ພະແນກຕໍາຫຼວດ ປກສ ເມືອງໄຊຍະບູລີ ສົມທົບກັບ ປກສ ກຸ່ມບ້ານສີເມືອງ ລົງແກ້ໄຂກຸ່ມໄວ້ລຸ້ນມົ້ວສຸມດື່ມນໍ້າກະທ້ອມຢູ່ເທດສະບານເມືອງໄຊຍະບູລີ, ແຂວງໄຊຍະບູລີ ສາມາດກັກຕົວເປົ້າໝາຍໄດ້ 4 ຄົນ, ຍິງ 1 ຄົນ ມາສຶກສາອົບຮົມ ແລະ ເຮັດບົດບັນທຶກກ່າວເຕື່ອນ, ເຂົ້າຮ່ວມມີ ພັທ ແສງຈັນ ສີສົມບັດ ຮອງຫົວໜ້າກອງບັນຊາການ ປກສ ເມືອງໄຊຍະບູລີ ພ້ອມດ້ວຍໜ່ວຍງານວິຊາສະເພາະ, ນາຍບ້ານ, ຜູ້ປົກຄອງ ແລະ ພວກມົ້ວສຸມນໍ້າກະທ້ອມ ເຂົ້າຮ່ວມ.
ເພື່ອເປັນການສຶກສາອົບຮົມໃຫ້ພວກກ່ຽວທັງ 4 ຄົນ ຮັບຮູ້ ແລະ ເຂົ້າໃຈລະບຽບຂອງກໍາລັງປ້ອງກັນຄວາມສະຫງົບ ຈໍາແນກໄດ້ສິ່ງທີ່ຜິດ ແລະ ຖືກ, ຮັບຮູ້ໄດ້ເຖິງແນວທາງນະໂຍບາຍຂອງພັກ-ລັດ, ຜົນຮ້າຍ ແລະ ໄພອັນຕະລາຍຂອງນໍ້າກະທ້ອມ ກໍຄືສິ່ງເສບຕິດທຸກປະເພດ ເປັນໄພຮຸກຮານຕໍ່ສັງຄົມ ແລະ ປະເທດຊາດບ້ານເມືອງ. ຈາກນັ້ນ, ກໍໄດ້ເຮັດບົດບັນທຶກສຶກສາອົບຮົມ ແລະ ມອບໃຫ້ພໍ່ແມ່ຜູ້ປົກຄອງ ນໍາໄປສຶກສາອົບຮົມຕື່ມອີກ ເພື່ອເຮັດໃຫ້ເຂົ້າເຈົ້າກາຍເປັນຄົນດີໃນສັງຄົມ.
ຂ່າວ: ວາລະສານປ້ອງກັນຄວາມສະຫງົບ