ສຳນັກຂ່າວຕ່າງປະເທດລາຍງານໃນວັນທີ 24 ມິຖຸນາ 2024 ນີ້ກ່ຽວກັບເຫດການບໍ່ຄາດຄິດເມື່ອຍິງສາວຊາວອິນໂດເນເຊຍ ອາຍຸ 22 ປີ ໃຊ້ເຄື່ອງແລ່ນຢູ່ດີໆກໍເກີດລົ້ມ ແລ້ວພັດຕົກລົງຈາກປ່ອງຢ້ຽມທາງຫຼັງ ເຮັດໃຫ້ຕົກມາຈາກຊັ້ນ 3 ລົງໃສ່ພຶ້ນຢ່າງຮຸນແຮງຈົນເຮັດໃຫ້ເສຍຊີວິດ.
ຕາມການລາຍງານ ຍິງສາວຄົນນີ້ໄດ້ເດີນທາງໄປອອກກຳລັງກາຍກັບແຟນ ແລະ ນ້ອງ ໂດຍເບື້ອງຕົ້ນແຟນໜຸ່ມໄດ້ຊວນຍິງຄົນດັ່ງກ່າວອອກກຳລັງກາຍນຳກັນໃນຊັ້ນ 2 ແຕ່ນາງຢາກໃຊ້ເຄື່ອງແລ່ນໄຟຟ້າທີ່ຢູ່ຊັ້ນ 3 ເຊິ່ງເປັນບໍລິເວນທີ່ເກີດເຫດເຊິ່ງເຄື່ອງແລ່ນໄຟຟ້າໄດ້ຫັນທາງຫຼັງໃສ່ກັບປ່ອງຢ້ຽມ ຈາກນັ້ນນາງຈຶ່ງໄດ້ຂຶ້ນໄປໃຊ້ງານແຕ່ພາຍຫຼັງທີ່ໃຊ້ງານໄດ້ພຽງ 30 ນາທີກໍໄດ້ປັບເຄື່ອງຈາກໃຫ້ຊ້າລົງກ່ອນທີ່ຕົນເອງຈະລົ້ມຫງາຍຫຼັງ ແລ້ວຕົກລົງຈາກປ່ອງຢ້ຽມຂະນາດໃຫຍ່ທີ່ເປີດຢູ່ ເຮັດໃຫ້ຕົກລົງໄປຢູ່ລຸ່ມທ່າມກາງຄວາມແຕກຕື່ນຂອງຜູ້ທີ່ມາອອກກຳລັງກາຍຄົນອື່ນໆ.
ຫຼັງຈາກເກີດເຫດການນີ້ຂຶ້ນ ສູນອອກກຳລັງກາຍແຫ່ງນີ້ຕ້ອງໄດ້ປິດໃຫ້ບໍລິການ 3 ມື້ ຂະນະທີ່ການສືບສວນຂອງເຈົ້າໜ້າທີ່ພົບວ່າໄລຍະຫ່າງລະຫວ່າງປ່ອງຢ້ຽມ ກັບເຄື່ອງແລ່ນພຽງແຕ່ 60 ຊັງຕີແມັດ ແລະ ຂອບປ່ອງຢ້ຽມຢູ່ສູງຈາດລລລກພື້ນຊັ້ນສາມພຽງ 30 ຊັງຕີແມັດ ແຕ່ປ່ອງຢ້ຽມມີຄວາມກວ້າງ 90 ຊັງຕີແມັດ.
ເຊິ່ງຕອນນີ້ເຈົ້າໜ້າທີ່ຕຳຫຼວດກຳລັງສືບສວນວ່າສູນອອກກຳລັງກາຍແຫ່ງນີ້ມີການປ່ອຍປະລະເລີຍຈົນເກີດອຸບັດຕິເຫດ ແລະ ມີໃບອະນຸຍາດໃນການເປີດກິດຈະການຫຼືບໍ່ ແລະ ຍັງສອບສວນຜູ້ຢູ່ໃນເຫດການຫຼາຍຄົນອີກດ້ວຍ.
ແຫຼ່ງຂ່າວ: ໄທລັດ