ຕາມການລາຍງານຫ້ອງການໂຍທາທິການ ແລະ ຂົນສົ່ງເມືອງໄດ້ໃຫ້ຮູ້ວ່າ: ໃນໄລຍະຕົ້ນເດືອນກໍລະກົດ 2024 ເປັນຕົ້ນມາ ຫ້ອງການໂຍທາທິການ ແລະ ຂົນສົ່ງເມືອງ, ນໍາໂດຍທ່ານ ຄໍາຫຼ້າ ສຸພັນເດດ ຮັກສາການຫົວໜ້າຫ້ອງການໂຍທາທິການ ແລະ ຂົນສົ່ງເມືອງ, ທ່ານ ພອນເພັດ ອຸດົມມີໄຊ ກໍາມະການພັກເມືອງ ຫົວໜ້າຫ້ອງການພະລັງງານ ແລະ ບໍ່ແຮ່ເມືອງ, ພ້ອມພາກສ່ວນຮັບຜິດຊອບໂຄງການ ໄດ້ລົງຕິດຕາມ-ກວດກາ ການປັບປຸງ ແລະ ກໍ່ສ້າງເສັ້ນທາງຫຼວງຂອງເມືອງ, ເລກທີ 4848 ລະຫວ່າງບ້ານຄົກເຂົ້າດໍ ຜ່ານບ້ານຄົກງີ້ວ ແລະ ສິ້ນສຸດຢູ່ບ້ານຫ້ວຍຂະແຍງ, ລວມໄລຍະຄວາມຍາວຂອງເສັ້ນທາງທັງໝົດ 16 ກິໂລແມັດ.
ການປັບປຸງກໍ່ສ້າງເສັ້ນທາງດັ່ງກ່າວ ແມ່ນຢູ່ພາຍໃຕ້ຄວາມຮັບຜີດຊອບຂອງບໍລິສັດຈັນທະມີໄຊ ກໍ່ສ້າງຄົບວົງຈອນຈໍາກັດຜູ້ດຽວ ເປັນຜູ້ຮັບຜິດຊອບໃນການສໍາປະທານກໍ່ສ້າງ ພາຍໃຕ້ສັນຍາລະຫວ່າງຫ້ອງການໂຍທາທິການ ແລະ ຂົນສົ່ງເມືອງກັບບໍລິສັດດັ່ງກ່າວ, ພາຍໃນກໍານົດເວລາ 6 ເດືອນ.
ເຊິ່ງບັນດາໜ້າວຽກທີ່ໄດ້ຈັດຕັ້ງປະຕິບັດລວມມີ: ການກໍ່ສ້າງລະບົບລະບາຍນໍ້າ-ທໍ່ຂ້າມທາງ, ການປັບເກດໜ້າດິນ ແລະ ຮ່ອງນໍ້າ, ການຖົມດິນຍົກລະດັບອັດແໜ້ນໜ້າທາງ ແລະ ອະນາໄມຂອບເຂດສອງຟາກທາງ.
ໂຄງການດັ່ງກ່າວ ແມ່ນໄດ້ຮັບທຶນພັດທະນາທ້ອງຖິ່ນຈາກຫ້ອງການພະລັງງານ ແລະ ບໍ່ແຮ່ເມືອງ ມູນຄ່າ 1,980,435,197 ກີບ, ທຶນສົມທົບຂອງເມືອງມູນຄ່າ 146,060,000 ກີບ, ທຶນສົມທົບຂອງບ້ານຫ້ວຍຂະແຍງມູນຄ່າ 65,000,000 ກີບ, ບ້ານຄົກງີ້ວ ມູນຄ່າ 53,620,000 ກີບ ແລະ ບ້ານຄົກເຂົ້າດໍ ມູນຄ່າ 7,750,000 ກີບ, ລວມມູນຄ່າທັງໝົດ 2,252,865,197 ກີບ.
ຂ່າວ: ເມືອງຊະນະຄາມ, ແຂວງວຽງຈັນໂພສ໌