ສຳນັກຂ່າວຕ່າງປະເທດ ລາຍງານວ່າ: ໃນວັນທີ 24 ມິຖຸນາທີ່ຜ່ານມາ, ເຮືອບິນຂອງສາຍການບິນມາເລເຊຍ ແອລາຍ ຖ້ຽວບິນ “MH780” ອອກເດີນທາງຈາກນະຄອນຫຼວງກົວລາລຳເປີ ມາຍັງ ສະໜາມບິນສຸວັນນະພູມ ປະເທດໄທ ໄດ້ເກີດເຫດຂັດຂ້ອງທາງດ້ານລະບົບຄວບຄຸມຄວາມດັນຂອງເຮືອບິນ, ເມື່ອເກີດເຫດການດັ່ງກ່າວຂຶ້ນ, ນັກບິນໄດ້ທຳການບັງຄັບເຮືອບິນໃຫ້ກັບຄືນໄປຍັງ ນະຄອນຫຼວງກົວລາລຳເປີອີກຄັ້ງ ເພື່ອຄວາມປອດໄພ.
ທາງດ້ານເວັບໄຊ້ “Flightradar24” ທີ່ຕິດຕາມເສັ້ນທາງການບິນແບບໃກ້ຊິດ ໄດ້ເປີດເຜີຍວ່າ: ເຮືອບິນລຳດັ່ງກ່າວໄດ້ມີການແຈ້ງເຫດສຸກເສີນ, ນັກບິນໄດ້ລະບຸວ່າ: ຂະນະທີ່ເຮືອບິນຫຼຸດລະດັບລົງໄປຢູ່ທີ່ 10,000 ຟຸດ, ກໍພົບວ່າ ເຮືອບິນມີປັນຫາກ່ຽວກັບລະບົບຄວບຄຸມຄວາມດັນ, ຈຶ່ງຕັດສິນໃຈນຳເຮືອບິນກັບຄືນມາຍັງສະໜາມບິນຕົ້ນທາງອີກຄັ້ງ.
ເຮືອບິນລຳດັ່ງກ່າວ, ມີຜູ້ໂດຍສານ 164 ແລະ ໄດ້ກັບມາຍັງສະໜາມບິນຕົ້ນທາງໄດ້ຢ່າງປອດໄພ, ຕໍ່ກັບເຫດການທີ່ເກີດຂຶ້ນ ທາງດ້ານຜູ້ຊ່ຽວຊານ ແລະ ເຈົ້າໜ້າທີ່ ຈະທຳການສືບສວນຫາສາເຫດທີ່ເຮັດໃຫ້ເກີດເຫດການດັ່ງກ່າວຂຶ້ນ.
ຂ່າວ: apnews