ອີງຕາມແຈ້ງການຂອງກະຊວງ ເຕັກໂນໂລຊີ-ການສື່ສານ ລົງເມື່ອວັນທີ 27 ມິຖຸນາ 2024 ກ່ຽວກັບການເກີດອຸບັດຕິເຫດ ອັກຄີໄພ (ໄຟໄໝ້) ຕຶກອາຄານ ຫ້ອງການ ກະຊວງ ເຕັກໂນໂລຊີ-ການສື່ສານ (ໃນເຂດສຳນັກງານນາຍົກລັດຖະມົນຕີ) ບ້ານນາໄຮ່ດຽວ, ເມືອງຈັນທະບູລີ, ນະຄອນຫຼວງວຽງຈັນ, ໃນຕອນບ່າຍຂອງວັນທີ 24 ມິຖຸນາ 2024.
ເຊິ່ງເນື້ອໃນແຈ້ງການໄດ້ລະບຸວ່າ: ພາຍຫຼັງເກີດເຫດ, ເຈົ້າໜ້າທີ່ມອດໄຟໄດ້ລະດົມກໍາລັງເຂົ້າດໍາເນີນການມອດໄຟໄດ້ຢ່າງທັນການ ດ້ວຍເຫດນີ້, ຈຶ່ງຮັບປະກັນຄວາມປອດໄພໄດ້ຮ້ອຍສ່ວນ ຮ້ອຍ (100%) ໃຫ້ແກ ່ ພະນັກງານທຸກຄົນທີ່ປະຈໍາການຢູ່ໃນຕຶກອາຄານດັ່ງກ່າວ, ລວມທັງອຸປະກອນທາງດ້ານໄອທີ, ຂໍ້ມູນ ແລະ ເອກະສານທັງໝົດ ແມ່ນບໍ່ໄດ້ຮັບຄວາມເສຍຫາຍແຕ່ປະການໃດ, ມີພຽງໂຕະຕັ່ງ ແລະ ເຄື່ອງຮັບໃຊ້ຈໍານວນໜຶ່ງຢູ່ຫ້ອງປະຊຸມບ່ອນເກີດເຫດທີ່ຢູ່ຊັ້ນ 2 ແລະ ຫ້ອງການ 1 ຫ້ອງ ຢູ່ຊັ້ນຖັດຂຶ້ນໄປຄື ຊັ້ນ 3 ເທົ່ານັ້ນທີ່ໄດ້ຮັບຄວາມເສຍຫາຍ.
ສ່ວນສາເຫດຂອງການເກີດເຫດອັກຄີໄພຄັ້ງນີ້ ພາກສ່ວນສືບສວນສອບສວນ ຈະແຈ້ງໃຫ້ຊາບຕາມພາຍຫຼັງ. ອີກຄັ້ງຫນຶ່ງ, ກະຊວງເຕັກໂນໂລຊີ ແລະ ການສື່ສານ ຂໍຢັ້ງຢືນວ່າ ເຫດການຄັ້ງນີ້ ບໍ່ໄດ້ສົ່ງຄວາມເສຍຫາຍແຕ່ຢ່າງໃດຕໍ່ ຫ້ອງວ່າການ ສໍານັກງານນາຍົກລັດຖະມົນຕີ. ດັ່ງນັ້ນ, ຈຶ່ງຂໍແຈ້ງມາຍັງບັນດາທ່ານເພື່ອຮັບຊາບດ້ວຍ.