ໃນວັນທີ 20 ມິຖຸນາ 2024 ທ່ານ ສອນໄຊ ສີພັນດອນ, ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ຢູ່ແຂວງເຊກອງ ແລະ ສາລະວັນ ໂດຍມີເຫຼັກໄຫຼ ສີວິໄລ, ເຈົ້າແຂວງໆເຊກອງ ແລະ ທ່ານ ດາວວົງ ພອນແກ້ວ, ເຈົ້າແຂວງໆສາລະວັນ ພ້ອມດ້ວຍຄະນະນຳຂອງສອງແຂວງ ແລະ ພາກສ່ວນທີ່ກ່ຽວຂ້ອງໃຫ້ການຕ້ອນຮັບ.
ໃນໄລຍະເຄື່ອນໄຫວຢູ່ແຂວງເຊກອງ, ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຕິດຕາມກວດກາເບິ່ງສະພາບການພັດທະນາໂຄງການຂຸດຄົ້ນຖ່ານຫີນ ຂອງກຸ່ມບໍລິສັດ ພອນສັກ ຈຳກັດ ທີ່ເມືອງກະລຶມ, ແຂວງເຊກອງ ເຫັນວ່າ ໂຄງການມີເນື້ອທີ່ສຳຫຼວດ ແລະ ຂຸດຄົ້ນ 700 ກວ່າກິໂລຕາແມັດ ເຊິ່ງຄາດວ່າຈະມີຖ່ານຫີນປະມານ 800 ລ້ານໂຕນ ໂດຍມີແຜນນໍາໃຊ້ຖ່ານຫີນດັ່ງກ່າວ ປະມານ 400 ລ້ານໂຕນ ເຂົ້າໃນໂຄງການໄຟຟ້າພະລັງງານຄວາມຮ້ອນ 1.800 ເມກາວັດ ທີ່ຈະກໍ່ສ້າງຢູ່ເມືອງກະລຶມ ໃນໄລຍະປີ 2025-2030 ແລະ ອີກ 400 ລ້ານໂຕນ ແມ່ນເພື່ອຂາຍຢູ່ພາຍໃນ ແລະ ຕ່າງປະເທດ.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ເນັ້ນໜັກຕໍ່ຜູ້ພັດທະນາໂຄງການ ສືບຕໍ່ເອົາໃຈໃສ່ພັດທະນາໂຄງການຂອງຕົນ ໃຫ້ມີຄວາມຄືບໜ້າຕາມແຜນທີ່ກຳນົດໄວ້ໃນແຕ່ລະໄລຍະ ແລະ ສອດຄ່ອງຕາມກົດໝາຍ, ລະບຽບການທີ່ກ່ຽວຂ້ອງ; ເອົາໃຈໃສ່ຕໍ່ບັນຫາຜົນກະທົບທາງດ້ານສິ່ງແວດລ້ອມ ແລະ ສັງຄົມ, ປະກອບສ່ວນພັດທະນາໂຄງລ່າງພື້ນຖານຂອງທ້ອງຖິ່ນ ໃຫ້ຫຼາຍຂຶ້ນຕື່ມ ໂດຍສະເພາະເສັ້ນທາງຄົມມະນາຄົມ, ການສົ່ງເສີມການຜະລິດ, ການປັບປຸງຊີວິດການເປັນຢູ່ຂອງປະຊາຊົນ ແລະ ອື່ນໆ; ໃຫ້ພາກສ່ວນກ່ຽວຂ້ອງ ເອົາໃຈໃສ່ຕໍ່ການຄຸ້ມຄອງແຮງງານຂອງໂຄງການ ເພື່ອເຮັດໃຫ້ການປະຕິບັດພັນທະຕ່າງໆ ທາງດ້ານແຮງງານ ໄດ້ຄົບຖ້ວນຕາມຕົວຈິງ ພ້ອມທັງກວດກາຄືນ ການນຳເຂົ້ານໍ້າມັນເຊື້ອໄຟເພື່ອຮັບໃຊ້ເຂົ້າໃນໂຄງການ, ລວມທັງ ຂອດການຊໍາລະສະສາງນໍ້າມັນເຊື້ອໄຟ ທີ່ໄດ້ນໍາໃຊ້ເຂົ້າໃນໂຄງການດັ່ງກ່າວ.
ພາຍຫຼັງສໍາເລັດການເຄື່ອນໄຫວເຮັດວຽກ ຢູ່ແຂວງເຊກອງ ໃນຕອນບ່າຍຂອງວັນດຽວກັນ, ຄະນະຂອງທ່ານ ນາຍົກລັດຖະມົນຕີ ກໍ່ໄດ້ສືບຕໍ່ໄປຢ້ຽມ ແລະ ຕິດຕາມສະພາບການບໍລິການເຂົ້າ-ອອກເມືອງ ຢູ່ດ່ານສາກົນລະໄລ ທີ່ເມືອງສະໝ້ວຍ, ແຂວງສາລະວັນ ເຫັນວ່າໄລຍະ 6 ເດືອນ ຕົ້ນປີ 2024 ມີຄົນເຂົ້າເມືອງ ທັງໝົດ 36,396 ເທື່ອຄົນ, ຄົນອອກເມືອງ 40,346 ເທື່ອຄົນ; ການເກັບລາຍຮັບ ໄດ້ 50.61 ຕື້ກີບ ເທົ່າກັບ 61% ຂອງແຜນການປີ; ສິນຄ້ານຳເຂົ້າ ສ່ວນໃຫຍ່ແມ່ນນໍ້າມັນເຊື້ອໄຟ, ຝຸ່ນວິທະຍາສາດ, ເຄື່ອງອຸປະໂພກ-ບໍລິໂພກ ແລະ ອື່ນໆ; ສິນຄ້າສົ່ງອອກ ສ່ວນ ໃຫຍ່ແມ່ນຖ່ານຫີນ ແລະ ຜະລິດຕະພັນກະສິກຳ ເປັນຕົ້ນ: ມັນຕົ້ນ, ຢາງພາລາ, ໝາກມ່ວງຫິມະພານ ແລະ ອື່ນໆ.
ໃນໂອກາດນີ້, ທ່ານ ນາຍົກລັດຖະມົນຕີ ກໍ່ໄດ້ມີຄຳເຫັນໂອ້ລົມ ຕໍ່ຄະນະຄຸ້ມຄອງດ່ານດັ່ງກ່າວ ແລະ ຊີ້ນຳ ໃຫ້ສົມທົບກັບພາກສ່ວນກ່ຽວຂ້ອງຮີບຮ້ອນສຳຫຼວດວັດ ແທກຂອບເຂດທີ່ດິນຂອງດ່ານ ເພື່ອອອກໃບຕາດິນຕາມລະບຽບການ; ສົມທົບກັບ ຂະແໜງໂຍທາທິການ ແລະ ຂົນສົ່ງ ໃນການສຳຫຼວດອອກແບບ ໂຄງລ່າງພື້ນຖານຂອງດ່ານ ຕາມມາດຖານເຕັກນິກ ທີ່ກຳນົດໄວ້ ທັງນີ້ ກໍ່ເພື່ອເປັນພື້ນຖານ ໃຫ້ແກ່ການພັດທະນາໂຄງລ່າງພື້ນຖານຂອງດ່ານ ໃຫ້ມີຄວາມວ່ອງໄວ, ທັນສະໄໝ, ໄດ້ມາດຕະຖານ ແລະ ຮັບປະກັນຄວາມຍືນຍົງ.
ໃນຕອນແລງ ຂອງມື້ດຽວກັນ, ທ່ານ ນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປຢ້ຽມຢາມຟາມລ້ຽງໄກ່ ປັນຍາຄູນ ທີ່ບ້ານໂນນໜອງຫວ້າ, ເມືອງລະມາມ ແຂວງເຊກອງ ຂອງບໍລິສັດ ການຄ້າຂາອອກ-ຂາເຂົ້າ ເມືອງລະມາມ ຈຳກັດຜູ້ດຽວ ຕື່ມອີກ.
ຂ່າວ ແລະ ພາບ: ກົມປະຊາສຳພັນ ຫສນຍ.