ສຳນັກຂ່າວຕ່າງປະເທດລາຍງານໃນວັນທີ 25 ມິຖຸນາ 2024 ຜ່ານມາກ່ຽວກັບເຫດທີ່ຊວນໃຫ້ຂົນລຸກເມື່ອມີເດັກຊາຍອາຍຸ 19 ປີໄດ້ໄປຫຼິ້ນ້ຳຕົກກັບໝູ່ເພື່ອນ ຢູ່ທີ່ລັດອຸຕາຣາຂັນ ໃນປະເທດອິນເດຍເມື່ອ 2 ອາທິດກ່ອນ ເຮັດໃຫ້ໂຕປີງເຂົ້າໄປຢູ່ໃນຮູດັງໂດຍບໍ່ຮູ້ໂຕ.
ຕາມການລາຍງານລະບຸວ່າ: ຫຼັງຈາກນັ້ນ 2 ມື້ຕໍ່ມາເດັກຊາຍຄົນດັ່ງກ່າວມີອາການປວດຢູ່ບໍລິເວນໃນຮູດັງ ແລະ ມີເລືອດໄຫຼອອກມາເລັກນ້ອຍ ຈົນເວລາຜ່ານໄປ 14 ມື້ ອາການບໍ່ດີຂຶ້ນດ້ວຍຄວາມຢ້ານລາວຈຶ່ງຕັດສິນໃຈໄປພົບແພດ ໂດຍເລົ່າອາການໃຫ້ຟັງ ຫຼັງຈາກນັ້ນແພດໄດ້ກວດບໍລິເວນໃນຮູດັງ ແລ້ວພົບວ່າມີປີງທີ່ກຳລັງດູດເລືອດຕະຫຼອດເວລາ ແພດຈຶ່ງໄດ້ທຳການຮັກສາ ໂດຍການສ່ອງກ້ອງບໍລິເວນຮູດັງຂ້າງຊ້າຍ ແລະ ສາມາດເອົາປີງອອກມາໄດ້ສຳເລັດ.
ແພດໃຫ້ຂໍ້ມູນວ່າ: ຫາກບໍ່ຮີບຮັກສາ ເຊື້ອໂຣກ ຫຼື ປໍລະສິດ ຈະເຮັດໃຫ້ເກີດອາການປ່ວຍເຖິງຂັ້ນເສຍຊີວິດໄດ້ ໂດຍເຊື້ອພະຍາດດັ່ງກ່າວຈະແຜ່ຂະຫຍາຍໄປບໍລິວນທີ່ສຳຄັນເຊັ່ນສະໝອງ ຫຼື ດວງຕາ ທັງນີ້ປີງຍັງສາມາດພົບໄດ້ຕະຫຼອດ ເກາະຕາມສ່ວນຕ່າງໆຂອງຮ່າງກາຍ ແຕ່ສ່ວນນ້ອຍທີ່ຈະພົບໃນຮູດັງ.
ແຫຼ່ງຂ່າວ: World Forum