ໃນ 6 ເດືອນຕົ້ນປີ 2024 ແຂວງເຊກອງ ສາມາດເກັບລາຍຮັບເຂົ້າງົບປະມານໄດ້ 234,30 ຕື້ກີບ ທຽບໃສ່ແຜນປີເທົ່າກັບ 79% ໃນນີ້, ພູດສູນກາງປະຕິບັດຢູ່ທ້ອງຖິ່ນ 45,56 ຕື້ກີບ ເທົ່າກັບ 59% ແລະ ລາຍຮັບພູດຂອງແຂວງ 188,74 ຕື້ກີບ ທຽບໃສ່ແຜນປີເທົ່າກັບ 85%; ສ່ວນດ້ານລາຍຈ່າຍປະຕິບັດໄດ້ 182,70 ຕື້ກີບ ທຽບໃສ່ແຜນປີເທົ່າກັບ 47%.
ທ່ານ ຂັນຕີ ສີລະວົງສາ ຮອງເຈົ້າແຂວງໆເຊກອງ ລາຍງານໃນກອງປະຊຸມຄົບຄະນະບໍລິຫານງານພັກແຂວງ (ເປີດກວ້າງ) ຄັ້ງທີ 10 ສະໄໝທີ X ໃນວັນທີ 10 ກໍລະກົດ 2024 ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2024 ເຫັນວ່າ ມີຫລາຍຂະແໜງການສາມາດປະຕິບັດໄດ້ຕາມແຜນ ແລະ ລື່ນແຜນການທີ່ວາງໄວ້.
ໂດຍສະເພາະ, ຂະແໜງກະສິກໍາ ແລະ ປ່າໄມ້ ສາມາດເກັບກູ້ຜົນຜະລິດເຂົ້ານາແຊງ ໄດ້ 2.946 ໂຕນ ທຽບໃສ່ແຜນປີເທົ່າກັບ 74%; ພືດສະບຽງອາຫານ 8.234 ໂຕນ ເທົ່າກັບ 100% ແລະ ພືດເປັນສິນຄ້າ 10.634 ໂຕນ ທຽບໃສ່ແຜນປີເທົ່າກັບ 100%. ນອກນີ້, ຍັງໄດ້ຊຸກຍູ້ສົ່ງເສີມການລ້ຽງສັດໃຫ້ຂະຫຍາຍຕົວ 1-2%, ເຊິ່ງທົ່ວແຂວງມີສັດລ້ຽງປະເພດຄວາຍ 25.756 ໂຕ, ງົວ 43.025 ໂຕ, ໝູ 64.555 ໂຕ, ແບ້ 19.810 ໂຕ ແລະ ສັດປີກ 986.562 ໂຕ.
ພ້ອມນີ້, ຍັງໄດ້ຍົກສູງປະສິດທິພາບການລົງທຶນ ໂດຍສຸມໃສ່ການກໍ່ສ້າງພື້ນຖານໂຄງລ່າງທີ່ຈຳເປັນ, ຈັດສັນທີ່ດິນ, ປູກໄມ້ໃຫ້ເປັນປ່າ, ລ້ຽງງົວແບບເປັນຟາມ, ຂຸດຄົ້ນແຮ່ທາດ, ການກໍ່ສ້າງເຂື່ອນໄຟຟ້າ, ສົ່ງເສີມວິຊາການ ແລະ ພັດທະນາຊັບພະຍາກອນມະນຸດ ພ້ອມທັງສ້າງໂອກາດໃຫ້ແມ່ຍິງ, ໄວໜຸ່ມ-ເດັກນ້ອຍ, ຜູ້ອາວຸໂສ-ຜູ້ດ້ອຍໂອກາດ ໄດ້ຮັບການພັດທະນາ ແລະ ປະກອບສ່ວນໃນການພັດທະນາເສດຖະກິດ-ສັງຄົມ. ນອກນີ້, ຍັງພັດທະນາພື້ນຖານໂຄງລ່າງ ໃຫ້ສາມາດເຊື່ອມຈອດ-ເຊື່ອມໂຍງພາຍໃນ, ພາກພື້ນ ແລະ ສາກົນ ເພື່ອອໍານວຍຄວາມສະດວກ ແກ່ການຜະລິດ, ການບໍລິການ, ການຄ້າ-ການລົງທຶນ, ສ້າງອາຊີບ ແລະ ວຽກເຮັດງານທໍາ ທີ່ໝັ້ນຄົງໃຫ້ປະຊາຊົນ.
ຂ່າວ-ພາບ: ສັນຍາ, ປະເທດລາວ