ອີງຕາມຂໍ້ມູນທີ່ ທ່ານ ດາວວົງ ພອນແກ້ວ ເຈົ້າແຂວງສາລະວັນ ລາຍງານຜ່ານລະບົບອອນລາຍຕໍ່ກອງປະຊຸມຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ໄດ້ຈັດຂຶ້ນຫວ່າງບໍ່ດົນມານີ້ ທີ່ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນ ຕີ ລັດຖະມົນຕີ ກະຊວງການຕ່າງປະເທດ ປະທານຄະນະກຳມະການຄຸ້ມຄອງແຫ່ງ ຊາດ ເພື່ອແກ້ໄຂບັນຫາລະເບີດບໍ່ທັນແຕກຕົກຄ້າງຢູ່ ສປປ ລາວ ໃຫ້ຮູ້ວ່າ: ສາລະວັນເປັນແຂວງໜຶ່ງທີ່ຖືກຖິ້ມລະເບີດໃສ່ເປັນອັນດັບຕົ້ນໆ ຂອງ ສປປ ລາວ, ໂດຍສະເພາະແມ່ນເຂດທີ່ມີການເຄື່ອນໄຫວລຽບຕາມເສັ້ນທາງໂຮ່ຈິມິນ, ໂດຍມີການຢັ້ງ ຢືນການຖິ້ມລະເບີດໃສ່ແຂວງສາລະວັນ ຈາກຖານຂໍ້ມູນແຫ່ງຊາດ ຈໍານວນທັງໝົດ 19.514.200 ໜ່ວຍ ແລະ ບໍ່ທັນສາມາດຮູ້ໄດ້ວ່າມີຈໍານວນຈັກໜ່ວຍທີ່ບໍ່ທັນແຕກ (ບໍ່ມີໃນຖານຂໍ້ມູນແຫ່ງຊາດ)
ມາຮອດປັດຈຸບັນ ສາມາດກວດກູ້ ແລະ ທໍາລາຍໄປແລ້ວ ທັງໝົດ 168,033 ໜ່ວຍ, ຈໍານວນບ້ານທີ່ຢັ້ງຢືນໄດ້ວ່າ ມີຄວາມອັນຕະລາຍ (CHAs) ມີທັງໝົດ 326 ບ້ານ ໃນ 7 ເມືອງເປົ້າໝາຍ ຂອງແຂວງ, ມີສະໜາມສໍາຫຼວດ ແລະ ກວດກູ້ທັງໝົດ 2,622 ສະໜາມ, ໄດ້ສໍາເລັດການກວດກູ້ແລ້ວ ທັງໝົດ 431 ສະໜາມ ແລະ ສະ ໜາມຍັງບໍ່ທັນໄດ້ມີການສໍາຫຼວດ ແລະ ກວດກູ້ ທັງໝົດ 2,191 ສະໜາມ.
ທ່ານໃຫ້ຮູ້ຕື່ມວ່າ: ຢູ່ແຂວງສາລະວັນ ຍັງມີເຫດການລະເບີດຕົກຄ້າງແຕກໃສ່ປະ ຊາຊົນໃນທຸກປີ ຊຶ່ງໃນໄລຍະຜ່ານຈົນຮອດປັດຈຸບັນນີ້ ມີອຸບັດເຫດເກີດຂຶ້ນທັງໝົດ 59 ຄັ້ງ, ມີຜູ້ຖືກເຄາະຮ້າຍທັງໝົດ 103 ຄົນ, ບາດເຈັບ 74 ຄົນ, ເສຍຊີວິດ 29 ຄົນ.
ພ້ອມນີ້ທ່ານ ໄດ້ສະເໜີຄະນະກໍາມະການຂັ້ນແຂວງ ແລະ ກອງເລຂາ ຕ້ອງໄດ້ມີກົນໄກການປະຊຸມ 6 ເດືອນ ແລະ 1 ປີ, ການເລືອກພື້ນທີ່ບຸລິມະສິດຂອງແຂວງ, ເປັນຕົ້ນແມ່ນຄວາມຕ້ອງການ ໃນການສໍາຫຼວດ ແລະ ກວດກູ້ລະເບີດບໍ່ທັນແຕກທີ່ຍັງຕົກຄ້າງ ໃນພື້ນທີ່ຂອງການກໍ່ສ້າງ ຫຼື ເຂດພັດທະນາຂອງແຂວງ ແລະ ອື່ນໆ.
ຂ່າວ: ວສລ