ງານມະຫາກຳກີລາແຫ່ງຊາດ ຄັ້ງທີ X ຫຼື ອຸດົມໄຊເກມ ຢູ່ທີ່ແຂວງອຸດົມໄຊ ໄດ້ໄຂຂຶ້ນຢ່າງເປັນທາງການ ໃນວັນທີ 13
ທັນວາ 2014 ໂດຍການເປັນກຽດເຂົ້າຮ່ວມຂອງທ່ານ ຈູມມາລີ ໄຊຍະສອນ ປະທານປະເທດແຫ່ງ ສປປ ລາວ ທ່ານ
ຄຳຫຼ້າ ລິ້ງນະສອນ ເຈົ້າແຂວງອຸດົມໄຊ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ທ່ານ ດຣ. ພັນຄຳ
ວິພາວັນ ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກີລາ ພ້ອມດ້ວຍບັນດາການນຳ
ພັກ-ລັດ ແຂກທັງພາຍໃນ ແລະ ຕ່າງປະເທດ ຄະນະນຳຄູເຝິກ ແລະ ນັກກີລາຈາກ 17 ແຂວງ 1 ນະຄອນຫຼວງ 7 ກະ
ຊວງ ພ້ອມດ້ວຍມວນຊົນຊາວແຂວງອຸດົມໄຊ ເຂົ້າຮ່ວມ.
ສຳລັບພິທີເປີດງານອຸດົມໄຊເກມ ປະກອບມີ 32 ກ້ອນສວນສະໜາມເຊັ່ນ: ຂະບວນກອງດຸລິຍາງ ປ້າຍຄຳຂວັນງານ
ມະຫາກຳກີລາແຫ່ງຊາດ ໂລໂກ ທຸງຊາດ-ທຸງກີລາ ກຳມະການຕັດສິນ ບັນດາກະຊວງ ແລະ ບັນດາແຂວງຕ່າງໆ ພ້ອມ
ດ້ວຍເຈົ້າພາບ ແລະ ປິດທ້າຍດ້ວຍຂະບວນປອດຄວັນຢາສູບ ການສະແດງສິລະປະວັດທະນະທຳຮີດຄອງປະເພນີເຖິງ
6 ລາຍການໃຫຍ່ຄື: ຍິນດີຕ້ອນຮັບສູ່ອຸດົມໄຊເກມ ສຽງກອງໄຊໃນມື້ບຸນເຜົ່າລື້ ສຽງດົນຕີໄມ້ໄຜ່ເທິງພູດອຍ ຕາມມາ
ດ້ວຍດອກຄາຍສຽງແຄນແດນພູສູງ ພະລັງແຫ່ງຄວາມຮັກ ພະລັງແຫ່ງຄວາມສາມັກຄີ ແລະ ດິນແດນແຫ່ງໄຊຊະນະ.
ທ່ານ ຄຳຫຼ້າ ລິ້ງນະສອນ ເຈົ້າແຂວງອຸດົມໄຊ ປະທານກຳມະການຈັດງານອຸດົມໄຊເກມ ກ່າວວ່າ: ງານແຂ່ງຂັນກີລາ
ແຫ່ງຊາດ ຄັ້ງທີ X ແມ່ນຖືເປັນຄັ້ງປະຫວັດສາດ ທີ່ແຂວງອຸດົມໄຊໄດ້ຮັບກຽດເປັນເຈົ້າພາບ ເປັນການສ້າງຂະບວນ
ການຕ້ອນຮັບວັນສຳຄັນຂອງຊາດ ເປັນຕົ້ນແມ່ນ ວັນສ້າງຕັ້ງພັກ ຄົບຮອບ 60 ປີ ວັນສະຖາປະນາ ສປປ ລາວ ຄົບ
ຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ແລະ ອື່ນໆໃຫ້ມີບັນຍາກາດຟົດຟື້ນ.
ພາຍຫຼັງການຂຶ້ນກ່າວລາຍງານຂອງທ່ານ ຄຳຫຼ້າ ລິ້ງນະສອນ ເຈົ້າແຂວງອຸດົມໄຊ ປະທານຈັດງານແຂ່ງຂັນກີລາແຫ່ງ
ຊາດ ຄັ້ງທີ X ຈົບລົງ ກໍ່ໄດ້ມີການກ່າວເປີດງານຢ່າງເປັນທາງການຂອງທ່ານ ຈູມມາລີ ໄຊຍະສອນ ປະທານປະເທດແຫ່ງ
ສປປ ລາວ ເຊິ່ງທ່ານໄດ້ກ່າວຊົມເຊີຍ ຄະນະນຳອຳນາດການປົກຄອງແຂວງອຸດົມໄຊ ທີ່ພ້ອມຈິດໃຈເປັນເຈົ້າພາບທີ່ດີ
ໃນການຈັດງານແຂ່ງຂັນກີລາຄັ້ງນີ້ ເຊິ່ງງານກີລາແຫ່ງຊາດ ຈະເປັນການໂອບເອື້ອອາລີຂອງປວງຊົນລາວທັງຊາດ.
ສຳລັບການແຂ່ງຂັນງານມະຫາກຳກີລາແຫ່ງຊາດ ຄັ້ງທີ X ທີ່ແຂວງອຸດົມໄຊ ປະກອບມີ 25 ປະເພດກີລາ ມີຄະນະນຳ
ເຈົ້າໜ້າທີ່ 6.312 ຄົນ ໃນນັ້ນ ມີ ນັກກີລາ 3.970 ຄົນ ມາຈາກ 7 ກະຊວງ 17 ແຂວງ ແລະ 1 ນະຄອນຫຼວງວຽງຈັນ ລວມ
ທັງໝົດ 25 ພາກສ່ວນ ໂດຍມີການຊິງຫຼຽນ 1.141.
ແຫລ່ງຂ່າວ: ວຽງຈັນໃໝ່