ກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມປຶກສາຫາລືສົ່ງເສີມການນໍາໃຊ້ເງິນກີບ ແລະ ວຽກງານຄຸ້ມຄອງເງິນຕາຕ່າງປະເທດໃນຂົງເຂດການສຶກສາ (ການຕິດຕາມກວດກາ ການໂຄສະນາການຊຳລະ ແລະ ການຮັບໃຊ້ຊໍາລະຄ່າບໍລິການການສຶກສາ) ຂຶ້ນວັນທີ 1 ສິງຫາ ນີ້ ທີ່ສໍານັກງານ ທຫລ ພາຍໃຕ້ການເປັນປະທານຂອງ ທ່ານ ສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທຫລ ແລະ ທ່ານ ນາງ ດາລາວອນ ສິດທິພັນ ຫົວໜ້າຫ້ອງການກະຊວງສຶກສາທິການ ແລະ ກິລາ ພ້ອມພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອເຮັດໃຫ້ຜູ້ເຂົ້າຮ່ວມໄດ້ເຂົ້າໃຈຫຼາຍຂຶ້ນກ່ຽວກັບການຊຸກຍູ້ ສົ່ງເສີມການນຳໃຊ້ເງິນກີບ ໃນການໃຊ້ຈ່າຍຕ່າງໆ ພາຍໃນປະເທດເຮົາ ສະເພາະຂົງເຂດການສຶກສາ ໃນການເສຍຄ່າໂຮງຮຽນ, ຈ່າຍເງິນເດືອນໃຫ້ພະນັກງານ, ຄູ-ອາຈານ ແລະ ການຈັດຊື້ອຸປະກອນການຮຽນ-ການສອນຕ່າງໆ, ເນື່ອງຈາກຜ່ານມາອາດມີບາງສະຖາບັນການສຶກສາທີ່ເກັບຄ່າຮຽນເປັນເງິນຕາຕ່າງປະເທດ ທີ່ສ້າງຄວາມຫຍຸ້ງຍາກໃຫ້ແກ່ຜູ້ປົກຄອງນັກຮຽນ ທີ່ບໍ່ມີເງິນຕາຕ່າງປະເທດ ຕ້ອງໄດ້ເອົາເງິນກີບໄປແລກປ່ຽນເອົາເງິນຕາຕ່າງປະເທດມາຈ່າຍຄ່າຮຽນ.
ເຊິ່ງກອງປະຊຸມຄັ້ງນີ້ ເປັນການປຸກລະດົມທຸກຂົງເຂດວຽກງານ ແລະ ທຸກພາກສ່ວນໃນສັງຄົມ, ພ້ອມກັນໃຊ້ເງິນກີບ ແລະ ຫຼຸດຜ່ອນການໃຊ້ຈ່າຍເງິນຕາຕ່າງປະເທດ, ເພື່ອເປັນການແກ້ໄຂບັນຫາເຄັ່ງຮ້ອນຂອງລັດຖະບານ ໃນຜ່ານມາກຸ້ມຄອງຄອງເງິນ ຕາຕ່າງປະເທດ
ຂ່າວ: ປະຊາຊົນ