ອົງການໄອຍະການປະຊາຊົນແຂວງອຸດົມໄຊ ໄດ້ຖະແຫຼງສໍານວນຄະດີດັ່ງກ່າວໃນຫ້ອງປະຊຸມສານ ໃຫ້ຮູ້ວ່າ: ການກະທໍາຂອງນາງ ພອນວິໄລ (ຈໍາເລີຍ 1) ແລະ ທ້າວ ຂັນທະລີ (ຈໍາເລີຍ 2) ໃນຄັ້ງນີ້ມີຄວາມຜິດຕາມຂໍ້ກ່າວຫາແທ້ ຊຶ່ງສະແດງອອກຕາມຄໍາໃຫ້ການຂອງພວກຈຳເລີຍວ່າ: ນາງ ພອນວິໄລ ເລີ່ມຕິດຫຼິ້ນການພະນັນ ເຊັ່ນ: ຫຼີ້ນຕູ້ເກມ (ໂຣເລັກ), ຫຼີ້ນໄພ້, ຊື້ເລກເຖື່ອນ ແລະ ຫຼິ້ນເກມອອນລາຍ ຢູ່ໂທລະສັບມືຖື ຈຶ່ງໄດ້ຊອກຫາວິທີເພື່ອຍັກຍອກ, ສໍ້ໂກງເອົາເງິນຂອງສະຖາບັນການເງິນຈຸລະພາກ ທີ່ບໍ່ຮັບເງິນຝາກ ໄຊນິຍົມ ແລະ ສໍ້ໂກງເອົາຊັບຂອງປະຊາຊົນ ເພື່ອໄປຫຼີ້ນການພະນັນໂດຍຮູບການ ສ້າງເອກະສານປອມ ດ້ວຍຮູບການເອົາລາຍຊື່ ແລະ ປະຫວັດຂອງລູກຄ້າເງິນກູ້ເກົ່າ ທີ່ບໍ່ໄດ້ມີການເຄື່ອນໄຫວແລ້ວ ມາປະກອບເອກະສານເປັນລູກຄ້າຜູ້ສະເໜີກູ້ຢືມເງິນນໍາສະຖາບັນຄືນໃໝ່ ແລ້ວສົ່ງໃຫ້ສໍານັກງານໃຫຍ່ອະນຸມັດຕາມຂອບເຂດຄວາມຮັບຜິດຊອບ ຈຳນວນ 128 ບັນຊີ ລວມເປັນເງິນ 4.072.614.028 ກີບ;
ໃນນີ້, ໄດ້ຖອນເອົາເງິນຝາກປະຢັດ ຂອງລູກຄ້າທີ່ມາຝາກນໍາ ໜ່ວຍບໍລິການເມືອງສິງ ແຂວງຫຼວງນໍ້າທາ ຈໍານວນ 101 ບັນຊີ ລວມເປັນເງິນ ຈໍານວນ 657.891.000 ກີບ, ໄດ້ຖອນເອົາເງິນຝາກມີກຳນົດທີ່ລູກຄ້າມາຝາກນໍາໜ່ວຍ ບໍລິການເມືອງສິງ ທີ່ຮອດກຳນົດຖອນແລ້ວ ແຕ່ຜູ້ຝາກຍັງບໍ່ທັນມາຖອນ ຈຳນວນ 2 ບັນຊີ ລວມເປັນເງິນ ຈໍານວນ 81.750.000 ກີບ, ໄດ້ເອົາເງິນຝາກປະຢັດຂອງລູກຄ້າທີ່ ມາຝາກນໍາໜ່ວຍບໍລິການເມືອງສິງ ແຕ່ຜູ້ກ່ຽວບໍ່ເອົາເຂົ້າໃນລະບົບບັນຊີຂອງສະຖາບັນ ຈໍານວນ 1 ບັນຊີ ເປັນເງິນຈໍານວນ 64.020.566 ກີບ, ໄດ້ເອົາເງິນຂອງລູກຄ້າ ທີ່ມາຝາກແບບມີກຳນົດ ແຕ່ບໍ່ໄດ້ເອົາເຂົ້າໃນລະບົບ ຢູ່ໜ່ວຍບໍລິການ ເມືອງສິງ ໂດຍທີ່ບໍ່ເອົາເຂົ້າໃນລະບົບບັນຊີຂອງສະຖາບັນ, ມີແຕ່ຂຽນ ແລະ ເຊັນໃບຢັ້ງຢືນຝາກເງິນມີກຳນົດໃຫ້ຜູ້ທີ່ມາຝາກລວມມີ 51 ບັນຊີ ເປັນເງິນຈໍານວນ 3.188.144.000 ກີບ ແລະ ໃນ 51 ບັນຊີນີ້, ຈໍາເລີຍ 2 ເປັນຜູ້ເຊັນໃບຢັ້ງຢືນເງິນຝາກ 2 ບັນຊີ ມູນຄ່າ 1.000.000.000 ກີບ ແລະ ຈໍາເລີຍ 1 ໄດ້ໂອນເງິນເຂົ້າບັນຊີຂອງ ທ້າວ ພູລົມ ຕາມການແນະນໍາຂອງ ຈໍາເລີຍ 2 ຈໍານວນ 500.000.000 ກີບ, ຜູ້ກ່ຽວເອົາໄປໃຊ້ຈ່າຍສ່ວນຕົວ 500.000.000 ກີບ, ຕໍ່ມາ ຈໍາເລີຍ 1 ໄດ້ໂທຫາ ຈໍາເລີຍ 2 ໂດຍອ້າງວ່າ ນາງ ເອັງ ຕ້ອງການຖອນເງິນກ່ອນກໍານົດ, ຈໍາເລີຍ 2 ຈຶ່ງໂອນເງິນໃຫ້ ຈໍານວນ 452.538.000 ກີບ ເນື່ອງຈາກວ່າຖອນເງິນກ່ອນກຳນົດໄດ້ຄິດໄລ່ດອກເບ້ຍປັບໃໝ ແລະ ພາຍຫຼັງໄດ້ເງິນມາແລ້ວກໍເອົາໄປໃຊ້ ຈ່າຍສ່ວນຕົວໝົດ.
ນອກຈາກນີ້, ຈໍາເລີຍ 1 ຍັງໄດ້ບອກໃຫ້ ນາງ ຈັນສຸກ ວັນນະສີ ຢູ່ບ້ານ ນາແສນຄໍາ ເມືອງໄຊ, ແຂວງອຸດົມໄຊ ໃຫ້ໄປແນະນໍາໝູ່ຄູ່, ຄົນຮູ້ຈັກວ່າຖ້າຜູ້ໃດໄປກູ້ຢືມເງິນນໍາສະຖາບັນການເງິນຈຸລະ ພາກທີ່ບໍ່ຮັບເງິນຝາກໄຊນີຍົມ ມາໃຫ້ຈໍາເລີຍ 1 ແລ້ວຈະໃຫ້ຄ່າຕອບແທນ 10% ຂອງເງິນທີ່ກູ້ຢືມ, ສ່ວນການຊຳລະຕົ້ນທຶນ ແລະ ດອກເບ້ຍໃຫ້ສະຖາບັນ ຈໍາເລີຍ 1 ຈະເປັນຜູ້ຮັບຜິດຊອບເອງ; ນາງ ຈັນສຸກ ກໍໄດ້ໄປແນະນໍາ ແລະ ມີຜູ້ໄປກູ້ຢືມເງິນມາໃຫ້ ຈໍາເລີຍ 1 ຈໍານວນ 5 ຄົນ ລວມເປັນເງິນ ຈຳນວນ 48.652.000 ກີບ; ລວມຜົນເສຍຫາຍທັງໝົດທີ່ນາງ ພອນວິໄລ ( ຈໍາເລີຍ 1 ) ສ້າງຂຶ້ນມາ ຈໍານວນ 8.113.071.594 ກີບ.
ສ່ວນການກະທໍາຂອງ ທ້າວ ຂັນທະລີ (ຈໍາເລີຍ 2) ແມ່ນໄດ້ຊີ້ນຳໃຫ້ສະຖາບັນການເງິນຈຸລະພາກທີ່ບໍ່ຮັບເງິນຝາກໄຊນິຍົມ ແຂວງ ອຸດົມໄຊ ເລີ່ມຮັບເງິນຝາກນັບແຕ່ປີ 2017 ເປັນຕົ້ນມາ ແລະ ແນະນໍາໃຫ້ ນາງ ພອນວິໄລ ສິງມີໄຊ (ຈຳເລີຍ 1) ຮັບຝາກເງິນຂອງລູກຄ້າ ຢູ່ໜ່ວຍບໍລິການ ເມືອງສິງ ແຂວງ ຫຼວງນໍ້າທາ ໂດຍບໍ່ໄດ້ຮັບການອະນຸຍາດຈາກທະນາຄານແຫ່ງ ສປປ ລາວ ດ້ວຍການສ້າງຜັງ 2 ຫຼື C2 ໂດຍນໍາໃຊ້ໂປຣແກມບັນຊີ MBwin ໃນການບັນທຶກລາຍການເຄື່ອນໄຫວທາງດ້ານບັນຊີ-ການເງິນຝາກຂອງລູກຄ້າ ເພື່ອຫຼີກລ້ຽງການເສຍພັນທະອາກອນ ແລະ ການແບ່ງເງິນປັນຜົນໃຫ້ລັດ ໂດຍບໍ່ໄດ້ລາຍງານ ຖານະການເງິນໃຫ້ສະພາບໍລິຫານ ແລະ ທະນາຄານແຫ່ງ ສປປ ລາວ ຮັບຊາບ ແລະ ໄດ້ລົງລາຍເຊັນໃສ່ໃບຢັ້ງຢືນເງິນຝາກມີກຳນົດ ຈໍານວນ 2 ໃບ ແລ້ວຝາກຫົວບິນໄປໃຫ້ ຈຳເລີຍ 1 ເພື່ອຮັບເງິນຝາກຂອງ ນາງ ເອັງ ຈໍານວນ 1.000.000.000 ກີບ ແລະ ຈໍາເລີຍ 2 ໄດ້ແນະນໍາໃຫ້ ຈໍາເລີຍ 1 ມອບເງິນສົດເຂົ້າບັນຊີຂອງທ້າວ ພູລົມ ພົມມະລາດ ຈໍານວນ 500.000.000 ກີບແທ້ ແຕ່ເງິນຈໍານວນດັ່ງກ່າວ ຈຳເລີຍ 1 ບອກວ່າລູກຄ້າຕ້ອງການຖອນກ່ອນ ກຳນົດ ຈໍາເລີຍ 2 ຈຶ່ງໄດ້ຄິດໄລ່ດອກເບ້ຍປັບໃໝແລ້ວໂອນເງິນຄືນໃຫ້ ຈໍາເລີຍ 1 ແລ້ວ ຈໍານວນ 452.538.000 ກີບ ແລະ ມາຮອດປັດຈຸບັນ ເງິນທີ່ຍັງເຫຼືອ ຈໍານວນ 47.462.000 ກີບ ນັ້ນ ຈໍາເລີຍ 2 ໄດ້ສົ່ງຄືນໃຫ້ແກ່ສະຖາບັນແລ້ວ.
ນອກຈາກນີ້, ຈຳເລີຍ 2 ຍັງໄດ້ຊີ້ນໍາໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນຂຶ້ນແຜນລົງເຮັດວຽກຢູ່ໜ່ວຍບໍລິການ, ການຈັດຊື້-ຈັດຈ້າງ, ການຝຶກອົບຮົມ, ໄປທັດສະນະສຶກສາ ແລະ ການຂຶ້ນແຜນລາຍຈ່າຍອື່ນໆ ເກີນມູນຄ່າຕົວຈິງ ຈຳນວນ 861.496.083 ກີບ; ໃນນີ້, ຈໍາເລີຍ 2 ໄດ້ຮັບຜົນປະໂຫຍດ ຈໍານວນ 141.037.680 ກີບ, ແບ່ງປັນໃຫ້ພັກນັກງານ ຈຳນວນ 12 ຄົນ ເປັນເງິນຈໍານວນ 720.458.403 ກີບ ແລະ ຈໍາເລີຍ 2 ຍັງໄດ້ແນະນໍາໃຫ້ພະນັກງານ ສ້າງເອກະສານປອມ ແລະ ນໍາໃຊ້ເອກະສານປອມ ຊຶ່ງເກີດມີຄວາມເສຍຫາຍ ທັງໝົດ ຈໍານວນ 243.143.000 ກີບ ແລະ 89.000 ບາດ; ໃນນີ້, ຈໍາເລີຍ 2 ໄດ້ຮັບຜົນປະໂຫຍດ ຈໍານວນ 153.623.000 ກີບ ແລະ 49.000 ບາດ, ແບ່ງປັນໃຫ້ ພະນັກງານຜູ້ປະຕິບັດຕົວຈິງ ຈໍານວນ 2 ຄົນ ເປັນເງິນ ຈໍານວນ 89.520.000 ກີບ ແລະ 40.000 ບາດ; ( ຕໍ່ກັບພະນັກງານທັງ 12 ຄົນນັ້ນ ປັດຈຸບັນຄະນະສະເພາະກິດຂັ້ນແຂວງ ໄດ້ເກັບກູ້ເງິນຄືນໄດ້ ແລ້ວທັງໝົດ ແລະ ໄດ້ແກ້ໄຂດ້ວຍຮູບການປະຕິບັດວິໄນຕໍ່ພວກກ່ຽວໝົດແລ້ວ).
ແຫຼ່ງຂ່າວ: ຄວາມສະຫງົບ