ສຳນັກຂ່າວຕ່າງປະເທດລາຍງານໃນວັນທີ 4 ສິງຫາ 2024 ຜ່ານມາກ່ຽວກັບເຫດການສຸດສະຫຼົດ ເມື່ອຊາຍຊາວອິນໂດເນເຊຍ ໃຈຮ້າຍຕີເພື່ອນບ້ານອາຍຸ 60 ປີຈົນເສຍຊີວິດ ເພາະອີກຝ່າຍມັກຖາມວ່າເປັນຫຍັງອາຍຸ 45 ປີແລ້ວຄືຍັງບໍ່ແຕ່ງງານ.
ຕາມການລາຍງານລະບຸວ່າ: ຊາຍຊາວອິນໂດເນເຊຍມີຊື່ວ່າ: ຊິເຣກາ ອາຍຸ 45 ປີ ໄດ້ຖືກຈັບກຸມຂໍ້ຫາກໍ່ເຫດຄາຕະກຳຜູ້ອື່ນໂດຍເຈດຕະນາ ທາງດ້ານເຫຍື່ອຜູ້ເສຍມີຊື່ວ່າ ທ້າວ ອັສລິມ ທີ່ເປັນເພື່ອນບ້ານອາຍຸ 60 ປີ ເຊິ່ງເຫດການດັ່ງກ່າວໄດ້ເກີດຂຶ້ນໃນເຂດປົກຄອງຕາປານູລີໃຕ້ ທີ່ຢູ່ເທິງເກາະສຸມາຕຣາເໜືອ ໃນປະເທດອິນໂດເນຍເຊຍ.
ທາງດ້ານເມຍຜູ້ເສຍຊີວິດໄດ້ເລົ່າວ່າ: ຢູ່ດີໆ ທ້າວຊິເຣກາ ອາຍຸ 45 ປີ ກໍໄດ້ບຸກເຂົ້າໄປໃນບ້ານທີ່ພວກເຂົາທັງສອງໄດ້ອາໃສຢູູ່ ພ້ອມກັບຈັບໄມ້ໜ້າສາມ ແລະ ເຂົ້າມາທຳຮ້າຍສາມີຂອງຕົນໂດຍທີ່ບໍ່ທັນຕັ້ງຕົວ, ທາງດ້ານ ອັສລິມ ຈຶ່ງໄດ້ແລ່ນໜີອອກໄປຢູ່ຫົນທາງກ່ອນ ຈະຖືກໄລ່ຕາມມາໄດ້ ແລະ ຖືກທຸບອີກຄັ້ງທີ່ບໍລິເວນຫົວ ຈາກນັ້ນ ທ້າວ ຊິເຣກາ ກໍໄດ້ທຸບຕີຢ່າງຕໍ່ເນື່ອງ.
ຈົນມີຜູ້ເຫັນເຫດການໄດ້ເຂົ້າມາຊ່ວຍເຫຼືອ ແລະ ຮີບນຳໂຕ ອັສລິມ ໄປໂຮງໝໍທັນທີແຕ່ໂຊກຮ້າຍບໍ່ສາມາດຍື້ເອົາຊີວິດລະຫວ່າງທາງໄວ້ໄດ້ ທາງດ້ານເຈົ້າໜ້າທີ່ຈຶ່ງທຳການຈັບກຸມ ທ້າວ ຊິເຣກາ ທັນທີຫຼັງເກີດເຫດ.