ໃນວັນທີ 15 ກໍລະກົດທີ່ຜ່ານມາ, ກົມແຂ່ງຂັນທາງທຸລະກິດ ແລະ ກວດກາສິນຄ້າ ກະຊວງອຸດສາຫະກຳ ແລະ ການຄ້າໄດ້ທຳລາຍສິນຄ້າລອກແບບ ແລະ ປອມແປງເຄື່ອງໝາຍການຄ້າ ປະເພດເຄື່ອງສຳອາງ, ເຂົ້າຮ່ວມພິທີໂດຍທ່ານ ພູວຽງ ພົງສາ ຫົວໜ້າກົມແຂ່ງຂັນທາງທຸລະກິດ ແລະ ກວດກາການຄ້າ, ທ່ານ ສົມຊາຍ ນົງລາດ ຮອງຫົວໜ້າກົມແຂ່ງຂັນທາງທຸລະກິດ ແລະ ກວດກາການຄ້າ, ພ້ອມດ້ວພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ແກ້ວພະໄທ ສູນນາລາດ ຫົວໜ້າພະແນກກວດກາການຄ້າ, ກົມແຂ່ງຂັນທາງທຸລະກິດ ແລະ ກວດກາການຄ້າ ໄດ້ລາຍງານວ່າ: ເພື່ອເປັນການສົ່ງເສີມການແຂ່ງຂັນທາງທຸລະກິດທີ່ເປັນທຳ, ສ້າງການດຳເນີນທຸລະກິດທີ່ເປັນທຳ, ຕ້ານການແຂ່ງຂັນທາງທຸລະກິດທີ່ບໍ່ເປັນທຳ ເຮັດໃຫ້ສັງຄົມໄດ້ຮັບຄວາມເສຍຫາຍຈາກສິນຄ້າລອກແບບ, ສິນຄ້າລະເມີດເຄື່ອງໝາຍການຄ້າ, ບໍ່ໄດ້ມາດຕະຖານ, ສົ່ງຜົນຕໍ່ຊີວິດ ແລະ ສຸຂະພາບຜູ້ຊົມໃຊ້.
ເຊິ່ງເຈົ້າໜ້າທີ່ໄດ້ປະສານສົມທົບກັບກົມຕຳຫຼວດສິ່ງແວດລ້ອມ, ກະຊວງປ້ອງກັນຊາດ-ປ້ອງກັນຄວາມສະຫງົບ, ກົມອາຫານ-ຢາ, ກະຊວງສາທາລະນະສຸກ ໄດ້ລົງກວດກາເປົ້າໝາຍພາຍໃນ ນະຄອນຫຼວງວຽງຈັນ 4 ຈຸດ, ພາຍຫຼັງກວດກາພົບເຫັນສິນຄ້າລອກແບບຄີມທາຜິວຍີ່ຫໍ້ vaseline ເປັນ vaseilina, vascleaing ຈຳນວນ 923 ຕຸກ, ຄີມອາບນໍ້າ Lux ເປັນ Lvx ຈຳນວນ 987 ຕຸກ, ລວມມູນຄ່າ 33,425,000 ກີບ, ເຊິ່ງເຈົ້າຂອງສິນຄ້າບໍ່ມີເອກະສານຢັ້ງຢືນແຫຼ່ງທີ່ມາຂອງສິນຄ້າ, ບໍ່ໄດ້ຮັບອະນຸຍາດຈາກຂະແໜງການກ່ຽວຂ້ອງ, ບໍ່ມີ ອຢ, ລະເມີດເຄື່ອງໝາຍການຄ້າ, ບໍ່ຕິດສະຫຼາກເປັນພາສາລາວ….
ດັ່ງນັ້ນ, ເຈົ້າໜ້າທີ່ໄດ້ຍຶດສິນຄ້າດັ່ງກ່າວ, ພ້ອມທຳລາຍດ້ວຍການຖອກລົງຖັງໃຫຍ່ລວມກັນ ແລ້ວທຳລາຍຖິ້ມ. ສ່ວນເຈົ້າຂອງສິນຄ້າແມນໄດ້ຖືກດຳເນີນຄະດີຕາມລະບຽບກົດໝາຍ
ຂ່າວ: ເສດຖະກິດ-ການຄ້າ