ສຳນັກຂ່າວເດລີນິວ ປະເທດໄທລາຍງານໃນວັນທີ 2 ກໍລະກົດ 2024 ຜ່ານມາ, ການລົດໄຟແຫ່ງປະເທດໄທ ຈະເປີດຂະບວນລົດລະຫວ່າງປະເທດ ຂະບວນລົດໄວທີ່ 133 ເສັ້ນທາງກຸງເທບອະພິວັດ-ນະຄອນຫຼວງວຽງຈັນ (ຄຳສະຫວາດ) ເຊິ່ງຈະເປັນຮອບປະຖົມມະເລີກ ໂດຍຈະເດີນທາງອອກຈາກສະຖານີກຸງເທບອະພິວັດ ໃນເວລາ 21:25 ໂມງຂອງວັນທີ 19 ກໍລະກົດ 2024 ແລະ ຈະເດີນທາງມາຮອດສະຖານີນະຄອນຫຼວງວຽງຈັນ (ຄຳສະຫວາດ) ໃນວັນທີ 20 ກໍລະກົດ 2024 ເວລາ 09:05 ໂມງ.
ຕາມການລາຍງານ ເມື່ອເດີນທາງມາຮອດສະຖານີນະຄອນຫຼວງວຽງຈັນແລ້ວ ຜູ້ໂດຍສານສາມາດໃຊ້ບໍລິການລົດໂດຍສານຂົນສົ່ງສາທາລະນະ ເຊິ່ງໄດ້ຈັດກຽມໄວ້ບໍລິການແກ່ນັກທ່ອງທ່ຽວເຊັ່ນ: ລົດຕູ້, ລົດສາມລໍ້ ແລະ ລົດແທັກຊີ່ ເພື່ອອຳນວຍ–ຄວາມ-ສະດວກໃນການເດີນທາງເຂົ້າສູ່ຕົວເມືອງນະຄອນຫຼວງວຽງຈັນ ໄລຍະທາງປະມານ 7-9 ກິໂລແມັດ ນອກຈາກນີ້ນັກທ່ອງທ່ຽວຍັງສາມາດເດີນທາງຕໍ່ໄປປະເທດຈີນໄດ້ດ້ວຍລົດໄຟລາວ-ຈີນ ທີ່ສະຖານີລົດໄຟນະຄອນຫຼວງວຽງຈັນ.
ເບື້ອງຕົ້ນຂະບວນລົດໄຟຈະໃຫ້ບໍລິການໃນເສັ້ນທາງກຸງເທບອະພິວັດ-ວຽງຈັນ (ຄຳສະຫວາດ) ຈະເປັນຂະບວນລົດໄຟທີ່ໃຫ້ບໍລິການເສັ້ນດຽວກັນກັບ ເສັ້ນທາງກຸງເທບ-ໜອງຄາຍ ມີໄລຍະທາງ 614 ກິໂລແມັດ ເຊິ່ງໃຫ້ບໍລິການມື້ລະ 6 ຖ້ຽວ(ໄປ-ກັບ) ໂດຍມີທັງຂະບວນ ລົດດ່ວນ, ລົດດ່ວນພິເສດ ແລະ ລົດໄວ ໃຊ້ໄລຍະເວລາໃນການເດີນທາງ 9-10 ຊົ່ວໂມງ.
ຢ່າງໃດກໍຕາມສ່ວນລາຄາ ແລະ ຖ້ຽວໂດຍສານ ຕ້ອງໄດ້ລໍຖ້າຕິດຕາມມື້ເປີດຢ່າງເປັນທາງການໄປພ້ອມໆກັນ.
ແຫຼ່ງຂ່າວ: DAILYNEWS