ສຳນັກຂ່າວຕ່າງປະເທດລາຍງານໃນວັນທີ 18 ມິຖຸນາ 2024 ນີ້ວ່າ: ສະມາຊິກ ວຸດທິສະພາ ໄທ ເຫັນດີຮັບຮອງ ກົດໝາຍ “ສົມລົດເທົ່າທຽມ” ຂອງກຸ່ມຫລາກຫລາຍທາງເພດ LGBTQA+ ເຊິ່ງໄທເປັນປະເທດທຳອິດໃນອາຊຽນ, ເປັນປະເທດທີ 3 ໃນອາຊີ ແລະ ເປັນປະເທດທີ 37 ຂອງໂລກ, ທີ່ຮັບຮອງການແຕ່ງງານຂອງຄູ່ຮັກເພດດຽວກັນໃຫ້ຖືກຕ້ອງຕາມກົດໝາຍ ພາຍຫຼັງໄທຕ້ອງສູ້ຊົນມາດົນນານກວ່າ 20 ປີ.
ທ່ານ ສຸພະໄຊ ສົມຈະເລີນ ຮອງປະທານວຸດທິສະພາຄົນທີ 2 ເຮັດໜ້າທີ່ປະທານໃນກອງປະຊຸມ ເພື່ອພິຈາລະນາຮ່າງພຣະຣາຊະບັນຍັດ ແກ້ໄຂເພີ່ມປະມວນກົດໝາຍແພ່ງ ແລະ ພານິດ ຫລື ກົດໝາຍສົມລົດເທົ່າທຽມ ໄດ້ຮັບການພິຈາລະນາ ໂດຍມີຜູ້ລົງຄວາມເຫັນທັງໝົດ 152 ທ່ານ ແລະ ໄດ້ພິຈາລະນາມີຜູ້ເຫັນດີ 130 ທ່ານ ບໍ່ເຫັນດີ 4 ທ່ານ ແລະ ງົດອອກສຽງ 18 ທ່ານ.
ສຳລັບຮ່າງກົດໝາຍ ສົມລົດເທົ່າທຽມ ຕໍ່ຈາກນີ້ທາງວຸທິສະພາ ຈະສົ່ງໄປຫາທາງຄະນະລັດຖະມົນຕີ ຈາກນັ້ນນາຍົກລັດຖະມົນຕີຈະນຳຂຶ້ນສະເໜີຕໍ່ເຈົ້າຊີວິດ ໂດຍຈະມີຜົນບັງຄັບໃຊ້ຫຼັງກົດໝາຍປະກາດ ຫຼັງຈາກ 120 ວັນ, ນັບວ່າເປັນການປະກາດຜົນສຳເລັດຂອງປະເທດໄທ ທີ່ສາມາດຜ່ານຮ່າງກົດໝາຍ ການສົມລົດແບບເທົ່າທຽມ ຂອງກຸ່ມຫລາກຫລາຍທາງເພດ LGBTQIA+.
ແຫຼ່ງຂ່າວ: ໄທລັດ