ເຮືອນຂອງທ້າວ ທອງໄມ ປະຊາຊົນບ້ານລູ້, ເມືອງແອດ, ປະກອບມີ: ຄຳ 68 ບາດ 3 ສະຫຼຶງ, ເງິນສົດ 14 ລ້ານກວ່າກີບ ແລະ ໂທລະສັບ 1 ໜ່ວຍ, ພາຍຫຼັງເຈົ້າໜ້າທີ່ໄດ້ຮັບແຈ້ງຄວາມເສຍຫາຍ ຈຶ່ງໄດ້ສົມທົບກັບ ພາກສ່ວນກ່ຽວຂ້ອງລົງກວດກາສະຖານທີ່ເກີດເຫດ ແລະ ສາມາດກັກຕົວຜູ້ກໍ່ເຫດໄດ້ 2 ຄົນຄື: ທ້າວ ກໍ້ ແລະ ທ້າວ ຜິວ ໃນວັນທີ 14 ມິຖຸນາ 2024 ມາດຳເນີນການສືບສວນ-ສອບສວນ.
ຊັບສິນທີ່ລັກໄດ້ມີ ສາຍຄໍຄຳ 22 ເສັ້ນ, ແຫວນ 8 ວົງ, ຕ່ອງຫູ 99 ຕ່ອງ, ໂທລະສັບ 1 ໜ່ວຍ ແລະ ເງິນກີບ 14,300,000 ກີບ; ໂດຍໄດ້ແບ່ງເງິນໃຫ້ ທ້າວ ກໍ້ 7,000,000 ກີບ ກັບ ໂທລະສັບ 1 ໜ່ວຍ, ທ້າວ ຜິວ ໄດ້ເງິນ 7,300,000 ກີບ; ສ່ວນຄໍາ ໄດ້ຕົກລົງໃຫ້ທ້າວ ຜິວ ຮັກສາໄວ້ຖ້າມີໂອກາດປີໜ້າ ຈຶ່ງເອົາໄປຂາຍໄດ້ເງິນມາແລ້ວຈຶ່ງແບ່ງກັນ.ປັດຈຸບັນ, ເຈົ້າໜ້າທີ່ສາມາດກັບກູ້ຊັບສິນທີ່ເສຍຫາຍມາໄດ້ມີ ຄຳ 33 ບາດ 1 ສະຫຼຶງ, ໂທລະສັບ 1 ໜ່ວຍ ແລະ ເງິນ 6,800,000 ກີບ.
ຂ່າວ: ປກສ ແຂວງຫົວພັນ