ໃນວັນທີ 3 ກໍລະກົດ 2024 ຜ່ານມານີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ໂອ້ລົມຜ່ານໂທລະສັບ ກັບທ່ານ ເສດຖາ ທະວີສິນ ນາຍົກລັດຖະມົນຕີ ແຫ່ງ ຣາຊະອານາຈັກໄທ ເພື່ອແລກປ່ຽນຄວາມຄິດເຫັນ ເພື່ອເພີ່ມທະວີການພົວພັນ ແລະ ຮ່ວມມື ລະຫວ່າງ ສອງປະເທດ.
ການໂອ້ລົມໂທລະສັບຄັ້ງນີ້, ທ່ານນາຍົກລັດຖະມົນຕີ ທັງສອງປະເທດ ໄດ້ທົບທວນຄືນການຈັດຕັ້ງປະຕິບັດຜົນຂອງການພົບປະສອງຝ່າຍ ລະຫວ່າງ ສອງນາຍົກລັດຖະມົນຕີ ລາວ-ໄທ ຄັ້ງຜ່ານມາ ເປັນຕົ້ນ ການຮ່ວມມືທາງດ້ານເສດຖະກິດ, ການອໍານວຍຄວາມສະດວກ ໃນການເຊື່ອມໂຍງເຊື່ອມຈອດຕາຂ່າຍໄຟຟ້າ ພາຍໃຕ້ໂຄງການໄຟຟ້າ ລາວ-ມາເລເຊຍ-ສິງກະໂປ.
ການຮ່ວມມືໃນການແກ້ໄຂບັນຫາຢາເສບຕິດ ໂດຍມອບໃຫ້ສູນກາງ ແລະ ທ້ອງຖິ່ນ ຮ່ວມມືກັນໃນການສະກັດກັ້ນ ແລະ ປາບປາມຢາເສບຕິດ ໂດຍມີການແລກປ່ຽນຂໍ້ມູນຂ່າວສານຢ່າງຕໍ່ເນື່ອງ, ເພີ່ມທະວີການລາດຕະເວນຮ່ວມກັນ ໃຫ້ຫຼາຍຂຶ້ນ ແລະ ການສະໜັບສະໜູນສ້າງຄວາມເຂັ້ມແຂງ ໃຫ້ເຈົ້າໜ້າທີ່ກ່ຽວຂ້ອງ, ໂດຍສະເພາະ ຄະນະກໍາມະການ ຮັກສາຄວາມສະຫງົບຮຽບຮ້ອຍ ຕາມຊາຍແດນທົ່ວໄປ ລາວ-ໄທ (GBC) ແລະ ຄະນະກໍາມະການລາວ-ໄທ ວ່າດ້ວຍການຮ່ວມມື ເພື່ອຄວບຄຸມຢາເສບຕິດ ກໍຄື ຫ້ອງການປະສານງານຄວບຄຸມຢາເສບຕິດ ຕາມຊາຍແດນ (BLO) ແລະ ບັນດາແຂວງ-ຈັງຫວັດຊາຍແດນ ລາວ-ໄທ.
ໃນໂອກາດດຽວກັນ, ທ່ານ ເສດຖາ ທະວີສິນ ໄດ້ແຈ້ງໃຫ້ການສະໜັບສະໜູນງົບປະມານ ຈໍານວນໜຶ່ງ ເພື່ອປະກອບສ່ວນສ້າງສູນຝຶກອົບຮົມ ແລະ ວິໄຈກາເຟ ຂອງສະຫະກອນກາເຟວັນໃໝ່ ທີ່ແຂວງຫົວພັນ, ເຊິ່ງເປັນໂຄງການປູກພືດທົດແທນການປູກຝິ່ນ ພາຍໃຕ້ໂຄງການຮ່ວມມື ລະຫວ່າງ ກະຊວງປ້ອງກັນຄວາມສະຫງົບ ແລະ ຫ້ອງການສະຫະປະຊາຊາດ ວ່າດ້ວຍຢາເສບຕິດ ແລະ ອາດຊະຍາກໍາ ປະຈໍາ ສປປ ລາວ.
ຂ່າວ: ປະເທດລາວ