ເມື່ອບໍ່ດົນມານີ້, ກອງຕຳຫຼວດຈະລາຈອນ ກອງບັນຊາການ ປກສ ນະຄອນໄກສອນພົມວິຫານ, ແຂວງສະຫວັນນະເຂດ, ສາມາດກັກຕົວໄວໜຸ່ມ 8 ຄົນ ໃນຂໍ້ຫາ ຂັບຂີ່ລົດກວນເມືອງ, ດັດແປງສະພາບເຕັກນິກລົດຈັກ ມາສຶກສາອົບຮົມ ແລະ ສ້າງບົດບັນທຶກກ່າວເຕືອນ.

ຜ່ານການກວດສອບລົດຈັກ ພົບເຫັນວ່າ ໄດ້ມີການດັດແປງສະພາບເຕັກນິກຄື: ໃສ່ຢາງນ້ອຍ, ທໍ່ລົດມີສຽງດັງແຮງເກີນມາດຕະຖານ, ບໍ່ຕິດປ້າຍທະບຽນ, ບໍ່ໃສ່ແວ່ນຂ້າງ, ດັດແປງທໍ່ຄວັນ.

ຮອ ນິກສັນ ຄໍາມາຫາ ຫົວໜ້າກອງຈະລາຈອນ ກອງບັນຊາການ ປກສ ນະຄອນໄກສອນ ໄດ້ໃຫ້ຮູ້ວ່າ: ຜ່ານການລົງເຄື່ອນໄຫວປະຕິບັດໜ້າທີ່ຕິດຕາມກວດກາ ສະພາບການສັນຈອນຕາມເສັ້ນທາງ, ຢູ່ຂອບເຂດເທດສະບານນະຄອນໄກສອນ, ໄດ້ພົບເຫັນກຸ່ມແກ້ງດັ່ງກ່າວ ແລະ ເຈົ້າໜ້າທີ່ກໍໄດ້ກັກຕົວ.

ເຊິ່ງພວກກ່ຽວຢູ່ໃນເກນອາຍຸ 15-20 ປີ, ເຈົ້າໜ້າທີ່ໄດ້ເຮັດບົດບັນທຶກສຶກສາອົບຮົມ-ກ່າວເຕືອນ, ພ້ອມທັງປະກອບສະພາບເຕັກນິກລົດໃຫ້ເປັນສະພາບເດີມ ແລະ ປັບໄໝຕາມລະບຽບກົດໝາຍ.

ຂ່າວ: ຂ່າວກອງບັນຊາການ ປກສ ແຂວງສະຫວັນນະເຂດ